Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Lexbaṛat yessefṛaḥen sɣur Ṛebbi!

 TIMEΓRI 14

Ayɣer i gextaṛ Ṛebbi agdud ass-a?

Ayɣer i gextaṛ Ṛebbi agdud ass-a?

1. Ayɣer zik Ṛebbi ixtaṛ At Isṛayil ad ilin d agdud-is?

Ṛebbi yerra tarwa n Abṛaham d lǧens iwumi yefka leqwanen. Isemma i lǧens-agi “Isṛayil” yerna yerra-t d amḥareb ɣef wawal-is akk-d leεbada n ṣṣeḥ. (Ahellil 147:19, 20) Akka, Isṛayil yezmer ad yuɣal d lbaṛaka i yemdanen n leǧnas meṛṛa.—Γer Laṣel n ddunit 22:18.

Ṛebbi yextaṛ At Isṛayil akken ad ilin d inagan-is. Taqsiṭ-nsen tesbeggen-ed belli tiɣin n wawal i leqwanen n Ṛebbi teţţawi-d lbaṛakat. (Asmekti 4:6) S Wat Isṛayil, ad izmiren wiyaḍ ad issinen Ṛebbi n tideţ.—Γer Icεaya 43:10, 12.

2. Acimi i gebɣa Ṛebbi ad ilin iqeddacen-is ddukklen ass-a?

Mi gεedda lweqt, At Isṛayil sṛuḥen nneεma (lemzeyya) n Ṛebbi. Yahwa yextaṛ ihi tajmaεt tamasiḥit deg umur n lǧens-agi. (Matta 21:43; 23:37, 38) Tura, deg wemkan n Wat Isṛayil, d imasiḥiyen n ṣṣeḥ i gellan d inagan-is.—Γer Lecɣal 15:14, 17.

Σisa ihegga inelmaden-is akken ad berrḥen di leǧnas meṛṛa w’ad rren lεibad d inelmaden. (Matta 10:7, 11; 24:14; 28:19, 20) Ass-a, di lweqt n taggara n ddunit-a, ccɣel-agi n uberreḥ iteddu akken ilaq. I tikkelt akk tamezwarut di ddunit, Yahwa isdukkel imelyan n yemdanen si mkul lǧens ɣer leεbada n tideţ. (Aweḥḥi 7:9, 10) Imasiḥiyen n ṣṣeḥ ddukklen akken ad myefken afud w’ad mεawanen. Di ddunit kamel, d yiwen n uselmed ireṣṣan ɣef Wedlis Iqedsen i ten-id-itṣaḥen deg inejmuεen-nsen.—Γer Iεebṛaniyen 10:24, 25.

 3. Amek i d-tebda tuddsa n wass-a n Inagan n Yahwa?

Di εecṛ snin i d-itebεen aseggas 1870, kra i geqqaren Adlis Iqedsen εawden ssekflen-d seg-s tideţ i ţţun lεibad acḥal aya. Mi fehmen belli Σisa ihegga tajmaεt tamasiḥit akken aţ-ţbecceṛ, bdan aberreḥ n Tgelda di ddunit meṛṛa. Deg useggas 1931, fkan i yiman-nsen isem n Inagan n Yahwa.—Γer Lecɣal 1:8; 2:1, 4; 5:42.

4. Amek i geţţuwelleh ccɣel n uberreḥ n Inagan n Yahwa?

Di lqern amezwaru, tijemmuyaε timasiḥiyin yemwezzaεen deg waṭas n tmura sfaydayent s lewhi i sen-d-yeţţak yiwen wesqamu amwellah i gesteεṛfen belli Σisa d Aqerru ɣef tejmaεt. (Lecɣal 16:4, 5) Ula ţ-ţura kifkif. Inagan n Yahwa iţwellih-iten yiwen Wesqamu amwellah. Tarbaεt-agi n lecyux iccurfen, steklfen ɣef Bitilat yesṭerjimen, i d-yessufuɣen yerna i geţwezziεen tiktabin yersen ɣef Wedlis Iqedsen, deg wakteṛ n 600 lluɣat. S wakka, Asqamu-yagi amwellah yesseǧhad yerna yeţwellih akteṛ n 100 000 n tjemmuyaε di ddunit. Di mkul yiwet seg-sent, neţţaf lecyux yellan d irgazen iccurfen; ţţelhayen-d akk-d “tqeḍεit” n Ṛebbi s leḥmala.—Γer 1 Buṭrus 5:2, 3.

Inagan n Yahwa ddukklen akken ad beccṛen lexbaṛat yessefṛaḥen n Wedlis Iqedsen w’ad rren lεibad d inelmaden. Am yemceggεen, neţberriḥ seg wexxam ɣer wayeḍ. (Lecɣal 20:20) Neṭṭalab i lεibad i gḥemmlen seg wul yeṣfan tideţ ad ɣren yid-neɣ Adlis Iqedsen. Lameεna, ur nelli ara kan ţ-ţuddsa; nella ţ-ţawacult isεan Ababat i ɣ-iḥemmlen, nella d atmaten ţ-ţyessetmatin i geţḥebbiṛen wa ɣef wa. (2 Itisalunikiyen 1:3) Imi ddukklen akken ad εeǧben i Ṛebbi w’ad εiwnen wiyaḍ, wid iţţeεbaden Yahwa qqlen ţ-ţawacult taseεdit akk di ddunit.—Γer Ahellil 33:12; Lecɣal 20:35.