Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Liman n ṣṣeḥ d abrid yessufuɣen ɣer sseεd

 AḤRIC WIS 3

Lewṣayat ara iwennεen tudert-nneɣ

Lewṣayat ara iwennεen tudert-nneɣ

XAYEL! Atan yusa-d yiwen n ṭṭbib ad ixdem ɣer tama n wexxam-ik. Di tazwara, ahat aţ-ţkukruḍ aţ-ţṛuḥeḍ ɣur-es. Lameεna kra si leḥbab-ik ṛuḥen a t-id-ẓren, dɣa simma simma tlehhu ṣṣeḥḥa-nsen. Ur k-yeţţawi ara wannect-a aţ-ţebɣuḍ aţ-ţṛuḥeḍ ɣur-es akken k-iǧewwez (k-iẓer)?

Tira Iqedsen amzun cubant ṭṭbib-agi. Kra n lεibad ţkukrun a tent-ssenqden. Lameεna m’ara ssexdamen lewṣayat-nsent, simma simma tlehhu tudert-nsen. Atnah kra n lemtul:

Tifrat n ccwal di zzwaǧ

Sumiatun teḥka-d: “Di lewqat imezwura ideg i zewǧeɣ, ḥusseɣ am wakken argaz-iw, Dumas, ur d-iţţelhay ara deg-i. Imi yeqber wul-iw, acḥal n tikkal ţsuɣuɣ fell-as, ṭṭeggireɣ dduzan fell-as, yerna kkateɣ-t ula ţ-ţiyita. Tikwal ddemmaṛ issawaḍ-iyi armi xessfeɣ (fessxeɣ).

“Asmi i yebda wergaz-iw leqraya n Tira Iqedsen, ţmesxiṛeɣ fell-as. Lameεna, smeḥsiseɣ-d s tuffra si texxamt i d-iqerben tin ideg yeqqar. Yiwen wass, sliɣ i yefyar-agi: ‘A tilawin, ḍuεemt irgazen-nkunt am akken i glaq aţ-ţḍuεemt Sidi Ṛebbi! [...] tameṭṭut ilaq aţ-ţqadeṛ argaz-is.’ (At Ifasus 5:22, 33) Imeslayen-a kecmen ɣer wul-iw. Ḍelbeɣ ssmaḥ i Ṛebbi imi qehreɣ argaz-iw yerna dεiɣ ɣur-es akken a yi-iεiwen ad uɣaleɣ ţ-ţameṭṭut yifen tin i lliɣ zik. Iεedda cwiṭ n lweqt, nekk d wergaz-iw nebda lwaḥid leqraya n Tira Iqedsen.”

Dumas d Sumiatun

Yura diɣen di Tira Iqedsen: “Irgazen ilaq ad ḥemmlen tilawin-nsen am lǧeţţat-nsen.” (At Ifasus 5:28) Sumiatun tenna-d: “Ayen i neḥfeḍ deg Wawal n Ṛebbi ibeddel-aɣ di sin. Tura uɣeɣ tannumi ţţawiɣ afenǧal n llatay i wergaz-iw m’ara d-ikcem si lxedma yerna heddṛeɣ-as s leḥnana. Ma d neţţa yesbeggin-iyi-d akteṛ leḥmala-s yerna yeţεawan-iyi di ccɣel n wexxam. Nexdem lmeǧhud akken a ‘nili d iḥninen w’a nemsamaḥ wway gar-aneɣ.’ (At Ifasus 4:32) Daɣneţţa, leqder d leḥmala i nesεa wway gar-aneɣ simma ţnernin. Tura, 40 iseggasen ayagi seg wasmi i nella d iseεdiyen di zzwaǧ. Lewṣayat tukyisin n Wawal n Ṛebbi ḥurbent ɣef zzwaǧ-nneɣ.”

 A nqeṭṭeb (neḥkem) zzεaf

Tayib yenna-d: “Zik, lliɣ d aqehhar. Zgiɣ ţekkiɣ deg ubunyiw. Acḥal d abrid ţgallaɣ deg wiyaḍ s tmeẓyant, yerna kkateɣ tameṭṭut-iw Kustriyah. Ssawaḍeɣ-ţ ula ɣer lqaεa m’ara zeεfeɣ. Lɣaci ţţagaden-iyi.

