Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Sselmdet arraw-​nwen

 TIMEΓRI 5

Camwil iqqim dima ixeddem ayen yelhan

Camwil iqqim dima ixeddem ayen yelhan

Seg wasmi i gella Camwil d amecṭuḥ, neţţa yezdeɣ deg uqiḍun imqeddes yerna ixeddem dinna. Aqiḍun imqeddes d amkan-​nni iɣer i ţṛuḥun lɣaci akken ad εebden Yahwa. Teẓriḍ ayɣer i gṛuḥ Camwil ɣer uqiḍun-​agi imqeddes? A d-​nemmeslay qbel ɣef yemma-​s, iwumi qqaren Ḥana.

Acḥal d iseggasen, Ḥana tebɣa a d-​tesεu dderya, meεna ur tezmir ara. Teẓẓull-​as i Yahwa, tḥellel-​it akken a ţ-​iεiwen. Tewεed-​as belli ma tesεa-​d aqcic, a t-​tawi ad yezdeɣ deg uqiḍun imqeddes yerna ad yexdem dinna. Yahwa yerra-​yas-​d leǧwab i tẓallit-​is. Tesεa-​d aqcic, tsemma-​yas Camwil. Texdem swaswa akken i s-​tenna i Yahwa: Asmi i gesεa Camwil telt snin neɣ ṛbeε snin di leεmeṛ-​is, tewwi-​t ɣer uqiḍun imqeddes akken ad yeqdec ɣef Ṛebbi.

Deg uqiḍun imqeddes, d Σili i gellan d lmuqeddem ameqran. Sin warraw-​is daɣen llan xeddmen dinna. Imi aqiḍun imqeddes d amkan ideg i εebbden Ṛebbi, ilaq-​asen i lɣaci ad xeddmen dinna leḥwayeǧ kan i gelhan. Meεna, arraw n Σili llan xeddmen leḥwayeǧ n diri. Yerna Camwil yeţwali-​ten. Eεni iεuned-​iten?— Ala, Camwil iqqim dima ixeddem ayen i gelhan, akken i s-​t-​sseḥfḍen baba-​s d yemma-​s.

Ar ɣur-​ek, acu i glaq a t-​yexdem Σili i sin warraw-​nni-​ines?— Ilaq a ten-​iεaqeb, ur ten-​yeţţaǧǧa ara ad kemmlen lxedma deg wexxam-​agi n Ṛebbi. Lameεna, neţţa ur sen-​yexdim acemma. Γef wayagi i gezεef Yahwa fell-​as akk-​d sin warraw-​is. Yeqsed a ten-​iεaqeb.

Camwil issaweḍ i Σili lexbaṛ i s-​d-​ifka Yahwa.

Yiwen yiḍ, mi gella Camwil yeṭṭeṣ (igen), yesla i walbeεḍ yessawel-​as-​d: “A Camwil!” Camwil iṭṭef-​iţ ţ-​ţazzla ɣer Σili, lameεna Σili inna-​yas-​d: “Ur k-​d-​ssawleɣ ara.” Teḍra-​d akken sin iberdan. Tikkelt tis tlata, Σili inna-​yas i Camwil belli ma iεawed yesla i ṣṣut-​nni, a s-​yini:  “A Yahwa, hdeṛ di leεnaya-​k, aql-​i a k-​d-​ţḥessiseɣ.” Camwil ixdem akkenni. Dɣa Yahwa ihdeṛ-​as-​d, inna-​yas-​d: “Ṛuḥ ɣer Σili, ini-​yas belli ad εaqbeɣ axxam-​is ɣef leḥwayeǧ-​nni n diri i xedmen.” Eεni ishel-​as i Camwil a s-​yawi lexbaṛ-​agi i Σili?— Ala, iwεeṛ-​as lḥal. Lameεna, Camwil yuɣ-​as awal i Yahwa ɣas akken yugad. Ayen i d-​inna Yahwa yeḍra-​d: Arraw n Σili mmuten di sin, yerna ula d Σili yemmut.

Camwil d lemtel n lεali i nekni, axaṭer ixdem ayen i gelhan ula d asmi i geţwali wiyaḍ xeddmen ayen n diri. I keččini? Aţ-​ţεandeḍ Camwil w’aţ-​ţxeddmeḍ ayen yelhan? Ma txedmeḍ akka, aţ-​ţessefṛḥeḍ Yahwa w’aţ-​ţessefṛḥeḍ baba-​k d yemma-​k.

ΓER-​ED DEG WEDLIS IQEDSEN