Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tezmer aţ-ţili twacult ţ-ţaseεdit

 AḤRIC WIS 6

M’ara d ilal llufan

M’ara d ilal llufan

“Arrac, d lweṛt sɣur [Yahwa].”Ahellil 127:3

Talalit n llufan, si tama, aţ-ţessefṛeḥ imawlan-is, si tama nniḍen, a ten-thewwel. Ay imezwaǧen, m’ara wen-d-ilal llufan amezwaru, ahat aţ-ţwehmem m’ara twalim belli amur ameqran si lweqt-nwen akk-d lǧehd-nwen yeţṛuḥu i llufan-nni. M’ara ken-ixaṣṣ yiḍeṣ yerna yeţţucewwel lḥisas-nwen, ayagi yezmer ad isεeddi lεalaqa-nwen di ccedda tameqrant. Ilaq-awen i sin aţ-ţqeblem liḥala-yagi tajdiṭ akken aţ-ţbeddem ɣer llufan-nwen w’aţ-ţḥarbem ɣef zzwaǧ-nwen. Amek ara ken-εiwnent lewṣayat n Wedlis Iqedsen akken aţ-ţqablem liḥala-ya?

 1 FEHMET AMEK I GBEDDEL LLUFAN TAMΣICT-NWEN

AYEN I D-IQQAR WEDLIS IQEDSEN: “Leḥmala, iwseε lxaṭer-is, leḥmala tesεa lxiṛ” yerna “ur teţnadi ara ɣef nnfeε-is, ur treffu ara.” (1 Ikurintiyen 13:4, 5) Kem a tayemmaţ, i d-isεan llufan amenzu, bla ccekk teţţelhayeḍ-d dima yid-es. Lameεna, izmer wergaz-im ad iḥuss am wakken testehzaḍ deg-s. Ihi, mmekti-d belli ula d neţţa yeḥwaǧ a d-telhiḍ yid-es. S ṣṣber akk-d leḥnana, εiwen-it ad iḥuss belli yeṣleḥ yerna teεna-t ţṛebga n llufan-nwen.

Adlis Iqedsen inna-d: “Kwenwi [...], ay irgazen, lḥut s leεqel i tlawin-nwen.” (1 Buṭrus 3:7) Ay ababat, steεṛef belli tameṭṭut-ik aţ-ţefk amur ameqran si lǧehd-is i llufan-nwen. Imi tesεa lecɣal ijdiden ara tqabel, tezmer aţ-ţetqelleq, aţ-ţeεyu neɣ aţ-ţefcel maḍi. Tikwal, tezmer ahat a d-terr fell-ak zzεaf-is, lameεna qqim tetheddneḍ, axaṭer “win ẓẓayen i reffu xiṛ n lefḥel.” (Lemtul 16:32) Tεeqqel yerna ţţak-as lemεawna i teḥwaǧ.—Lemtul 14:29.

AYEN I TZEMREḌ AŢ-ŢXEDMEḌ:

  • Ay ababat: Σiwen tameṭṭut-ik a d-telhi d llufan-nwen, ula deg yiḍ. Ḥudd-ed tilisa i lweqt i tesεeddayeḍ di leḥwayeǧ nniḍen iwakken a d-tessigreḍ akteṛ n lweqt ara tesεeddiḍ ţ-ţmeṭṭut-ik d llufan-ik

  • A tayemmaţ: M’ara yebɣu wergaz-im a kem-iεiwen di ccɣel yeεnan llufan-nwen, ur ţţagi ara. Ma yella ur iwenneε ara ccɣel-nni, ur t-ţlummu ara, meεna mel-as s leεqel amek ara yexdem

 2 SSEǦHDET ZZWAǦ-NWEN

AYEN I D-IQQAR WEDLIS IQEDSEN: “Ad uɣalen d yiwet n lǧeţţa.” (Laṣel n ddunit 2:24) Γas ma yella tewseε twacult-nwen, ur ilaq ara aţ-ţeţţum belli kečč ţ-ţmeṭṭut-ik d “yiwet n lǧeţţa” i tellam. Xedmet ayen akk iwumi i tzemrem akken aţ-ţeqqim lεalaqa-nwen teǧhed.

