Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Anwa i gxeddmen lebɣi n Yahwa?

 AḤRIC 9

Amek ara theggiḍ iman-ik i inejmuεen?

Amek ara theggiḍ iman-ik i inejmuεen?

Kambuǧ

Ukṛanya

Ma yella teqqareḍ Adlis Iqedsen akk-d Inigi n Yahwa, bla ccekk txeddmeḍ lmeǧhud bac a d-theggiḍ ayen ara teɣreḍ yid-es. D lεali aţ-ţxeddmeḍ daɣen akka uqbel aţ-ţḥedṛeḍ i unejmuε, iwakken aţ-ţesfaydiḍ mliḥ seg-s. Yelha a d-teţjabeḍ lweqt w’a k-yili wayagi ţ-ţannumi.

Xtiṛ taswiεt d wemkan igerrzen. Anta taswiεt ideg i teţţarraḍ ddehn-ik akteṛ? Ṣṣbeḥ, uqbel aţ-ţṛuḥeḍ ɣer lxedma, neɣ deg yiḍ, ma ifat ṭṭṣen warraw-ik? Xas ur testufaḍ ara bac aţ-ţeɣreḍ aṭas, ẓer acḥal n lweqt ara tesεeddiḍ di leqraya-yagi, yerna xdem ayen akk iwumi i tzemreḍ iwakken ur teţţaǧǧaḍ acemma a k-isṛuḥ lweqt-nni i d-tεezleḍ. Nadi-d amkan ihennan yerna ssebεed fell-ak ayen akk i gzemren a k-yessedhu. Γef lemtel, ssexsi (ssens) ṛṛadyu, tilibizyu akk-d tilifun. Ẓẓall uqbel aţ-ţeɣreḍ; annect-a a k-iεiwen akken ur teţxemmimeḍ ara i iɣeblan i d-temmugreḍ ass-nni w’aţ-ţṛekzeḍ ɣef Wawal n Ṛebbi.—Ifilibiyen 4:6, 7.

Sbin-ed s westillu ixemmimen yesεan azal yerna heggi-d leǧwab. Di tazwara, ẓer ɣef wacu i d-theddeṛ tmeɣri-nni meṛṛa. Xemmem ɣef usentel-ines, tnadiḍ lεalaqa yellan ger usentel-agi d yal asentel n tseddaṛin. Muqel daɣen ţţeswiṛat. Γer isteqsiyen n wesmekti yeεnan ixemmimen yesεan azal n tmeɣri-nni. Mbeεd, ɣer mkul taseddaṛt tqellbeḍ leǧwab i westeqsi i ţ-yeεnan. Γer daɣen ifyar i d-iţţunefken tnadiḍ lεalaqa yellan gar-asen ţ-ţemsalt i teqqareḍ. (Lecɣal 17:11) Mi d-tufiḍ leǧwab i westeqsi di tseddaṛt, εellem kra n imeslayen ara k-iεiwnen a t-id-temmektiḍ. Ma yella tebɣiḍ, m’ara tiliḍ deg unejmuε, tzemreḍ aţ-ţrefdeḍ afus-ik iwakken a d-tefkeḍ leǧwab awezlan. Ur teţţuḥettmeḍ ara aţ-ţessexdmeḍ imeslayen swaswa yuran di tseddaṛt-nni.

M’ara tessenqadeḍ timsal i neqqar mkul smana deg inejmuεen, aţ-ţernuḍ tiwiztin tijdidin i ugerruj-ik n tmusni, yeεni tamusni n Wedlis Iqedsen.—Matta 13:51, 52.

  • Amek ara taɣeḍ tannumi a d-teţjabeḍ lweqt bac a d-tessewǧadeḍ inejmuεen?

  • Amek i tzemreḍ a d-theggiḍ leǧwab i unejmuε?