Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Anwa i gxeddmen lebɣi n Yahwa?

 AḤRIC 5

Acu ara k-d-awin inejmuεen-nneɣ imasiḥiyen?

Acu ara k-d-awin inejmuεen-nneɣ imasiḥiyen?

Aṛjuntin

Syeṛṛa Liyun

Biljik

Malizya

Xilla i gḥebbsen ur ţṛuḥun ara ɣer inejmuεen n ddin axaṭer ufan belli ur ţţuwellhen deg wayen yeεnan leḥwayeǧ n ṛṛuḥ ur ţţuṣebbren. Ayɣer ihi i glaq aţ-ţḥeddṛeḍ i inejmuεen i xeddmen Inagan n Yahwa? Acu ara d-tesfaydiḍ seg-sen?

Aţ-ţfeṛḥeḍ m’ara tiliḍ ger yerfiqen n lεali. Imasiḥiyen n lqern amezwaru ferqen ţ-ţijemmuyaε. Ţnejmaεen bac ad εebden Ṛebbi, bac ad ɣren Tira Iqedsen w’ad mseǧhaden. (Iεebṛaniyen 10:24, 25) Tella gar-asen leḥmala, yerna wa yeţḥebbiṛ ɣef wa; ţnejmaεen akk-d leḥbab n ṣṣeḥ, yeεni atmaten ţ-ţyessetmatin-nsen di ddin. (2 Itisalunikiyen 1:3; 3 Yuḥenna 14, 15) Imi nettabaε lemtel-nsen, ula d nekni neţţaf lfeṛḥ.

Aţ-ţḥefḍeḍ amek ara teṭṭebbiqeḍ imenzayen n Wedlis Iqedsen. Ass-a, irgazen, tulawin d warrac imecṭaḥ ţnejmaεen lwaḥid, am wakken i llan xeddmen-t iqeddacen n Ṛebbi di zzman n Wedlis Iqedsen. Deg inejmuεen-agi, llan iselmaden iẓewren i gessexdamen Adlis Iqedsen akken a ɣ-εiwnen a nefhem amek ara neṭṭebbiq imenzayen-is di temεict-nneɣ n yal ass. (Asmekti 31:12; Naḥamya 8:8) Mkul yiwen seg-neɣ yezmer a d-ibeggen liman-ines akk-d usirem-ines m’ara d-yeţţarra leǧwab neɣ m’ara icennu.—Iεebṛaniyen 10:23.

Aţ-ţafeḍ sseεd m’ara yeǧhed liman-ik. Yenna wemceggeε Bulus i iεeggalen n tejmaεt n lweqt-nni-ines: “Acḥal i bɣiɣ a kkun-ẓreɣ, akken [...] a nemseǧhad wway gar-aneɣ; kunwi s liman-nwen, nekk s liman-inu, imi yiwen n liman i ɣ-isdukklen.” (Iṛumaniyen 1:11, 12, Awal n tudert, 2001) Ma yella nezga neţnejmaε akk-d Inagan n Yahwa, ad yeǧhed liman-nneɣ w’a neṭṭef leqrar akken a neţεic εlaḥsab n imenzayen n Wedlis Iqedsen.

Tebɣiḍ aţ-ţḥedṛeḍ yid-neɣ i unejmuε i d-iteddun akken aţ-ţesfaydiḍ seg wayen akka iɣef i d-nehdeṛ? A nesteṛḥeb yis-ek akken ilaq! Ur teḥwaǧeḍ ara aţ-ţxellṣeḍ bac aţ-ţḥedṛeḍ; ur nessutur ara maḍi idrimen i wid i d-iţţasen.

  • Anwa lemtel i nettabaε deg wayen yeεnan inejmuεen-nneɣ?

  • Acu ara k-d-awin inejmuεen-nneɣ?