Kemm, a tameṭṭut, cekkeṛ argaz-im imi ibedd ɣur-em yerna yeţεawan-ikem. Ayagi a s-yili “d ddwa.” (Lemtul 12:18) Kečč, ay argaz, qqar-as i tmeṭṭut-ik acḥal i ţ-tḥemmleḍ d wacḥal i k-teεǧeb. Cekkeṛ-iţ ɣef wamek i tbedd ɣer twacult.—Lemtul 31:10, 28.

“Ur ţnadit ara ɣef nnfeε-nwen kan kunwi, meεna nadit ɣef nnfeε n wiyaḍ.” (1 Ikurintiyen 10:24, Awal n tudert, 2001) Xeddem dima ayen yellan d lεali-t i tmeṭṭut-ik. Heddṛet gar-awen, yerna wa ad icekkeṛ wa, wa ad iḥess i wa. Deg wayen yeεnan lεalaqat-nwen deg wusu, ur ţxemmim ara kan ɣef yiman-ik. Mkul yiwen ad iḥebbeṛ i wayen yeḥwaǧ wayeḍ deg wannect-a. Adlis Iqedsen yenna-d: “Wa ur iţḥeṛṛim wa, siwa ma temtafaqem.” (1 Ikurintiyen 7:3-5) Ihi, heddṛet εinani kečč ţ-ţmeṭṭut-ik ɣef temsalt-agi. Ma telliḍ d win iṣebbren yerna tfehhmeḍ tameṭṭut-ik, aţ-ţesseǧhdeḍ zzwaǧ-nwen.

AYEN I TZEMREḌ AŢ-ŢXEDMEḌ:

  • Σzel-ed lweqt ara tesεeddiḍ ţ-ţmeṭṭut-ik di sin yid-wen kan

  • Sbeggen-as-d belli tḥemmleḍ-ţ, ɣas s leḥwayeǧ timecṭaḥ. Di lemtel, aru-yas kra n imeslayen neɣ efk-as lḥaǧa

 3 SSELMDET LLUFAN-NWEN

AYEN I D-IQQAR WEDLIS IQEDSEN: “Seg wasmi i meẓẓiyeḍ, tessneḍ tira iqedsen; zemrent a k-fkent lekyasa yeţţawin ɣer leslak.” (2 Timutawus 3:15) Meyyzet d acu ara txedmem akken aţ-ţesselmdem llufan-nwen. Llufan yesεa tazmert akken ad yelmed xilla n leḥwayeǧ ula mi gella di tεebbuṭ n yemma-s. Uqbel akk a d-ilal, yella iεeqqel yakan taɣect-nwen yerna iţţarra-d s lexbaṛ i wayen i teţḥussum. Qqaret-as tiktabin segmi ara yili d aleqqaq. Γas m’ur ifhim ara ayen i s-teqqarem, yezmer lḥal a s-teεǧeb leqraya m’ara yimɣur.

Ur ḥeţţbet ara belli llufan-nwen bezzaf meẓẓi bac a s-thedṛem ɣef Ṛebbi. Ţẓallat i Yahwa yid-es s taɣect εlayen. (Asmekti 11:19) Ula m’ara tleεεbem yid-es, heddṛet-as ɣef leḥwayeǧ i gexdem Ṛebbi. (Ahellil 78:3, 4) M’ara yeţţimɣur, ad iḥuss i leḥmala i tḥemmlem Yahwa w’a t-iḥemmel ula d neţţa.

AYEN I TZEMREḌ AŢ-ŢXEDMEḌ:

  • Ḍleb i Ṛebbi a k-d-yefk lekyasa i gwulmen bac aţ-ţesselmdeḍ llufan-ik

  • Ţεawad-as-d i llufan-ik tiktiwin (ixemmimen) akk-d imeslayen yesεan azal akken a ten-yissin si temẓi