Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Lexbaṛat yessefṛaḥen sɣur Ṛebbi!

 TIMEΓRI 9

Amek i tezmer aţ-ţili twacult-nneɣ ţ-ţaseεdit?

Amek i tezmer aţ-ţili twacult-nneɣ ţ-ţaseεdit?

1. Ayɣer zzwaǧ d lsas n sseεd di twacult?

Yahwa, Bab n lexbaṛat yessefṛaḥen, d Ṛebbi aseεdi yebɣan ad ilint twaculin ţ-ţiseεdiyin. (1 Timutawus 1:11) D neţţa i d-ifkan zzwaǧ. Zzwaǧ n leḥlal d ayen ilaqen iwakken aţ-ţili twacult ţ-ţaseεdit, axaṭer iţţawi-d lfeṛḥ d leḥmala i imezwaǧen akk-d dderya. Wid ibɣan ad aɣen awal i Ṛebbi ilaq-asen ad qadren leqwanen n baylek yeεnan leεqed n zzwaǧ.Γer Luqa 2:1, 4, 5.

Amek i geḥseb Ṛebbi zzwaǧ? Yebɣa ad yili d ccedd ara idumen ger wergaz ţ-ţmeṭṭut. Yahwa ibɣa argaz ţ-ţmeṭṭut ad ilin d unṣiḥen wway gar-asen. (Iεebṛaniyen 13:4) Ikṛeh berru. (Malaxi 2:16) D acu kan, isemmeḥ-as i umasiḥi ad ibru w’ad iεiwed zzwaǧ ma yella amezwaǧ-is yexdem zzna.Γer Matta 19:3-6, 9.

2. Amek ara tili ssira ger wergaz ţ-ţmeṭṭut-is?

Yahwa ixleq-ed argaz ţ-ţmeṭṭut akken ad xedmen lecɣal swayes ara mεawanen di zzwaǧ-nsen. (Laṣel n ddunit 2:18) Imi d argaz i d aqerru n twacult, iwwi-d a d-yessis lmeḥwiǧat n wat wexxam-is w’a sen-isselmed tamusni n Ṛebbi. Ilaq-as ad iḥemmel tameṭṭut-is bla cceḥḥa. Argaz ţ-ţmeṭṭut ilaq ad myeḥmalen w’ad ţţemqadaren wway gar-asen. Imi irgazen ţ-ţulawin meṛṛa d imednuben, ayen ara sen-d-yeldin tiwwura n sseεd di zzwaǧ d ssmaḥ.Γer Ifasusiyen 4:31, 32; 5:22-25, 33; 1 Buṭrus 3:7.

 3. Ilzem aţ-ţemfaraqem m’ur yelli ara zzwaǧ-nwen d aseεdi?

Ma yella yuɣ-itent zzwaǧ-nwen ilaq i mkul yiwen deg-wen ad ilḥu s leḥmala i wayeḍ. (1 Ikurintiyen 13:4, 5) Awal n Ṛebbi ur iţweṣṣi ara ɣer lefraq am wakken ţ-ţifrat i iɣeblan yeţţilin di zzwaǧ.Γer Marqus 10:9.

4. A dderya, d acu i wen-yebɣa Ṛebbi?

Yahwa ibɣa aţ-ţilim d iseεdiyen. Ifka-yawen-d lewṣayat ifazen iwakken aţ-ţestummnem s temẓi-nwen. Ibɣa aţ-ţesfaydim si lekyasa n lwaldin-nwen akk-d tmusni i d-kesben si temεict-nsen. (Ikulusiyen 3:20) Axellaq-nwen yebɣa-yawen daɣen aţ-ţeţḥussum i lfeṛḥ m’ara txeddmem lebɣi-s d lebɣi n Mmi-s.Γer Amusnaw 11:9–12:1; Matta 19:13-15; 21:15, 16.

5. Ay imawlan, amek ara tḍemnem sseεd i dderya-nwen?

Ilaq-awen aţ-ţxeddmem s lǧehd akken a d-tessisem lmakla ţ-ţnezduɣt akk-d llebsa i dderya-nwen. (1 Timutawus 5:8) Lameεna, iwakken ad afen sseεd, ilaq daɣen a sen-tesseḥfḍem ad ḥemmlen Ṛebbi w’a t-ǧǧen a ten-isselmad. (Ifasusiyen 6:4) Leḥmala i d-teţbeyyinem i Ṛebbi tezmer a d-teǧǧ deg-sen lateṛ d ameqran. Ma yella ţṛebga i sen-teţţakem treṣṣa ɣef Wedlis Iqedsen, tezmer aţ-ţemsel akken imεen lεeqliya-nsen.Γer Asmekti 6:4-7; Lemtul 22:6.

Arrac fessun am lweṛd ma yeţţunefk-asen wafud yerna ţţucekkṛen. Ḥwaǧen daɣen nnhawi d ţṛebga. Aselmed am wagi a ten-iḥrez si tikli ara sen-ikksen sseεd. (Lemtul 22:15) D acu kan, ţṛebga ur ilaq ara maḍi aţ-ţili tcenneq (tzeyyeṛ) neɣ teqseḥ.Γer Ikulusiyen 3:21.

Inagan n Yahwa ssufuɣen-d xilla n tektabin i lmend n lwaldin akk-d dderya. Tiktabin-agi reṣṣant ɣef Wedlis Iqedsen.Γer Ahellil 19:8, 12.