Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Lexbaṛat yessefṛaḥen sɣur Ṛebbi!

 TIMEΓRI 5

D acu i geqsed Ṛebbi i lqaεa?

D acu i geqsed Ṛebbi i lqaεa?

1. Acimi i d-yexleq Ṛebbi lqaεa?

Yahwa yefka-d lqaεa i yergazen ţ-ţlawin; lqaεa-yagi ţ-ţanezduɣt-nneɣ. Ihi, imi i d-yexleq argaz ţ-ţmeṭṭut imezwura, Adam d Ḥewwa, mačči bac ad εemmṛen igenwan, axaṭer ixleq-ed yakan lmalayek i wannect-a. (Yub 38:4, 7) Yessers argaz amezwaru deg yiwet n lǧennet igerrzen yeţţusemman leǧnan (tibḥirt) n Σidin. (Laṣel n ddunit 2:15-17) Yefka-yas lqaεa i neţţa d dderya n dderya-s akken ad εicen i dima fell-as.Γer Ahellil 37:29; 115:16.

Di laṣel, ala leǧnan n Σidin i gellan d lǧennet. Adam d Ḥewwa iwǧeb fell-asen ad εemmṛen lqaεa s warraw-nsen. Ssyin d asawen, aţ-ţili kamel ddaw ufus-nsen yerna a ţ-rren d lǧennet. (Laṣel n ddunit 1:28) Lqaεa d lmuḥal aţ-ţenger; aţ-ţeqqim dima ţ-ţanezduɣt n wemdan.Γer Ahellil 104:5.

2. Acuɣer ur telli ara lqaεa d lǧennet ass-a?

Adam d Ḥewwa ur uɣen ara awal i Yahwa. Yessufeɣ-iten-id ihi si leǧnan-nni. Swakka, tṛuḥ-asen Lǧennet yerna ulac amdan i gessawḍen a ţ-id-yerr. Akken i d-yeqqar Wedlis Iqedsen: “Tamurt teţţusellem s afus n wemcum.”Yub 9:24. Γer Laṣel n ddunit 3:23, 24.

Meḥsub ur yezmir ara Yahwa ad isseḍru ayen yenwa di tazwara, yeεni lmeqsud-is amenzu i yemdanen? Ala! Ṛebbi d Bab n Tezmert, iţţaweḍ dima ɣer lebɣi-s. (Icεaya 45:18) Ad yerr imdanen alamma d liḥala-nni i sen-ibɣa di tazwara.Γer Ahellil 37:11, 34.

3. Amek ara d-tuɣal Lǧennet?

Lǧennet a d-tuɣal ɣef lqaεa di lweqt ideg ara yeḥkem Σisa, Agellid yextaṛ Ṛebbi. Σisa akk-d lmalayekkat deffir-es ad ssengren ixṣimen meṛṛa n Ṛebbi, deg yiwet n lgirra  iwumi qqaren Harmagidun. Mbeεd, ad iger Cciṭan di lḥebs i 1 000 n iseggasen. Wid iţεebbiden Ṛebbi ad menεen si nnger axaṭer Σisa a ten-iwelleh w’ad iḥader fell-asen. Ad εicen i dima di Lǧennet ɣef lqaεa.Γer Aweḥḥi 20:1-3; 21:3, 4.

4. Melmi ara kfunt lemḥayen?

Melmi ara yemḥu Ṛebbi cceṛ ɣef lqaεa? Σisa yefka-d “limaṛa” ara d-issenεten melmi ara d-teqreb taggara. Σlaḥsab n wayen iḍerrun ass-a di ddunit, wissen m’ad yedder wemdan azekka; annect-a yesbeggin-ed belli newweḍ-ed ɣer “taggara n ddunit.”Γer Matta 24:3, 7-14, 21, 22.

Deg 1 000 iseggasen ideg ara yeḥkem Σisa ɣef lqaεa seg igenni, ad yekkes lemḥayen akken ma llant. (Icεaya 9:5, 6; 11:9) Ur yeţţili ara kan d Agellid, ad yili daɣen d Lmuqeddem Ameqran ara isefḍen ddnubat n wid iḥemmlen Ṛebbi. Akka, a t-yessexdem Ṛebbi akken ad yekkes lehlak, tewser akk-d lmuţ.Γer Icεaya 25:8; 33:24.

5. Menhu ara iεicen di Lǧennet i d-iţeddun?

Di Tzeqqa n Tgelda, a d-temlileḍ imdanen i gḥemmlen Ṛebbi yerna i geţnadin amek ara s-εeǧben.

D imdanen yeţḍuεun Ṛebbi ara izedɣen di Lǧennet. (1 Yuḥenna 2:17) Σisa iceyyeε inelmaden-is ad nadin ɣef wid yesεan annuz w’a sen-sselmden amek ara εeǧben i Ṛebbi. Tura, Yahwa la d-iţheggi imelyan n lεibad ara iεicen ɣer zdat di Lǧennet ɣef lqaεa. (Ṣafanya 2:3) Deg imukan n leεbada n Inagan n Yahwa, yeţţusemman Tizeɣwa n Tgelda, imdanen lemmden akken ad uɣalen d imezwaǧen neɣ d ibabaten ifazen, ţ-ţulawin neɣ ţ-ţiyemmatin n lεali. Imawlan akk-d dderya ţεebbiden Ṛebbi lwaḥid di Tzeɣwa-yagi, yerna lemmden amek ara wennεen tudert-nsen s uselmed n Wedlis Iqedsen.Γer Mixa 4:1-4.