Ṛuḥ ɣer wayen yellan deg-s

Ṛuḥ ɣer wegbur

 AḤRIC WIS 4

Ṛebbi yesbedd leεqed neţţa d Abṛaham

Ṛebbi yesbedd leεqed neţţa d Abṛaham

Liman idemmer Abṛaham (Ibṛahim) ad yaɣ awal i Ṛebbi. Yahwa yeggull a t-ibarek yerna ad yessefti tarwa-s

ΣEDDAN tura wazal n 350 iseggasen segmi i d-yeɣli uḥemmal-nni n waman. Yiwen n wergaz, iţţusemman Abṛaham, yezdeɣ di temdint n Ur. Tamdint-agi ideg yella liser, teṣbeḥ-ed di tmurt iwumi i neqqar ass-a Lεiraq. Abṛaham yesεa liman d ameqran. Lameεna, yiwen wass yeţţujeṛṛeb liman-is.

Yahwa yenna-yas ad yeǧǧ tamurt ideg ilul akken ad iṛuḥ ɣer Kanεan, yiwet n tmurt tabeṛṛanit. Abṛaham yuɣ awal mebla astehzi. Deg uṣafer-agi iḍulen, Abṛaham yewwi yid-es tameṭṭut-is Ṣara, mmi-s n gma-s Luṭ akk-d waṭas n iqeddacen-is. Mi wwḍen ɣer tmurt n Kanεan, εacen deg iqiḍunen. Di leεqed i gesbedd neţţa d Abṛaham, Yahwa iwεed-as a t-yerr d lǧens ameqran yerna tiwaculin meṛṛa n lqaεa ad ţţubarkent yis. Yeggull-as daɣen belli tarwa-s aţ-ţekseb tamurt n Kanεan.

Abṛaham d Luṭ εumen di lxiṛ. Kessben rennun tiqeḍεiyin n wakraren d ubeqri. Imi yelha wul-is, Abṛaham yeǧǧa mmi-s n gma-s ad yextiṛ amḍiq i gebɣa. Luṭ iṛuḥ ihi ad yezdeɣ deg yiwen uzaɣar, i d-yeţţaken nneεma, iwumi i qqaren Uṛdun. Azaɣar-agi iṣbeḥ-ed ɣer tama n temdint n Sudum. Irgazen n temdint-agi fesden aṭas. Σuṣan Ṛebbi s ddnubat-nsen imeqranen.

Mi gεedda kra n lweqt, Yahwa Ṛebbi yewεed tikkelt nniḍen i Abṛaham belli tarwa-s aţ-ţeṭṭuqqet am yetran. Lameεna, xas akken Abṛaham yeţkel ɣef lemεahda-yagi, taεzizt-is Ṣara mazal ur s-d-tesεi ara dderya. Mi gewweḍ Abṛaham 99 n sna, Ṣara azal n 90, Ṛebbi iḍmen-iten a d-sεun aqcic. D ayen i geḍran. Ṣara tesεa-d Isḥaq, akken i t-id-yenna Ṛebbi. Abṛaham yesεa-d dderya nniḍen, lameεna si lǧedra n Isḥaq ara d-yekk Wemsellek-nni i gewεed Ṛebbi di Σidin.

Luṭ, neţţa, yezdeɣ tura akk-d twacult-is di temdint n Sudum. Imezdaɣ n temdint-a fesden mačči d kra. Lameεna, Luṭ d aḥeqqi, ur yuɣal ara am nutni. Uqbel a d-yesseɣli lεiqab ɣef Sudum, Yahwa iceggeε lmalayek akken ad xebbṛent Luṭ ɣef nnger ur neţεeṭṭil ara a d-yeɣli. Lmalayekkat-agi sḥirent Luṭ ţ-ţwacult-is akken ad rewlen mebla ma zzin ɣer deffir. Umbeεd, Ṛebbi yesseɣli-d times d ukebri seg igenni ɣef Sudum akk-d yiwet n temdint i ţ-iqerben iwumi qqaren Gumur. Issenger imezdaɣ meṛṛa n temdinin-agi ifesden. Luṭ d snat yessi-s ţţusellken. Lameεna tameṭṭut-is, neţţat, tdewweṛ ɣer deffir axaṭer tendem ahat deg wayen i teǧǧa. Imi ur tuɣ ara awal, temmut.

—Ayagi yers ɣef Laṣel n ddunit 11:10–19:38.