Kustriyah d Tayib ţẓallan lwaḥid mkul m’ara d-yeɣli yiḍ

“Yiwen wass, ɣriɣ imeslayen-agi i d-inna Σisa: ‘A wen-d-fkeɣ yiwen n lameṛ d ajdid: “myeḥmalet wway gar-awen akken i kkun-ḥemmleɣ.”’ (Yuḥenna 13:34) Lehduṛ-agi kecmen mliḥ s ul-iw, dɣa qesdeɣ ad beddleɣ tikli. M’ara ţḥussuɣ iţţali-yi-d zzεaf, deεεuɣ ɣer Ṛebbi akken a yi-iεiwen ad thenniɣ, dɣa zzεaf-iw ur iţεeṭṭil ara iţekkes-iyi. Nekk ţ-ţmeṭṭut-iw nessexdem di tudert-nneɣ lewṣaya yuran deg wat Ifasus 4:26, 27: ‘Ilaq a wen-yekkes wurrif uqbel ad yeɣli yiṭij; ur ţţaǧat ara abrid i Cciṭan.’ Neɣra Tira Iqedsen yerna neẓẓull lwaḥid mkul m’ara d-yeɣli yiḍ. Annect-a yesṛuḥ lḥerṣ i neţmager deg wass yerna yesseǧhed lεalaqat-nneɣ.

“Tura lɣaci ḥesben-iyi d argaz amhenni. Tameṭṭut-iw d warraw-iw ḥemmlen-iyi yerna ţqadaren-iyi. Sεiɣ aṭas n leḥbab yerna ḥusseɣ qerbeɣ ɣer Ṛebbi. Feṛḥeɣ s ṣṣeḥ.”

A nwexxeṛ i dduxxan, i tissit n ccṛab neɣ i lkif

Goin

Goin yeḥka-d: “Zik, ţmenṭareɣ nekk d yiwet n terbaεt n yelmeẓyen. Ţkeyyifeɣ aṭas dduxxan, yerna mačči tikkelt mačči snat ideg i ṭṭṣeɣ di beṛṛa, sekṛeɣ maḍi. Tesseɣ yerna znuzuyeɣ n lkif i ţeffreɣ zdaxel n tebluzt-iw yeţqerriεen tirṣaṣin. Γas akken ţţarraɣ iman-iw weεṛeɣ, ɣer daxel tezga tezdeɣ-iyi tugdi.

“Umbeεd, yella win i yi-d-isseknen afir-agi: ‘A mmi, ur teţţu ara lqanun-iw [...] axaṭer teɣzi n leεmeṛ, iseggasen n tudert akk-d lehna a k-ţţunefken s zzyada.’ (Lemtul 3:1, 2) Teɣzi n leεmeṛ  ţ-ţemεict n lehna, d ayen swaswa i ţnadiɣ! Γriɣ diɣen: ‘A wid eεzizen, imi i ɣ-d-ţţunefkent lemεahdat-agi, ilaq a nessizdeg iman-nneɣ seg wayen akk issenǧasen lǧeţţa-nneɣ akk-d wulawen-nneɣ iwakken a nkemmel tezdeg n tikli-nneɣ akk-d Sidi Ṛebbi, s ṭṭaεa d wannuz.’ (2 At Kurintus 7:1) Ihi, ḥebseɣ tissit n dduxxan, n ccṛab d lkif, ǧǧiɣ tarbaεt-nni ukud i ţdukkuleɣ yerna uɣaleɣ d aqeddac n Ṛebbi.

“Tura 17 iseggasen ayagi seg wasmi i ttaxxṛeɣ i tissit n dduxxan, n ccṛab d lkif. Sεiɣ ṣṣeḥḥa n lεali, leḥbab yelhan, tawacult-iw tella di sseεd yerna ithenna lxaṭer-iw. Ideg ara ţţexnunuseɣ d asekṛani deg iberdan, sεeddayeɣ uḍan meṛṛa deg wusu-inu.”

A neɣleb kaṛuh n ccetlat nniḍen

Bambang yeḥka-d: “Asmi i lliɣ d ilemẓi, ffɣeɣ i iberdan. Amur ameqran seg wigad i ḥeqreɣ kkan-d seg yiwen wedrum i keṛheɣ nezzeh.

