1. Yiwen kan n ddin n ṣṣeḥ i gellan?

“Ḥadret iman-nwen si lanbeyya n lekdeb!”MATTA 7:15.

Σisa isseḥfeḍ i inelmaden-is yiwen n ddin, win n ṣṣeḥ. Imettel-it ɣer webrid iţţawin ɣer tudert n dayem. Inna-d belli abrid-agi ‘drus n wid i t-iţţafen.’ (Matta 7:14) Ṛebbi iqebbel kan leεbada ireṣṣan ɣef Wawal-is n ṣṣeḥ. Wid akk yeţεebbiden Ṛebbi s tideţ zdin (ddukklen) deg yiwen n liman.Γer Yuḥenna 4:23, 24; 14:6; Ifasusiyen 4:4, 5.

2. Acu i d-inna Σisa ɣef imasiḥiyen n lekdeb?

“Qqaren belli ssnen Illu, lameεna nekṛen-t s lefεayel-nsen.”TITUS 1:16.

Σisa iεeggen-ed belli lanbeyya n lekdeb ad sluɣen ddin amasiḥi. A s-tenwuḍ ţεebbiden Ṛebbi s ṣṣeḥ yerna Timezdayin-nsen (Tijemmuyaε-nsen) qqarent ţ-ţimasiḥiyin i llant. Acu kan, lanbeyya-yagi ţwaεqalen. Ala di leεbada n ṣṣeḥ i neţţaf imasiḥiyen n ṣṣeḥ, yeţwaεqalen s ṣṣifat d lefεayel-nsen.Γer Matta 7:13-23.

3. Amek i tzemreḍ aţ-ţεeqleḍ imasiḥiyen n ṣṣeḥ?

Err lbal-ik ɣer xemsa n limaṛat-agi swayes i ţwaεqalen:

  • Wid iţεebbiden Ṛebbi s tideţ ţqadaren Adlis Iqedsen, imi ɣur-sen d Awal n Ṛebbi i gella. Xeddmen ayen akk iwumi zemren akken ad tebεen leqwanen-is. Ihi, ddin n tideţ mačči d ddin ireṣṣan ɣef ixemmimen n yemdanen. (Matta 15:7-9) Wid iqeddcen ɣef Ṛebbi s ṣṣeḥ ur ţberriḥen ara lḥaǧa w’ad xeddmen tayeḍ.Γer Yuḥenna 17:17; 2 Timutawus 3:16, 17.

  • Inelmaden n ṣṣeḥ n Σisa ţţaken ccan i yisem n Ṛebbi, Yahwa. Σisa iga ccan i yisem n  Ṛebbi mi t-iwerra i medden akken a t-issinen. Ikcef-ed tideţ yeεnan Ṛebbi i lεibad yerna yesselmed-asen ad ţẓallan ɣef yisem-is akken ad iţwaqeddes. (Matta 6:9) Anwa ddin i gemmalen isem n Ṛebbi deg wemḍiq anda i tzedɣeḍ?Γer Yuḥenna 17:26; Iṛumaniyen 10:13, 14.

  • Imasiḥiyen n ṣṣeḥ ţberriḥen Tagelda n Ṛebbi. Ṛebbi iceggeε-ed Σisa ɣer lqaεa iwakken ad ibecceṛ lexbaṛ n lxiṛ n Tgelda. Anagar Tagelda-ya i gellan d asirem i yemdanen. Σisa iheddeṛ fell-as almi d asmi yemmut. (Luqa 4:43; 8:1; 23:42, 43) Yenna-d belli inelmaden-is a ţ-berrḥen. Σlaḥsab-ik, d acu-t ahat ddin n win ara d-yasen a k-d-immeslay ɣef Tgelda n Ṛebbi?Γer Matta 24:14.

  • Inelmaden n Σisa ur ţekkan ara di ddunit-agi tamcumt. Tzemreḍ a ten-tεeqleḍ imi ssebεaden iman-nsen ɣef tsertit akk-d ccwal iḍerrun ger yemdanen. (Yuḥenna 17:16; 18:36) Yerna ur ttabaεen ara lεeqliya n ddunit d lεaddat-is yeţḍurrun.Γer Yeεqub 4:4.

  • Imasiḥiyen n ṣṣeḥ sεan leḥmala ifazen wway gar-asen. S lemεawna n Wawal n Ṛebbi lemmden ad ţqadaren lεibad n yal ccetla. Di lweqt ideg ddyanat meṛṛa ţţakent afus i lgirrat ger leǧnas, wid iţεebbiden Ṛebbi s tideţ ur qebblen ara annect-agi. (Mixa 4:1-3) Deg wemkan n waya, ssexdamen bla cceḥḥa lweqt-nsen d wayen i kesben akken ad εiwnen w’ad sseǧhden wiyaḍ.Γer Yuḥenna 13:34, 35; 1 Yuḥenna 4:20.

4. Tfaqeḍ anwa i d ddin n ṣṣeḥ?

Anwa ddin ireṣṣan aselmed-ines meṛṛa ɣef Wawal n Ṛebbi, yeţţarran ccan i yisem n Ṛebbi yerna yeţberriḥen belli siwa Tagelda n Ṛebbi i gellan d asirem n yemdanen? Anwa ddin i d-iţbegginen leḥmala yerna ur neţcarak ara di lgirrat? Acu i tenniḍ kečč?Γer 1 Yuḥenna 3:10-12.