Inelmaden n Wedlis Iqedsen deg iseggasen i d-itebεen 1870.

Lbeṛǧ n Tεessast amezwaru s teglizit di 1879.

Lbeṛǧ n Tεessast ass-a (s tegrikit).

Adlis Iqedsen ixebbeṛ-ed belli mbeεd lmut n Lmasiḥ a d-kkren iselmaden n lekdeb ger imasiḥiyen imezwura w’ad sluɣen tideţ n Wedlis Iqedsen. (Lecɣal 20:29, 30) D ayen swaswa i geḍran. Ssexlḍen ixemmimen ur nelli ara di ddin amasiḥi i wayen yesselmed Σisa; annect-a ixleq-ed ddin amasiḥi n lekdeb. (2 Timutawus 4:3, 4) Amek ihi i nezmer a netḥeqqeq belli ass-a nefhem akken ilaq ayen yesselmad s ṣṣeḥ Wedlis Iqedsen?

Yewweḍ-ed lweqt. Yahwa icar-ed belli di “lweqt n taggara [...] tamusni aţ-ţzid.” (Danyil 12:4) Di 1870, kra n yemdanen yeţnadin tideţ fehmen belli xilla si leḥwayeǧ, i sselmadent ddyanat, ur llint ara deg Wedlis Iqedsen. Nudan ihi ad fehmen acu i gesselmad wedlis-agi di laṣel. Yahwa iεawen-iten.

Asenqed n Wedlis Iqedsen. Inelmaden n Wedlis Iqedsen llan qqaren adlis-agi tamsalt tamsalt; d ţţawil-agi i nessexdam ula d ass-a. Ma yella iwεeṛ-asen ad fehmen yiwen n weḥric seg Wedlis Iqedsen, ţnadin ifyar nniḍen ara t-id-issefhmen. Ma ifat fehmen yiwet n temsalt iεedlen d wayen yesselmad Wedlis Iqedsen, ţţarun-ţ. Imi ǧǧan Adlis Iqedsen a d-issefhem iman-is s yiman-is, εawden ssekflen-d tideţ ɣef yisem n Ṛebbi, ɣef Tgelda-s, ɣef lebɣi-s yeεnan lqaεa d lεibad, ɣef liḥala ideg i llan wid yemmuten akk-d usirem n ḥeggu n lmeggtin. Ayen akka i d-ufan yessukkes-iten-id seg waṭas n leḥwayeǧ n lekdeb is i llan ţţamnen, isellek-iten-id daɣen si lefεayel n diri.—Yuḥenna 8:31, 32.

Di 1879, Inelmaden n Wedlis Iqedsen fehmen belli yewweḍ-ed lweqt ad sselmden tideţ i waṭas n medden. Ihi, bdan ssufuɣen-d tasɣunt yeţţusemman Lbeṛǧ n Tεessast yeţxebbiṛ-ed ɣef Tgelda n Yahwa. Mazal nessufuɣ-ed tasɣunt-agi ar ass-a. Tura, neţwerri tideţ n Wedlis Iqedsen di 240 n tmura akk-d imeḍqan deg wakteṛ n 750 lluɣat. Leεmeṛ i tzad (teṭṭuqqet) tmusni n tideţ am wass-a!

  • Acu i geḍran i tideţ n Wedlis Iqedsen mbeεd lmut n Lmasiḥ?

  • Amek i tεawed tufrar-ed tideţ-agi?