Adlis n Lemtul ijmeε-ed lewṣayat i d-iweḥḥa Ṛebbi, lewṣayat iwulmen i temεict-nneɣ

YAHWA d Agellid ukyis? Yiwen ger ţţawilat ara ɣ-iεiwnen a d-nerr lǧawab i westeqsi-ya, d asenqed n lewṣayat-is. Lewṣayat-agi lhant? Ţwenniεent tudert-nneɣ? Ţţakent-as akteṛ n lmeεna? Imeyyaten n lemtul n ugellid Sliman εnan amur ameqran n lumuṛ n tudert-nneɣ. Atnan kra n lemtul:

Leţkal ɣef Ṛebbi. Leţkal-agi d ayen i glaqen akken a neqreb ɣer Ṛebbi. Sliman yura: “Ţkel ɣef Yahwa seg wul-ik meṛṛa; ur ţkalay ara ɣef lefhama-k. Nadi ɣef lebɣi-is di tezribin-ik meṛṛa; neţţa ad issemsawi iberdan-ik.” (Lemtul 3:5, 6) Win iţkalayen ɣef Ṛebbi, yeεni i geţnadin awelleh-is yerna i s-iţţaɣen awal, yeţţak lmeεna n ṣṣeḥ i tudert-is. Issefṛaḥ daɣen Yahwa yerna iţţak-as s wacu ara yerr lǧawab i yesteqsiyen i d-yefka wexṣim-is Cciṭan.—Lemtul 27:11.

Lεalaqat akk-d wiyaḍ. Lewṣayat i d-yefka Ṛebbi i yergazen, i tlawin akk-d dderya wulmen ass-a akteṛ akk n zik. Atan wamek i genha Ṛebbi irgazen akken ad ilin d unṣiḥen ɣer tlawin-nsen: “Fṛeḥ akk-d tmeṭṭut n temẓi-k.” (Lemtul 5:18-20) Tilawin izewǧen zemrent ad afent di Lemtul ixef 31 lemtel n yiwet tmeṭṭut iqefzen (taεerḍit) i d-iḥellan leqder n wergaz-is d warraw-is. Dderya, nutni, ţţuweṣṣan ad aɣen awal i imawlan-nsen. (Lemtul 6:20) Adlis n Lemtul ibeggen-ed diɣen azal n tdukli, ma d win iεezzlen iman-is ad iţxemmim ɣef yiman-is kan. (Lemtul 18:1) Iḥbiben zemren a ɣ-demmren ɣer wayen yelhan neɣ ɣer wayen n diri. Ilaq ihi a nissin a nextiṛ akken ilaq leḥbab-nneɣ.—Lemtul 13:20; 17:17.

Lxetyaṛ ukyis di tudert-nneɣ. Adlis n Lemtul ifka-d lewṣayat yesεan ssuma tameqrant. Inehhu-yaɣ a nili d ixeddamen iqefzen, a nesεu ţţexmim imalen ɣer wayen yelhan, a nxaṣem ţţexmim issefcalen w’a nexḍu i uḥiwel n ccṛab. (Lemtul 6:6; 14:30; 20:1) Adlis-a issken-ed belli ma neţţak tameẓẓuɣt i ṛṛay n wemdan wala i win n Ṛebbi, annect-a a ɣ-d-yawi lemḍerra. (Lemtul 14:12) Inna-yaɣ-d a nessemneε ul-nneɣ, yeεni amek i nella zdaxel, seg wayen i gzemren a t-issefsed, “axaṭer seg [wul] i d-ţeffɣen leεwanṣer n tudert.”—Lemtul 4:23.

D imelyan n lɣaci n ddunit meṛṛa i gjeṛṛben belli lewṣayat-a ţwenniεent tudert-nsen m’ara sent-smeḥsisen. Imdanen-agi sεan ihi ssebbat iǧehden i ten-yewwin ad qeblen Yahwa d Agellid-nsen.

—Ayagi yers ɣef wedlis n Lemtul.