Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Liman n ṣṣeḥ d abrid yessufuɣen ɣer sseεd

 AḤRIC WIS 5

Ṣṣifat itεeddan n Ṛebbi

Ṣṣifat itεeddan n Ṛebbi

DI TIRA IQEDSEN neţţaf aṭas n ṣṣifat ifazen n Ṛebbi i ɣ-iţεawanen a t-nissin. Di lemtel, heddṛent-ed ɣef ṛebεa n ṣṣifat-is timeqranin: tazmert, lḥeqq, lekyasa d leḥmala. A d-nehdeṛ tura ɣef mkul yiwet seg-sent.

Ṛebbi yesεa tazmert mebla tilas

Ṛebbi d Bab n Tezmert

Yahwa yenna i Abṛaham: “Nekk, d Ṛebbi Bab n Tezmert.” (Laṣel n ddunit 17:1) Ulac akk win yesεan tazmert-is. Yerna tazmert-agi ur tesεi tilisa ur tesεi taggara. S lqewwa-s ixleq-ed igenwan d lqaεa.

D lmuḥal ad yessexdem Ṛebbi tazmert-is bla ṛṛzina. M’ara ţ-issexdam, iḥekkem deg yiman-is yerna ur ţ-issexdam ara bla lmeqsud. Asexdem i ţ-yessexdam icudd s lekmal ɣer lḥeqq-is, lekyasa-s d leḥmala-s.

Yahwa yessexdam tazmert-is mebla cceḥḥa i nnfeε n iqeddacen-is unṣiḥen. “Allen-is ţezzint ɣef lqaεa meṛṛa iwakken a d-ibeggen tazmert-is i wid i t-iḥemmlen s wul ikemlen.” (2 Amezruy 16:9) Ur tebɣiḍ ara aţ-ţqerrbeḍ ɣer Ṛebbi-yagi bu tezmert, meεna yesεan leḥmala?

Ṛebbi d aḥeqqi

“Yahwa iḥemmel lḥeqq.” (Ahellil 37:28) Ixeddem dima ayen yellan d lḥeqq εlaḥsab n leqwanen-is ikemlen.

Ṛebbi ur ixeddem ara lxilaf ger yemdanen

Ṛebbi yekṛeh lbaṭel. D win “ur nxeddem ara lxilaf ger yemdanen yerna ur nqebbel ara tajεelt.” (Asmekti 10:17) Yeţxaṣam wid iţqehhiren wiyaḍ yerna yeţεawan wid ur nezmir ara, gar-asen tuǧǧal d igujilen. (Tuffɣa 22:22) Ur yeţḥasab ula d yiwen ɣef liǧal n ccetla-s. “Sidi Ṛebbi ur ixeddem ara lxilaf ger yemdanen. Lameεna di mkul lǧens, yal amdan i t-yeţḍuεun, ixeddmen ayen yellan d lḥeqq, iεǧeb-as i Ṛebbi.”Lecɣal 10:34, 35.

Lḥeqq n Yahwa yeṛzen s lekmal: ur yeţmal ɣer yiwen yidis wala ɣer wayeḍ. D lmuḥal ad isemmeḥ mebla ssebba yerna d lmuḥal ad yili d win iweεṛen s waṭas. Iţεaqab wid ur neţţendemmay ara di cceṛ i xeddmen, meεna yeţbeggin-ed ṛṛeḥma ḥninen i wid yeţbeddilen tikli. “Yahwa yesεa ṛṛeḥma d lemɣiḍa, ẓẓay i reffu yerna yeččuṛ wul-is d lḥanna. Ur yeţlummu ara i lebda yerna ur yeţţaṭṭaf ara cceḥna i dima. Ur ɣ-yelḥi ara swakken llan ddnubat-nneɣ; ur ɣ-ixelleṣ ara swakken nuklal, εlaḥsab n lɣelṭat-nneɣ.” (Ahellil 103:8-10) Lameεna mačči d ayagi kan, Ṛebbi iceffu ula ɣef lecɣal i xeddmen iqeddacen-is s nnṣaḥa yerna yeţǧazi-ten. Ṛebbi yesεan lḥeqq am wagi, ur k-yeţţawi ara aţ-ţţekleḍ fell-as?

 Ṛebbi d bu lekyasa

Lekyasa n Ṛebbi tban-ed di Tira Iqedsen

Yahwa d Lεinṣer n mkul lekyasa. “Acḥal lqayit, acḥal meqqṛit leεqel ţ-ţmusni n Sidi Ṛebbi!” (At Ṛuma 11:33) Lekyasa-s ur tesεi ara tilisa yerna ulac ayen uɣur i nezmer a ţ-nmettel.

Lekyasa n Ṛebbi teţban-ed εinani di txelqit. Win yuran Ahellil wis 104 yenna-d deg wafir 24: “Acḥal i ketṛen lecɣal-ik, a Yahwa! Txedmeḍ-ten meṛṛa s lekyasa.”

