1. Anwa lexbaṛ yessefṛaḥen yeεnan wid yemmuten?

Asmi yella Σisa di lqaεa, yesεa yiwen wemdakkel isem-is Ilεazar (Laεẓar) izedɣen di temdint n Bit-Ḥananya, tama n Yarucalim. Yiwen wass, amdakkel-agi-ines yemmut, yerna Σisa ur d-iwwiḍ ɣer Bit-Ḥananya armi εeddan ṛbeε eyyam. Iṛuḥ ɣer uẓekka neţţa d Meryem akk-d Marta, tiyessetmatin n Ilεazar. Din din nnejmaεen-d lɣaci. Xayel kan acḥal i feṛḥent Marta d Meryem m’akken i d-yesseḥya Σisa gma-tsent!Γer Yuḥenna 11:21-24, 38-44.

Yuɣ lḥal Marta tella tessen lexbaṛ yessefṛaḥen yeεnan lmeggtin. Teεlem belli Yahwa a ten-id-iḥyu akken ad εiwden ad εicen ɣef lqaεa.Γer Icεaya 26:19.

2. Anta liḥala ideg i llan lmeggtin?

Ṛebbi inna-yas i Adam: “Kečč d aɣebbar, aţ-ţuɣaleḍ alamma d aɣebbar.”LAṢEL N DDUNIT 3:19.

Amdan yeţwaxdem s uɣebbar n wakal. (Laṣel n ddunit 2:7; 3:19) Nekni mačči d leṛwaḥ yeţεicin daxel n lǧeţţa n weksum. Ihi m’ara nemmet, ulac lḥaǧa ara d-yeqqimen seg-neɣ tedder; ula d lmux-nneɣ d ixemmimen-nneɣ ţmeţţaten. Imi lmeggtin ur ẓrin ihi acemma, ur tesεiḍ d acu i d-yeḥka Ilεazar ɣef wayen i gesεedda di lmut.Γer Ahellil 146:4; Amusnaw 9:5, 6.

Ṛebbi yeţmeḥḥin medden di tmes m’ara mmten? Imi Adlis Iqedsen ibeggen-ed belli lmeggtin ur ẓrin acemma, aselmed i d-yeqqaren belli wid yemmuten ţţenεeţţaben di tmes d lekdeb i gessamasen isem n Ṛebbi. Aεeţţeb di tmes d ayen ur s-nelli ara yakk deg wul i Ṛebbi.Γer Irmiya 7:31.

 3. Lmeggtin zemren a ɣ-d-hedṛen?

Lmeggtin ur sellen ur heddṛen. (Ahellil 115:17) Lameεna kra n lmalayekkat, yellan ţ-ţimcumin, ţţarrant iman-nsent amzun d imdanen i gemmuten, i d-iheddṛen tikwal i medden. (2 Buṭrus 2:4) Yahwa iḥeṛṛem i lεibad a d-snusuyen ɣef lmeggtin.Γer Asmekti 18:10, 11.

4. Anwa ara d-yeḥyun?

D imelyan n yemdanen yemmuten ara d-yuɣalen ɣer tudert ɣef lqaεa. Ula d kra seg wid ur nessin ara Ṛebbi, i gxedmen leḥwayeǧ n diri, ad uɣalen a d-ḥyun.Γer Lecɣal 24:15.

A sen-teţţunefk tegniţ i widen ara d-yeḥyun akken ad issinen tideţ ɣef Ṛebbi w’a d-sbeggnen liman-nsen di Σisa s tiɣin n wawal. (Aweḥḥi 20:11-12) Wid ara ixedmen leḥwayeǧ n lεali ad ţţuǧazin s tudert i lebda ɣef lqaεa.Γer Yuḥenna 5:28, 29.

5. D acu i ɣ-isselmad ḥeggu n lmeggtin ɣef Yahwa?

Yella usirem n ḥeggu n lmeggtin axaṭer Ṛebbi iceggeε-ed Mmi-s akken ad yemmet ɣef ddemma-nneɣ. Ihi, ḥeggu isselmad-aɣ aṭas ɣef leḥmala akk-d nneεma (lemzeyya) n Ṛebbi. Anwa i k-yellan deg wul a t-teẓreḍ asm’ara d-ḥyun wid yemmuten?Γer Yuḥenna 3:16; Iṛumaniyen 6:23.