Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Adlis Iqedsen—Lexbaṛ yellan deg-s

 AḤRIC WIS 16

Tisin n Lmasiḥ

Tisin n Lmasiḥ

Yahwa ixebbeṛ imdanen belli Σisa n Naṣaret d Lmasiḥ-nni i gewεed

YAHWA ad iεiwen lɣaci akken ad εeqlen Lmasiḥ-nni i gewεed? Ih. Atah wayen yexdem di lqern wis ṛebεa mbeεd taggara n tira tiεibṛaniyin. Di temdint n Naṣaret, i d-iṣebḥen di lǧiha n umalu n tmurt n Jlili, lmelk Jebrayil yerza-d ɣef yiwet n tlemẓit yeţţusemman Meryem. Tagi ţ-ţimerziwt issedhacen! Lmelk-a yenna-yas belli s ṛṛuḥ iqedsen, yeεni s tezmert issexdam Ṛebbi akken ad issiweḍ lebɣi-s, a d-tesεu aqcic ɣas tella ţ-ţaεezrit. Mmi-s-agi ad yuɣal d Agellid-nni i gewεed Ṛebbi aṭas n lweqt uqbel, win akken ara iḥekmen i dima. Tudert-is tella yakan deg igenni. Syenna, Ṛebbi iceggeε-iţ-id s lbeṛhan ɣer tεebbuṭ n Meryem. Γef wayagi i geţţusemma “Mmi-s n Ṛebbi” ɣas ilul-ed am wemdan.

Γas d ayen issexlaεen, Meryem teqbel s wannuz ayen akka iɣef i ţ-iwekkel Ṛebbi. Yuɣ lḥal, Meryem teţwaxḍeb i yiwen uneǧǧaṛ yeţţusemman Yusef. Yahwa iceggeε ihi lmelk ad issefhem i Yusef acuɣer i tella Meryem s tadist. Γer taggara, Yusef yezweǧ yid-es. Lameεna akken i t-id-icar Wedlis Iqedsen, Lmasiḥ ilaq a d-ilal di Bit-Liḥim, yiwet n temdint tamecṭuḥt i gbeεden fell-asen s wakteṛ n 140 kilumitrat.—Mixa 5:2.

Yiwen uneḥkam n Ṛuma issufeɣ-ed lqanun i yumṛen i mkul yiwen ad iṛuḥ ɣer temdint anida ilul akken ad iţţujerred yisem-is. Imi Meryem d Yusef sεan di sin iẓuran di Bit-Liḥim, ṛuḥen ihi ɣer temdint-agi. (Luqa 2:3) Meryem terba-d mmi-s deg udaynin, ssyin tesgen-it di lmedwed. Ṛebbi iceggeε yiwen n lmelk ad ixebbeṛ imeksawen yellan di tɣaltin i sen-d-yezzin belli ilul-ed Lmasiḥ-nni i gewεed.

Mi gεedda kra n lweqt, kra n lεibad cehhden-d ula d nutni belli Σisa d Lmasiḥ i gella. Nnbi Icεaya icar-ed ɣef yiwen wergaz ara yeldin abrid i ccɣel n Lmasiḥ, ccɣel yesεan azal ameqran. (Icεaya 40:3) Argaz-agi d Yeḥya aɣeṭṭas. Asmi i gwala Σisa, yenna: “Atah Izimer n Ṛebbi, d win iţekksen ddnub n ddunit.” Imiren kan, kra n inelmaden n Yeḥya tebεen Σisa. Yiwen seg-sen yenna-d: “Nufa Lmasiḥ.”—Yuḥenna 1:29, 36, 41.

Asmi i gesseɣḍes Yeḥya Σisa, Yahwa s yiman-is icehhed-ed seg igenni. Issexdem ṛṛuḥ iqedsen akken a d-ibeggen i lɣaci belli Σisa d Lmasiḥ. Yenna-d: “Wagi d Mmi ameεzuz, deg-s i gella lfeṛḥ-iw!” (Matta 3:16, 17) Lmasiḥ-nni i ṛǧan yemdanen acḥal n lweqt aya yusa-d!

Melmi i d-yeḍra wannect-a? Deg useggas wis 29 mbeεd Σisa, swaswa mi εeddan 483 iseggasen-nni iɣef i d-immeslay Danyil. Ayagi d ţţbut nniḍen i d-ibeggnen belli Σisa yella bla ccekk d Lmasiḥ-nni i gewεed Ṛebbi. Γef wacu ara yemmeslay i lɣaci?

—Ayagi yers ɣef Matta ixef amezwaru alamma d wis 3; Marqus ixef amezwaru; Luqa ixef wis 2; Yuḥenna ixef amezwaru.