Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Sselmdet arraw-​nwen

 TIMEΓRI 6

Dawed ur yelli ara yeţţagad

Dawed ur yelli ara yeţţagad

D acu i txeddmeḍ m’ara tagadeḍ?— Ahat tessawaleḍ i baba-​k neɣ i yemma-​k. Lameεna yella daɣen ḥedd nniḍen iwumi tzemreḍ aţ-​ţessiwleḍ a k-​iεiwen; yerna ulac win iǧehden am neţţa. Teẓriḍ anwa-​t?— Ih, d Yahwa. A d-​nehdeṛ ɣef yiwen iɣef i d-​iţmeslay Wedlis Iqedsen; isem-​is Dawed. Dawed ur yelli ara yeţţagad axaṭer yeẓra belli Yahwa a t-​iεiwen di mkul liḥala.

Baba-​s d yemma-​s n Dawed bdan sseḥfaḍen-​as ad iḥemmel Yahwa seg wasmi i gella d llufan (ṣṣebyan). Annect-​a iεawen-​it akken ur iţţagad ara ɣas ma ḍrant-​as-​d leḥwayeǧ iweεṛen. Dawed yeẓra belli Yahwa d Aḥbib-​is, yeẓra a t-​iεiwen. Asmi yella d ilemẓi, yiwen wass iṛuḥ ad yeks (yeṭwi) lmal; ataya yusa-​d yizem annect-​ila-​t, yeṭṭef-​ed s uxenfuc-​is yiwen ikerri! Teẓriḍ d acu i gexdem Dawed? Itbeε izem-​nni yerna yenɣa-​t. Izmer lḥal yexdem ayagi s ifassen-​is kan! Tikkelt nniḍen, d ursel i d-​iffɣen ɣer lmal-​is; Dawed yenɣa ula d ursel-​nni! Ar ɣur-​ek, anwa i gεawnen Dawed?— Anεam ih, d Yahwa.

Tella daɣen tikkelt nniḍen anda ur yugad ara Dawed: asm’akken i xedmen wat Isṛayil lgirra nutni d yiwen n cceεb iwumi qqaren Ifilistiyen. Yiwen si lεeskeṛ-​nni n Ifilistiyen yella annect-​ila-​t, d lɣul! Isem-​is Gulyat. Lɣul-​agi yeţmesxiṛ ɣef lεeskeṛ n wat Isṛayil akk-​d Yahwa. Iqqar-​asen: “Win izemren deg-​wen a d-​yas ad innaɣ yid-​i.” Lameεna, At Isṛayil meṛṛa ugaden-​t. Mi gesla Dawed i lhedṛa-​nni, inna-​yas i Gulyat: “D nekk ara yennaɣen yid-​ek! Yahwa a y-​iεiwen, uyerna a k-ɣelbeɣ!” Acu i tenniḍ, Dawed yugad?— D ṣṣeḥ, ur yugad ara maḍi. Tebɣiḍ aţ-​ţeẓreḍ amek i teţkemmil teḥkayt-​agi?

Dawed iddem-​ed ildi-​ines akk-​d xemsa yeblaḍen ileggaɣen, iṛuḥ ad innaɣ neţţa akk-​d lɣul-​nni. Mi gwala Gulyat belli Dawed d ilemẓi, yuɣal a yeţmesxiṛ fell-​as. Meεna Dawed inna-​yas: “Kečč, tusiḍ-​d ɣur-​i s ujenwi, ma d nekk, usiɣ-​d ɣur-​ek s yisem n Yahwa!” Ihi, iger yiwen weblaḍ ɣer yildi-​ines, yuzzel  ɣer Gulyat, yewwet-​it. Ablaḍ-​nni yezga-​yas-​d swaswa ger wallen, dɣa yeɣli ɣer lqaεa, yemmut! Ifilistiyen-​nni rewlen akken ma llan axaṭer ugaden. Amek i gessaweḍ Dawed, yellan d ilemẓi, ad yeɣleb lɣul?— D Yahwa i t-​iεawnen; Yahwa iǧhed akteṛ n lɣul-​agi!

Dawed ur yugad ara axaṭer yeẓra belli Yahwa a t-​iεiwen.

Acu i d-​tḥefḍeḍ si teqsiṭ n Dawed?— Taqsiṭ-​agi tesseḥfeḍ-​ak belli ulac win iǧehden am Yahwa. Uyerna Yahwa d Aḥbib-​ik. Ihi, abrid nniḍen m’ara tagadeḍ, mmekti-​d belli Yahwa izmer a k-​iεiwen aţ-​ţɣelbeḍ lxuf-​inek!

ΓER-​ED DEG WEDLIS IQEDSEN