ṚEBBI icar-ed belli ad yextiṛ Lmasiḥ akken ad yili d Amwellah n yegduden meṛṛa. Imi yeẓra anwa aneḥkam i ɣ-ilaqen, yextaṛ win yellan d lemxeyyeṛ. Amek iga wemwellah-agi? D aneḥkam ameqran n lεeskeṛ? D argaz ixeddmen s leqfaza di tsertit (lbulitik)? D lεalem ameqran yeţfelsifen? Σlaḥsab n Tira Iqedsen, Lmasiḥ, yeţţusemman Σisa, yella d nnbi ixulfen akk wiyaḍ.Matta 23:10.

Ṛebbi yexdem kullec akken a d-ilal Σisa yekmel yerna d imqeddes. Cciṭan ixdem xilla n leḥwayeǧ akken ad issefsed Σisa. Γas akken, Σisa iqubel-itent meṛṛa. Ama deg wawal, ama di lefεayel, issexdem tazmert-is akken i ţ-yessexdem Ṛebbi, mebla ma nessukkes-as-d kra. Iεuned diɣen s lekmal lḥeqq, lekyasa d leḥmala n Ṛebbi. A nwali d acu i nezmer a nelmed si lemtel n Σisa.

Σisa iεawen wiyaḍ mebla cceḥḥa

Σisa iεawen wiyaḍ s tezmert i s-yefka Ṛebbi. Yeţḥebbiṛ s ṣṣeḥ ɣef lɣaci yerna yessexdem tazmert-is bla cceḥḥa akken ad isseqneε lmeḥwiǧat-nsen. Yiwet n tikkelt, yenna-d: “Tejreḥ tasa-w ɣef lɣaci-agi [axaṭer] ulac ayen ara ččen.” (Marqus 8:2) Umbeεd, s lbeṛhan yessečč wid akk i d-iṛuḥen ad ḥessen i uselmed-ines.

Σisa yelḥa aṭas, yesselmad yerna “isseḥlay yal aṭan d yal leεyubat n lɣaci.” (Matta 4:23) Nefhem tura acimi i t-ttabaεen xilla n yemdanen. “Lɣaci meṛṛa ţqelliben a t-nalen (a t-massen) axaṭer teţţeffeɣ-ed seg-s tezmert i ten-isseḥlayen akk.” (Luqa 6:19) Akken i d-iban lḥal, Σisa “ur d-yusi ara iwakken ad qedcen fell-as, meεna yusa-d iwakken ad yili d aqeddac, yerna ad isebbel tudert-is [d lefdi, MN] iwakken ad isellek aṭas n yemdanen.” (Matta 20:28) * Acḥal n ineḥkamen ara iqeblen ad sebblen nnfeε-nsen ɣef liǧal n wegdud?

Σisa iḥemmel imecṭaḥ

Σisa iεuned lḥeqq n Ṛebbi. Ur yuɣ ara kan awal i lqanun n Ṛebbi, iqbel ula d ssebbat i ɣef i d-iţţunefk lqanun-a. Akken i t-id-carent Tira Iqedsen, amzun yenna-d: “Ţţafeɣ lfeṛḥ m’ara xeddmeɣ lebɣi-k, a Ṛebbi-inu, yerna lqanun-ik izdeɣ iẓuran n wul-iw.” (Ahellil 40:8) Am Ṛebbi, Σisa ibeggen lḥeṛma d leqder ama i imeṛkantiyen d igellilen, ama i yergazen ţ-ţlawin, ama i imecṭaḥ d imeqranen yerna ur yexdim ara lxilaf gar-asen. Yiwen wass, inelmaden-is lummen kra n imawlan imi d-wwin arraw-nsen i Σisa. Meεna neţţa yenna-yasen: “Anfet i warrac a d-asen ɣuṛ-i! Ur ten-ţţarrat ara, axaṭer tagelda n Ṛebbi i wid yellan am nutni.”Marqus 10:14.

Σisa iεuned lekyasa n Ṛebbi. Yeẓra mliḥ amek i geţwaxdem wemdan. “Yessen ayen yellan deg wulawen” n lεibad. (Yuḥenna 2:25) Ula d wid i d-ceggεen yeεdawen-is akken a t-ṭṭfen nnan: “Di leεmeṛ ur nesli i yiwen iheddeṛ am neţţa.” Ansi i s-d-tekka lekyasa-yagi i Σisa? Yessefhem-ed: “Ayen i sselmadeɣ  mačči s ɣuṛ-i i d-yekka, yekka-d s ɣuṛ win i yi-d-iceggεen.”Yuḥenna 7:16, 46.

Σisa yesseḥla imuḍan axaṭer ţɣiḍin-t

Σisa iεuned leḥmala n Ṛebbi. Ţɣiḍin-t mliḥ medden. Yiwet n tikkelt, yiwen wergaz “ihelken lbeṛs” iḥellel-it: “A Sidi, ma tebɣiḍ, tzemreḍ a yi-tesseḥluḍ.” Σisa tegzem tasa-s, “yeẓẓel afus-is innul-it, yenna-yas: ‘Bɣiɣ, ili-k teḥliḍ!’ Imiren kan, yeḥla si lbeṛs-nni.” (Luqa 5:12, 13; Marqus 1:41, 42) Σisa yebɣa seg wul ad isnefsusi taεkemt n wergaz-agi ameɣbun.

Σisa yeţḥebbiṛ fell-ak ula d kečč? Atan wacu i d-yerra s yiman-is: “Aset-ed ɣuṛ-i a wid akk yeεyan, iεebban taεekkumt ẓẓayen, a wen-fkeɣ talwit d westeεfu. Refdet ɣef tuyat-nwen azaglu-inu tlemdem s ɣuṛ-i, axaṭer ul-iw yeččuṛ d ṛṛeḥma yerna d aḥnin, aţ-ţafem talwit i teṛwiḥin-nwen.”Matta 11:28, 29.

Σisa d Amwellah yifen akk wiyaḍ. Daymi i ɣ-d-inna s lḥanna: ‘Lemdet sɣur-i.’ Aţ-ţqebleḍ ayen akka i ɣ-d-yenna? Ma tqebleḍ ayagi, aţ-ţafeḍ sseεd di tudert-ik.

^ § 6 Akken aţ-ţeẓreḍ akteṛ n leḥwayeǧ ɣef lefdi (lefdiya), wali ixef wis 5 di tektabt Qu’enseigne réellement la Bible ? s tṛumit.