YAHWA ṚEBBI ixleq-ed lmalayekkat deg igenni uqbel akk a d-ixleq lqaεa. Lameεna ɣer zdat, yiwen lmelk si lmalayekkat-a icuhwa a t-εebden yemdanen. Yuɣ lḥal, ala Ṛebbi i geţţalasen leεbada. Imi i gḥess i ccehwa-ines, yuɣal d Cciṭan, lmeεna-s “Axṣim.” Ih, ixuṣem Ṛebbi. Amek?

Cciṭan issexdem azrem akken ad ikellex i Ḥewwa

Cciṭan ikellex i Ḥewwa akken a ţ-yawi aţ-ţεaṣi Ṛebbi. S tḥila, yewwi-ţ aţ-ţamen belli Yahwa Ṛebbi yekkes-as ayen yelhan mi s-iḥeṛṛem aţ-ţečč si yiwet n ttejṛa. Bla leḥya, Cciṭan yenna-d Ṛebbi d akeddab yerna yewwi Ḥewwa aţ-ţɣil belli ilaq-as aţ-ţerr deg yidis awelleh n Ṛebbi. Yenna: “Ṛebbi yeẓra belli ass ideg ara teččem seg-s, allen-nwen ad llint yerna, bla ccekk, aţ-ţilim am Ṛebbi, aţ-ţissinem lxiṛ akk-d cceṛ.” (Laṣel n ddunit 3:5) Γas d lehbala, Ḥewwa tumen lekdubat n Cciṭan. Ur tetbiε ara lqanun n Ṛebbi yerna tdemmer Adam ad ixdem am neţţat. Seg wass-nni Cciṭan d aεdaw n wid akk yesεan liman n ṣṣeḥ. Ula d ass-agi yeţkemmil yeţkellix i yemdanen. Amek?

Liman ifesden simma yeţnerni

Cciṭan issexdem leεbada n lmeṣnuεat d lεaddat n yemdanen akken ad isseεreq iberdan i lɣaci

Cciṭan yessexdem leεbada n lmeṣnuεat d lεaddat n yemdanen akken ad issefsed tarwa n Isṛayil. Σisa Lmasiḥ yenna i lεulama-nsen n ddin belli leεbada-nsen ur tesεi ara ssuma axaṭer sselmaden “ayen i d-yekkan seg imdanen.” (Matta 15:9) Ṛebbi yerra di rrif lǧens n Isṛayil asmi lǧens-agi yerra di rrif Lmasiḥ. Σisa iεeggen-asen: “Tagelda n igenwan a wen-teţwakkes, aţ-ţeţţunefk i [lǧens, MN] nniḍen ara d-ifken lɣella.” (Matta 21:43) Γer zdat, inelmaden n Σisa uɣalen d agdud yufan lemzeyya ɣer Ṛebbi.

Cciṭan yeεreḍ ihi a ten-issefsed. Yewweḍ ɣer lebɣi-s? Σisa yenna-d ayen ara yeḍrun s yiwen n lemtel yellan d licaṛa. Immeslay-ed ɣef wergaz i gzerεen irden yelhan deg yiger-is. Umbeεd, yusa-d yiwen weεdaw, yezreε aẓekkun di tlemmast n yirden-nni. Bab n yiger yeǧǧa-ten ad gmun lwaḥid armi d ass n tmegra. Γer taggara, εezlen aẓekkun-nni, mbeεd mḥan-t. Ma d irden-nni, jemεen-ten yerna xeznen-ten.

Umbeεd, Σisa issefhem i inelmaden-is lmeεna n lemtel-agi. Win akken i gzerrεen irden d neţţa; “irden, d wid iţekkan di tgelda n igenwan; ma d aẓekkun, d widak iţekkan d Cciṭan; aεdaw i gzerrεen aẓekkun, d Cciṭan; tamegra, ţ-ţaggara n ddunit; ma d wid imeggren, d lmalayekkat.” (Matta 13:38, 39) Σisa imettel inelmaden-is n ṣṣeḥ ɣer yirden. Cciṭan “yezreε” gar-asen inelmaden n lekdeb, i d-imettel uẓekkun-nni. Akken i t-id-icar Σisa, ffɣen-d inelmaden n lekdeb di leqrun i d-iḍefren lmut-is. Wigad-agi yeǧǧan liman sselmden lekdubat am win n Talut, yeεni Ṛebbi yebḍan ɣef tlata. Bdan daɣen ţεebbiden lmeṣnuεat  yerna ggaren iman-nsen di tsertit. Ala kra kan n inelmaden i geṭṭfen deg uselmed n Σisa.

Ṛebbi iḥureb ɣef liman n ṣṣeḥ

Akken i t-id-issefhem Σisa, a d-yas wass anda ara tbeddel teswiεt. Wid ur nesεi ara liman n ṣṣeḥ a ten-εezlent lmalayekkat akken ad ţwanegren. Swakka, lmumnin n ṣṣeḥ ad ţwaεeqlen s sshala. Γer taggara, Cciṭan Iblis, yellan d aεdaw amezwaru n liman, ad iţwanger ula d neţţa. Ih, liman n ṣṣeḥ ad yerbeḥ!

Lameεna, amek ara neεqel lmumnin n ṣṣeḥ ass-agi? D ayen ara nwali tura.

Lmalayekkat n Ṛebbi ţqellibent ɣef wid yebɣan ad sεun liman n ṣṣeḥ