Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Adlis Iqedsen—Lexbaṛ yellan deg-s

 AḤRIC WIS 7

Ṛebbi isellek agdud n Isṛayil

Ṛebbi isellek agdud n Isṛayil

Yahwa yesseɣli-d lmuṣibat ɣef Maṣer. Musa yessufeɣ-ed At Isṛayil si Maṣer yerna yefka-yasen Lqanun n Ṛebbi

AT ISṚAYIL εacen di tmurt n Maṣer aṭas n iseggasen. Dinna ftin yerna kesben aṭas n cci. Acu kan, ikker-ed Ferεun nniḍen ur nessin ara Yusef. Agellid-agi yeḥkem s leqher. Imi i gwala At Isṛayil simmal ţnernin, iffeɣ-it leεqel. Yerra-ten ihi d aklan yerna yefka lameṛ akken yal aqcic ara d-ilalen seg-sen ad iţţuḍegger ɣer wasif n Nnil. Lameεna, yiwet n tmeṭṭut isεan tirrugza teffer mmi-s di tqecwalt ger iɣunam akken aţ-ţḥareb fell-as. Mi t-tufa yelli-s n Ferεun, tsemma-yas Musa yerna tessker-it-id deg wexxam n ugellid.

Mi yesεa 40 iseggasen di leεmeṛ-is, Musa yeţţuḥettem ad infu ɣer yiwet n tmurt ibeεden. Acuɣer i d-yeḍra wayagi? Axaṭer iḥudd yiwen wergaz n wat Isṛayil i geţqehhir yiwen Umaṣri yellan d aεessas n lxedma. Asmi gessaweḍ 80 n sna, Yahwa iceyyeε-it ɣer Maṣer akken ad iḍleb i Ferεun ad iserreḥ i wat Isṛayil.

Ferεun iqqur uqerru-s, yugi ad yaɣ awal. Ṛebbi yesseɣli-d ihi εecṛa lmuṣibat ɣef Maṣer. Uqbel yal lmuṣiba, Musa yeţţebdad zdat n Ferεun akken a s-yeǧǧ tagniţ ad yemneε. Lameεna, Ferεun iččuṛ d nnefxa. Ixuṣem mkul tikkelt ama d Musa ama d Ṛebbi-ines Yahwa. Γer taggara, Ṛebbi iceggeε-ed lmelk i genɣan imenza meṛṛa n tmurt n Maṣer. Ţ-ţagi i d lmuṣiba tis εecṛa. Siwa tiwaculin iḍuεen Yahwa i gmenεen. Ih, siwa tid i gerran ɣef tgejda n tewwura-nsent idammen n izimer imezlen d asfel i geţţusellken. Lmelk-nni n Ṛebbi issuref i yexxamen n twaculin-agi. Ssyin d asawen, At Isṛayil smektayen-d mkul aseggas amek i gḥureb Ṛebbi fell-asen s yiwet lεid iţţusemman Lεid n Usuref (iwumi qqaren kra Tafaska).

Mmi-s amenzu n Ferεun tḥuza-t lmuṣiba-nni tis εecṛa. Annect-a issaweḍ Ferεun ad yefk lameṛ i Musa d wat Isṛayil meṛṛa ad ffɣen si Maṣer. Din din ssewǧden iman-nsen, ṛuḥen. Lameεna, Ferεun yuɣal deg wawal-is. Yeẓdem fell-asen s waṭas n ikeṛṛusen d yergazen n ṭṭrad. At Isṛayil ufan-d iman-nsen ḥeṣlen ɣer rrif n lebḥeṛ Azeggaɣ. Acu kan, Yahwa icerreg lebḥeṛ ɣef sin, dɣa bedden waman ssya wesya am leṣwar. Imiren, At Isṛayil εeddan s lqeḍra n Ṛebbi ɣef lqaεa yekkawen. Lameεna Imaṣriyen tebεen-ten zdeffir. Yahwa yesseɣli-d ihi aman-nni, dɣa Ferεun akk-d lεeskeṛ-is yečča-ten lebḥeṛ.

Umbeεd, Yahwa yexdem leεqed d wat Isṛayil mi sbedden iqiḍunen-nsen ɣer tama n wedrar n Sinay. Yessexdem Musa akken a sen-yefk leqwanen ara ten-iwellhen yerna ara iḥarben fell-asen deg waṭas n leḥwayeǧ yeεnan tudert-nsen. Ma lǧens n Isṛayil iqebbel ad yeqqim d unṣiḥ deg webrid n Yahwa, Yahwa ad yili yid-es yerna imdanen nniḍen ad ţţubarken yis.

Acu kan, amur ameqran n wat Isṛayil sneɣnin Yahwa axaṭer xuṣṣen di liman. Yahwa yesmenṭer-iten ihi deg uneẓruf (ṣṣeḥṛa) 40 iseggasen. Mbeεd Musa yextaṛ Yacuεa, yellan d uṣwib, akken ad yeṭṭef amkan-is. At Isṛayil atnan tura qrib ad kecmen ɣer tmurt i gewεed Ṛebbi i Abṛaham.

—Ayagi yers ɣef Tuffɣa; At Lewwi; Aneẓruf; Asmekti; Ahellil 136:10-15; Lecɣal 7:17-36.