Lekyasa n Ṛebbi teţban-ed diɣen di Tira Iqedsen. Yura Dawed, yiwen ugellid n Isṛayil n zzman aqdim: “Asmekti n Yahwa d win iɣef i nezmer a neţkel, yeţţarra d ukyis win ur nessin ara.” (Ahellil 19:7) Twalaḍ! Tzemreḍ aţ-ţesfaydiḍ s lekyasa n Ṛebbi ur nesεi tilisa! D ayen ara txedmeḍ?

Ṛebbi d leḥmala

Ṣṣifa yakk tameqrant n Ṛebbi d leḥmala. Tira Iqedsen qqarent-aɣ-d belli “Ṛebbi d leḥmala.” (1 Yuḥenna 4:16) D leḥmala i geţdemmiren yerna i geţwellihen ayen akk i gxeddem.

 Yahwa yesskanay-aɣ-d deg waṭas n tɣawsiwin belli iḥemmel-aɣ. Yeţţak-aɣ-d leḥwayeǧ n lεali. “Neţţa yeţbeggin-ed iman-is s lxiṛat i gxeddem: d neţţa i wen-d-iţţaken ageffur (lehwa), d neţţa i wen-d-iţţaken lɣellat di lweqt-nsent, d neţţa daɣen i wen-d-iţakken tamεict-nwen, ula d ulawen-nwen d neţţa i ten-issefṛaḥen.” (Lecɣal 14:17) D ṣṣeḥ, “kra n tikci yelhan teţţas-ed seg igenwan, s ɣuṛ [...] Ṛebbi i d-ixelqen tafat n igenwan.” (Yeεqub 1:17) Tira Iqedsen ţ-ţikci ɣlayen i d-yekkan sɣur Ṛebbi. S Tira-yagi, Ṛebbi yesselmad-aɣ leqwanen-is akk-d imenzayen-is (lumuṛ-is) yeččuṛen d leḥmala yerna yesselmad-aɣ tideţ fell-as. Σisa yenna-d deg yiwet n tẓallit: “D awal-ik i ţ-ţideţ.”Yuḥenna 17:17.

Lekyasa n Ṛebbi i d-iţbanen di txelqit teţţawi-yaɣ a nesεu leqder

Ṛebbi iţεawan-aɣ diɣen akken a neɣleb uguren-nneɣ. “Ḍegger taεkemt-ik ger ifassen n Yahwa s yiman-is, neţţa a k-iεiwen. D lmuḥal ad yeǧǧ aḥeqqi ad imdeṛkal.” (Ahellil 55:22) Yeţsamaḥ ddnubat-nneɣ. “Kečč a Yahwa, telhiḍ yerna tweǧdeḍ i ssmaḥ; yeččuṛ wul-ik d lḥanna ɣer wid ineddhen ɣur-ek.” (Ahellil 86:5) Yeţţak-aɣ ula ţ-ţudert n dayem. “A sen-yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ.” (Aweḥḥi 21:4) Γer wacu ara k-tdemmer leḥmala n Ṛebbi? A t-tḥemmleḍ ula d keččini?

Qerreb ɣer Ṛebbi

Ma teţẓallaḍ yerna teţmeyyizeḍ ɣef ṣṣifat n Ṛebbi, ayagi a k-isseqreb ɣur-es

Ṛebbi yebɣa a t-nissin mliḥ. Atah wamek i ɣ-yenha Wawal-is: “Qeṛṛbet ɣer Sidi Ṛebbi, neţţa a d-iqeṛṛeb ɣuṛ-wen.” (Yeεqub 4:8) Yahwa yessawel-as i nnbi Abṛaham yellan d unṣiḥ “aḥbib-iw.” (Icεaya 41:8) Yebɣa aţ-ţiliḍ d aḥbib-is ula d keččini.

Skud teţţissineḍ Ṛebbi, skud aţ-ţḥusseḍ tqerbeḍ ɣur-es yerna aţ-ţafeḍ lfeṛḥ. “D aseεdi wemdan” iwumi “yella lfeṛḥ-is di ccariεa n Yahwa, di ccariεa-ines yeqqar s leεqel am yiḍ am wass.” (Ahellil 1:1, 2) Kemmel ihi taɣuri n Tira Iqedsen. Meyyez ɣef ṣṣifat d lecɣal n Ṛebbi. A s-tessekneḍ tḥemmleḍ-t m’ara tessexdameḍ ayen i tḥeffḍeḍ. “Ma nḥemmel Sidi Ṛebbi ilaq a neḥrez lumuṛat-is; lumuṛat-is ur ẓẓayit ara.” (1 Yuḥenna 5:3) Am ugellid Dawed, ḍleb ihi i Ṛebbi di tẓallit: “Mel-iyi iberdan-ik, a Yahwa! Sɣer-iyi tizribin-ik. Sselḥu-yi di tideţ-ik.” (Ahellil 25:4, 5) Aţ-ţwaliḍ belli Ṛebbi d win “ur nebεid ara ɣef mkul yiwen deg-nneɣ.”Lecɣal 17:27.