Eyya-​d a nissin yiwen ilemẓi i d-​isellken xali-​s si lmut. Xali-​s-​agi d amceggeε Bulus. Ur nessin ara isem n weqcic-​agi, meεna neẓra belli yexdem yiwet n lḥaǧa swayes i d-​iban belli ur yeţţagad ara. Tebɣiḍ aţ-​ţissineḍ taqsiṭ-​is?—

Bulus yella di lḥebs di Yarucalim. Ssekcmen-​t ɣer lḥebs axaṭer iheddeṛ i medden ɣef Σisa. Kra n yemcumen keṛhen-​t, dɣa msefhamen amek ara t-​nɣen; nnan: “A neḍleb i lḥakem n lεeskeṛ a sen-​yini i lεeskeṛ-​is a d-​awin Bulus ɣer wexxam n ccṛeε. Nekni a neffer rrif n webrid, akka, m’ara d-​iεeddi Bulus a t-​nneɣ!”

Ayyaw n Bulus yehdeṛ i Bulus akk-​d lḥakem n lεeskeṛ ɣef wayen iɣef i msefhamen yemcumen-​nni.

Ayyaw (mmi-​s n weltma-​s) n Bulus yewweḍ-​it lexbaṛ. D acu i gexdem? Iṛuḥ ɣer lḥebs-​nni dɣa yeḥka-​yas kulci i xali-​s. Din din, Bulus inna-​yas ad yessiweḍ lexbaṛ i lḥakem n lεeskeṛ. Σlaḥsab-​ik, ishel-​as lḥal i wayyaw n Bulus ad yehdeṛ i lḥakem-​agi?— Ala, axaṭer lḥakem n lεeskeṛ yesεa lqima tameqrant. Meεna, ayyaw n Bulus ur yugad ara, iṛuḥ a s-​yehdeṛ.

Lḥakem-​nni yeẓra swaswa d acu ara yexdem. Isnejmaε-​ed waḥed akka 500 yeεsekṛiwen ara iεassen ɣef Bulus w’a t-​awin deg yiḍ-​nni ɣer temdint n Qiṣarya. Bulus yemneε si lmut?— Ih, ur ssawḍen ara yemcumen-​nni a t-​id-​ṭṭfen; ur ssawḍen ara ad xedmen ayen akken iɣef i msefhamen.

Acu i d-​tḥefḍeḍ si teqsiṭ-​agi?— Ula d kečč, tzemreḍ aţ-​ţiliḍ d win ur neţţagad ara am wayyaw n Bulus. Ur ilaq ara a neţţagad m’ara nheddeṛ ɣef Yahwa i wiyaḍ. I kečč, ur teţţagadeḍ ara aţ-​ţhedṛeḍ ɣef Yahwa?— M’ur tugadeḍ ara, ahat a d-​tsellkeḍ albeεḍ si lmut.