Tarwa n Abṛaham tεum di lxiṛ. Ṛebbi iḥureb ɣef Yusef di Maṣer

YAHWA yeẓra belli win εzizen akk fell-as ilaq ad yetmeḥḥen w’ad immet yiwen wass, akken yura di licaṛa n Laṣel n ddunit 3:15. S wacu ara yessefhem Ṛebbi i yemdanen acḥal ara t-isseḥzen wayagi? S wayen yeḍran yiwen wass di tudert n Abṛaham. Adlis Iqedsen yenna-d belli Ṛebbi iḍleb-as ad yefk d asfel Isḥaq, mmi-s εzizen fell-as.

Abṛaham yesεa liman d ameqran. Yumen belli ma ilaq, Ṛebbi a d-yesseḥyu Isḥaq si lmut. Ayɣer i gumen annect-a? Axaṭer Ṛebbi iḍmen-it belli Amsellek-nni, yeεni Zzerriεa-nni, a d-yeffeɣ seg uẓar n Isḥaq. Abṛaham yuɣ ihi awal. Iṛuḥ ad yefk mmi-s d asfel, lameεna akken kan yekker a t-ineɣ, lmelk n Ṛebbi iḥbes afus-is. Ṛebbi icekkeṛ Abṛaham yellan d unṣiḥ imi iεebbel ad yefk ayen akk εzizen fell-as. Ṛebbi yesmekta-yas-d lemεahdat i s-yefka uqbel yerna iḍmen-it belli a tent-yesseḍru.

Umbeεd Isḥaq yesεa-d sin warrac, Σisu (Icaεu) akk-d Yeεqub. Yeεqub ixulef gma-s Σisu. Yella d win iţqadaren leḥwayeǧ yeεnan Ṛebbi. Daεneţţa iǧuza-t Yahwa. Ibeddel isem-is s win n Isṛayil (Isṛail) yerna si 12 n warraw-is i d-kkan 12 leεṛac n wegdud n Isṛayil. Lameεna, amek i tuɣal twacult-agi d lǧens ameqran?

Atan wamek akk i d-tebda temsalt. Azgen ameqran n warraw n Yeεqub usmen di Yusef, gma-tsen amecṭuḥ. Zzenzen-t ihi d akli, dɣa wwin-t wid i t-yuɣen ɣer Maṣer anda yemmuger aṭas n cceddat. Acu kan, Ṛebbi iburek ilemẓi-yagi axaṭer d unṣiḥ yerna yesεa tirrugza. Γer taggara, Ferεun yextaṛ-it akken ad yuɣal d amḍebber ameqran. Annect-a yeɣli-d di lweqt ilaqen axaṭer laẓ yewwi Yeεqub ad iceggeε arraw-is a d-aǧwen lqut si Maṣer. Yuɣ lḥal, Yusef yella d lewkil ɣef wefraq n nneεma di tmurt-nni. Mi gemlal neţţa d watmaten-is, tergagi tasa-nsen. Yusef isemmeḥ-asen axaṭer nedmen deg wayen i xedmen. Issemsawi tagniţ akken ad ṛuḥen ad zedɣen iεeggalen meṛṛa n twacult-is di Maṣer, gar-asen baba-s yellan d amɣar. Ferεun ifka-yasen akal itεeddan anda ara kemmlen ad ftin w’ad stummnen s liser. Yusef yefhem belli d Ṛebbi i gwellhen lumuṛ meṛṛa akken ad issiweḍ lemεahdat-is.

Yeεqub isεedda taggara n tudert-is di Maṣer neţţa d wid i s-iţţilin. M’akken yeţmeţţat, icar-ed belli Amsellek-nni ad yili d aneḥkam iǧehden ara d-yeffɣen si lǧedra n mmi-s Yahuda. Mi εeddan kra n iseggasen, Yusef icar-ed, uqbel ad immet, belli Ṛebbi a d-issufeɣ yiwen wass tawacult n Yeεqub si Maṣer.

—Ayagi yers ɣef Laṣel n ddunit ixef wis 20 alamma d wis 50; Iεebṛaniyen 11:17-22.