“Lameεna, iεedda kra n lweqt, bdiɣ ţqellibeɣ ɣef Ṛebbi. Ayagi yewwi-yi ɣer yiwet n terbaεt i geţnejmaεen akken ad ɣren Tira Iqedsen. Deg inejmuεen-nsen, kra seg wedrum-nni i keṛheɣ steṛḥben yis-i. Yerna walaɣ belli aṭas n ccetlat i geţţemlilin di lehna d lfeṛḥ deg inejmuεen-nsen. Ggummeɣ ad amneɣ! Imiren-nni i fehmeɣ afir i d-iqqaren: ‘Sidi Ṛebbi ur ixeddem ara lxilaf ger yemdanen. Lameεna di mkul lǧens, yal amdan i t-yeţḍuεun, ixeddmen ayen yellan d lḥeqq, iεǧeb-as i Ṛebbi.’Lecɣal 10:34, 35.

“Tura, lkeṛh n ccetlat nniḍen ur yeqqaz ara deg wul-iw am ssem. Kra seg yeḥbiben-iw imeqranen kkan-d seg wedrum-nni i keṛheɣ zik. S Tira Iqedsen, Ṛebbi isselmed-iyi ad ḥemmleɣ.”

Tura, Bambang yefṛeḥ imi yeţεacaṛ lεibad n mkul ccetla

A neǧǧ leqher

Garoga yeḥka-d: “Mazal-iyi d ilemẓi mi ṛuḥeɣ tlata iberdan ɣer lḥebs: sin iberdan ɣef tukerḍa, yiwen webrid axaṭer wteɣ argaz s leqher s lmus. Umbeεd, ddiɣ akk-d yiwet n terbaεt n yemεuṣa yerna nɣiɣ xilla n lεibad. Mi gekfa imenɣi, uɣaleɣ d aqerru n yiwet n terbaεt  iţekksen s ddreε i wiyaḍ ayen i sεan. Irgazen yeţdafaεen fell-i teddun yid-i anda ma ddiɣ. Lliɣ d aqehhar yerna ţţagaden-iyi medden.

Tura, Garoga ur yelli ara d aqehhar. Yesɣaray wiyaḍ ɣef Wawal n Ṛebbi yerna ţqadaren-t medden

“Meεna, yiwen wass ɣriɣ lehduṛ-ayi: ‘Leḥmala n tideţ teţţawi-d ṣṣbeṛ, leḥmala teţεawan, leḥmala ur tesεi ara tismin, ur tesεi ara zzux, win yesεan leḥmala deg ul-is ur yeţcekkiṛ ara iman-is. Win yesεan leḥmala n tideţ ur iţnadi ara ad ixdem cceṛ, ur yeţnadi ara ɣef nnfeε-ines, ur izeεεef ur yeţţaṭṭaf cceḥnat.’ (1 At Kurintus 13:4, 5) Imeslayen-a ḥuzan ul-iw. Ṛuḥeɣ ad zedɣeɣ deg wemkan nniḍen, ɣriɣ Tira Iqedsen yerna ssexdmeɣ lewṣayat-nsent di tudert-iw.

“Tura ur lliɣ ara d aqehhar. Sɣarayeɣ wiyaḍ ɣef Wawal n Ṛebbi yerna ţqadaren-iyi medden. Tudert-iw tesεa lmeεna.”

Awal n Ṛebbi yesεa tazmert

Tiḥkayin-agi akk-d tiyaḍ beggnent-ed belli “awal n Sidi Ṛebbi d awal n tudert yesεan tazmert.” (Iεebṛaniyen 4:12) Lewṣayat-is sehlent, ṣelḥent yerna nefεent-aɣ.

Tira Iqedsen zemrent a k-εiwnent ula d keččini? Ih, bla ccekk yerna akken yebɣu yili wugur i teţmagareḍ. “Yal tira iqedsen s ɣuṛ Ṛebbi i d-tekka yerna twulem i uselmed, i usefhem, i nehhu akk-d ţṛebga deg webrid n lḥeqq, iwakken yal aqeddac n Sidi Ṛebbi ad yili d amdan ikemlen i gwulmen i yal ccɣel yelhan.”2 Timuti 3:16, 17.

A nwali ihi kra n leḥwayeǧ yellan d lsas i sselmadent Tira iqedsen.