S lbeṛhanat yexdem, Σisa issken-ed amek ara yessexdem tazmert-is asm’ara yili d Agellid

ṚEBBI yefka tazmert i Σisa akken ad ixdem ayen yellan d lmuḥal i yemdanen. Σisa yexdem aṭas n lbeṛhanat yerna acḥal d abrid zdat n lɣaci. Lbeṛhanat-agi beggnen-d belli yezmer ama i yexṣimen ama i wuguren i ggumman ad kksen i lebda yemdanen imednuben. Atnan kra n lemtul:

Laẓ. Yiwen wass, Σisa yerra aman d ccṛab itεeddan. D lbeṛhan amezwaru i gexdem. Issečč diɣen meṛtayen luluf n yemdanen s kra kan n iḥutiwen d weɣrum. Mkul tikkelt qadden s waṭas lɣaci meṛṛa.

Lehlakat. Σisa yesseḥla “yal aṭṭan d yal leεyubat.” (Matta 4:23) Yesseḥla iderɣalen, iεeẓẓugen, wid ihelken lbeṛs, iquḍaren, iεibanen, ukrifen d lehlakat nniḍen. Ulac aṭan iwumi ur yufi ddwa.

Tibuciḍanin. Σisa d inelmaden-is llan zeggren lebḥeṛ n Jlili ɣef lbabuṛ mi d-tekker tbuciḍant annect n leεǧeb. Inelmaden iffeɣ-iten leεqel. Σisa imuqel kan d amuqel aḍu, yenna: “Ssers iman-ik! Ssusem!” Imiren-nni kan, ters-ed telwit tameqrant. (Marqus 4:37-39) Asmi i d-thubb tbuciḍant nniḍen, Σisa yelḥa ɣef waman n lebḥeṛ.—Matta 14:24-33.

Iṛuḥaniyen. Iεdawen-agi n Ṛebbi qessiḥit yerna ugaren s wacḥal imdanen di lǧehd. Aṭas n lɣaci ur nezmir ara a d-ssukksen iman-nsen seg ifassen n iṛuḥaniyen-a. Σisa, neţţa, iḥettem acḥal d abrid leṛwaḥ-agi a d-ffɣen seg wid i melken yerna a sen-anfen. Ur ten-yugad ara. D nutni i t-yeţţagaden εlaǧal n tezmert-is.

Lmut. Teţţusemma “aεdaw aneggaru.” Isem-agi iṣbeḥ-as-d swaswa axaṭer ulac win izemren ad yerwel fell-as. (1 At Kurintus 15:26) Γas akken, Σisa yeḥya-d lmeggtin. Yerra yiwen ilemẓi i d-isseḥya i yemma-s, yellan ţ-ţaǧǧalt, yerna yesseḥya-d daɣen taqcict i gefka i imawlan-is. Zdat n lɣaci, yeḥya-d ula d Laεẓar, aḥbib-is yemmuten qrib ṛebεa wussan uqbel! Ula d iεdawen akk qessiḥen n Σisa ur zmiren ara ad nekṛen lbeṛhan-agi ifazen.—Yuḥenna 11:38-48; 12:9-11.

Ayen i gexdem Σisa lbeṛhanat-agi meṛṛa? Yak lmut tegguni yakk imdanen i gεawen? D ṣṣeḥ. Lameεna lbeṛhanat-agi wwin-d lfayda ara idumen. Fkan-d ţţbut belli licaṛat meṛṛa yessefṛaḥen yeεnan leḥkem n Lmasiḥ bnant ɣef lsas iǧehden. Ulac ccekk, Agellid i gextaṛ Ṛebbi yezmer ad imḥu laẓ, lehlakat, tibuciḍanin, iṛuḥaniyen yerna yezmer ad iglu ula s lmut. Ibeggen-ed yakan belli Ṛebbi yerra lqewwa ger ifassen-is.

—Ayagi yers ɣef Matta, Marqus, Luqa akk-d Yuḥenna.