Yella wasmi i k-​d-​yenna walbeεḍ yiwen n sser, yeεni lḥaǧa ur ilaq ara aţ-​ţεiwdeḍ?— * Adlis Iqedsen iheddeṛ-​ed ɣef yiwen n “sser” i d-​yusan sɣur Ṛebbi. Sser-​agi yemxallaf akk ɣef wiyaḍ. Iţţusemma “sser” axaṭer ur llin ara ssnen-​t medden. Ula d lmuluk (lmalayekkat) llan ţqelliben a t-​issinen. Tebɣiḍ aţ-​ţeẓreḍ d acu-​t sser-​agi?—

Acu i llan ţqelliben lmuluk a t-​issinen?

Xilla n lweqt aya, Ṛebbi ixleq-​ed argaz amezwaru akk-​d tmeṭṭut tamezwarut. Argaz-​nni isem-​is Adam, ma ţ-​ţameṭṭut-​nni Ḥewwa. Ṛebbi yefka-​yasen yiwen wemkan icebḥen mliḥ bac ad zedɣen deg-​s. Amkan-​agi isem-​is leǧnan (tibḥirt) n Σidin. Lukan uɣen awal Adam d Ḥewwa i Ṛebbi, tili nutni d warraw-​nsen rran lqaεa kamel d lǧennet am leǧnan-​agi; tili εacen di Lǧennet i dima. Meεna, tecfiḍ d acu i xedmen Adam d Ḥewwa?—

Adam d Ḥewwa ur uɣen ara awal i Ṛebbi. Γef wayagi ur nelli ara ass-​a di lǧennet. Acu kan, Ṛebbi yewεed belli yiwen wass lqaεa meṛṛa aţ-​ţuɣal tecbeḥ, yerna lεibad akken ma llan ad εicen deg-​s i dima yerna ad ilin feṛḥen. Amek ara yexdem annect-​a? Lɣaci qqimen aṭas n lweqt ur ẓrin ara amek. Ayagi yella d sser.

Mi d-​yusa Σisa ɣer lqaεa, yebda yessefham-​asen sser-​agi i lɣaci. Yenna-​yasen belli sser-​agi iheddeṛ-​ed ɣef Tgelda n Ṛebbi. Iḍleb-​asen ad ţẓallan iwakken a d-​tas Tgelda-​yagi. Tagelda-​ya aţ-​ţerr lqaεa d lǧennet icebḥen.

Iεǧeb-​ak lḥal imi tessneḍ sser-​agi?— Cfu belli siwa wid yeţţaɣen awal i Yahwa ara iεicen di Lǧennet. Adlis Iqedsen yeḥka-​d aṭas n teqsiḍin ɣef yergazen akk-​d tlawin i guɣen awal i Yahwa. Tebɣiḍ aţ-​ţissineḍ tiḥkayin-​agi fell-​asen?— Eyya-​d ihi a d-​nehdeṛ ɣef kra seg-​sen w’a nẓer amek i nezmer a ten-​nεaned.

^ § 3 Di tezmamt-​a meṛṛa, m’ara twaliḍ ajerriḍ-​agi (—) mbeεd asteqsi, ḥbes iwakken aţ-​ţeǧǧeḍ mmi-​k (neɣ yelli-​k) a d-​yerr leǧwab.