Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Adlis Iqedsen—Lexbaṛ yellan deg-s

 AḤRIC WIS 8

At Isṛayil kecmen tamurt n Kanεan

At Isṛayil kecmen tamurt n Kanεan

At Isṛayil kkren ad steεmṛen tamurt n Kanεan s ufus n Yacuεa. Yahwa yesbedd leqwaḍi (inezzurfa) akken a d-isellek agdud-is si leqher i ţwaqehren

KRA n leqrun uqbel ad kecmen wat Isṛayil ɣer Kanεan, Yahwa yewεed i jedd-nsen Abṛaham belli ad kesben tamurt-agi. At Isṛayil atnan tura kkren a d-ḥellin, s ufus n Yacuεa, Tamurt yewεed Ṛebbi.

Ṛebbi iḥuseb Ikanεaniyen. Yufa belli uklalen lmut imi ččuṛen tamurt-nsen s leεṛuṛ imeqranen akk-d tmegraḍ. Ilaq-asen ihi i wat Isṛayil ad ssengren s lekmal timdinin n wat Kanεan.

Uqbel ad kecmen wat Isṛayil tamurt n Kanεan, Yacuεa iceggeε sin yergazen akken ad ssenqden tamdint n Yariḥu. Yiwet n tmeṭṭut yeţţusemman Raḥab tessekcem-iten s axxam-is yerna tḥureb fell-asen ɣas akken teẓra wi ten-ilan. Raḥab tesεa liman di Yahwa axaṭer tesla amek i gsellek At Isṛayil. Tesgall irgazen-nni akken a ţ-menεen neţţat ţ-ţwacult-is.

Kra n lweqt umbeεd, At Isṛayil kecmen ɣer Kanεan, dɣa ẓedmen ɣef temdint n Yariḥu. S lbeṛhan n Ṛebbi, ɣlin leṣwar n temdint-nni. Irgazen yeddan d Yacuεa ddehmen ɣer daxel n temdint, dɣa hudden-ţ. Lameεna, ur glin ara s Raḥab d wat wexxam-is. Di seţţa iseggasen i d-iḍefren, d iḥricen imeqranen n tmurt i gɣellin wa deffir wa ger ifassen n Yacuεa. Syenna, tamurt teţwafreq i leεṛac n wat Isṛayil.

Γer taggara n ddunit-is, Yacuεa yesnejmaε-ed At Isṛayil. Yesmekta-yasen-d ayen yexdem Yahwa i lejdud-nsen yerna yenha-ten akken ad qedcen fell-as. Γas akken, At Isṛayil εebden iṛebbiten n lekdeb mi gemmut Yacuεa d yeqriben-is. Deg wazal n 300 iseggasen, nutni ţεaṣin rennun leqwanen n Ṛebbi. Yahwa iεemmed ihi i yeεdawen-nsen, am Ifilistiyen, a ten-qehren. Acu kan, mkul m’ara εeggḍen wat Isṛayil ɣer Yahwa, yeţceggiε-asen leqwaḍi akken a ten-isellek.

Taktabt n Inezzurfa, yellan deg Wedlis Iqedsen, tehdeṛ-ed ɣef zzman-agi ideg i msetbaεen 12 n leqwaḍi wa deffir wa. Amezwaru deg-sen d Σutniyil, aneggaru d Cimcun, argaz iǧehden akk ɣef wiyaḍ seg wasmi i d-ixleq Ṛebbi ddunit. Aţţan tideţ yesεan azal ameqran i neţţaf acḥal d abrid di tektabt-agi n Inezzurfa: ṭṭaεa i Yahwa tessasay-ed lbaṛakat ma d aεaṣi yeţţawi ɣer lhemm.

—Ayagi yers ɣef Yacuεa; Inezzurfa; At Lewwi 18:24, 25.