Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Adlis Iqedsen—Lexbaṛ yellan deg-s

 AḤRIC WIS 26

Lqaεa aţ-ţuɣal d Lǧennet!

Lqaεa aţ-ţuɣal d Lǧennet!

S Tgelda ara yilin ger ifassen n Lmasiḥ, Yahwa ad iqeddes (izzizdeg) isem-is, a d-yessken belli yeţţalas leḥkem yerna ad yekkes cceṛ s lekmal-is

ADLIS aneggaru n Wedlis Iqedsen yeţţusemma Aweḥḥi. D amceggeε Yuḥenna i t-yuran. Neţţaf deg-s lexbaṛ i d-yeţţaken asirem i yemdanen meṛṛa. Adlis-agi iheddeṛ-ed ɣef iweḥḥiyen i d-isskanayen ayen ara iṣaren ɣer zdat. Leḥwayeǧ-a ad ssiwḍent ɣer wass ideg ara yeḍru lmeqsud n Yahwa.

Deg uweḥḥi amezwaru, Σisa i d-yeḥyan si ger lmeggtin, icekkeṛ yerna yennuɣ tijemmuyaε. Aweḥḥi wis sin issken-ed akersi n lḥekma n Ṛebbi, iwumi ţţakent lεaḍima lexliqat yellan deg igenni.

Simma simma lmeqsud n Ṛebbi iḍerru. Skud iḍerru lmeqsud-agi, iţţunefk-ed yiwen wedlis (uţafţar), ilesqen s sebεa n ṭṭwabeε, i Izimer i geţmettilen Σisa Lmasiḥ. M’akken i d-iţţalday ṛebεa n ṭṭwabeε imezwura, ḍehren-d yemnayen i d-ileḥḥun s tazzla. Amnay amezwaru d Σisa i geqqimen ɣef uεawdiw amellal yerna i gelsan taεeṣṣabt. Ma d wiyaḍ, yeqqimen ɣef iεawdiwen yesεan lenwal (sbiɣat) yemxalafen, ţmettilen-d licaṛat yeεnan lgirrat, laẓ akk-d ţţerkat (lehlakat iţţenṭaḍen) ara yeḍrun deg wussan ineggura n ddunit n wass-a. Mi d-yeldi ṭṭabeε wis sebεa, nedhen-d sebεa n lbuqat. Tiyitwin-agi n lbuqat ţmettilent-ed ţţebcirat n lḥisab ara d-yesseɣli Ṛebbi. Mkul ţţebcira teεna yiwet lmuṣiba, yeεni yiwen ubeggen n zzεaf n Ṛebbi.

Yuḥenna iwala talalit n yiwen weqcic i d-iţmettilen talalit n Tgelda n Ṛebbi deg igenni. Ayagi yewwi-d lgirra, dɣa Cciṭan d lmalayekkat-is timcumin ţţuḍeggren-d ɣer lqaεa. Imiren tenṭeq-ed yiwet n taɣect, tenna: “A nnger-im a lqaεa!” Iblis yezεef ayendin axaṭer yeẓra belli drus n lweqt i s-d-yeqqimen.—Aweḥḥi 12:12.

Yuḥenna iwala Izimer-nni, i d-iţmettilen Σisa, akk-d 144 000 n yemdanen yeţwaxtaṛen si lqaεa akken ad ḥekmen yid-es. Akka, adlis n Uweḥḥi issken-ed belli aḥric wis sin n Zzerriεa-nni d 144 000 n yemdanen-agi.—Aweḥḥi 14:1; 20:6.

Ineḥkamen n ddunit nnejmaεen i “umenɣi n wass ameqqran n Sidi Ṛebbi Bab n tezmert,” yeţţusemman Harmagidun. Nnuɣen nutni d win akken irekben aεawdiw amellal, Σisa, yellan d aqerru n lεeskeṛ n igenwan. Γer taggara, ineḥkamen meṛṛa n ddunit ţwanegren. Cciṭan yeţwarez, ma d Σisa d 144 000 n yemdanen-nni ḥekmen ɣef lqaεa “alef iseggasen.” Mi εeddan walef-agi n iseggasen, Cciṭan yeţwanger.—Aweḥḥi 16:14; 20:4.

Acu ara d-tawi Tgeldit-agi n walef iseggasen i yemdanen yeţţaɣen awal? Acu ara yexdem Yahwa? Yuḥenna yerra-d lǧawab: “A sen-yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ axaṭer leḥwayeǧ timezwura εeddant ur ţεawadent ara a d-uɣalent.” (Aweḥḥi 21:4) Lqaεa aţ-ţuɣal d lǧennet!

Akka i gfukk ameslay wedlis n Uweḥḥi ɣef lexbaṛ n Wedlis Iqedsen. S Tgelda n Lmasiḥ, isem n Yahwa iţwaqeddes yerna iban-ed s lekmal belli Yahwa yeţţalas leḥkem i dima!

—Ayagi yers ɣef wedlis n Uweḥḥi.