Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Leǧwab ɣef 10 yesteqsiyen yeεnan ilmeẓyen

 ASTEQSI 1

Menhu-​yi?

Menhu-​yi?

IWACU ASTEQSI-​YAGI?

Ma teẓriḍ d anwa-​k yerna d acu-​tent leḥwayeǧ iwumi i teţţakeḍ lqima, ayagi a k-​iεiwen aţ-​ţeṭṭfeḍ leqrarat iwulmen m’ara tiliḍ di lḥerṣ.

ACU I TZEMREḌ AŢ-​ŢXEDMEḌ?

Meyyez ɣef liḥala-​yagi: Kamila tesεa azal n εecṛa ddqayeq kan segmi i tewweḍ ɣer yiwet n ssehṛa, dɣa tesla i yiwet n taɣect i tessen mliḥ teqqar-​as-​d:

“Ayɣer akka i tbeddeḍ dagi weḥd-​em?”

Ţ-​ţamdakkelt-​is Nada i s-​d-​ihedṛen. Nada teṭṭef snat n teqreεtin n lbirra ldint, tefka yiwet i Kamila, tenna-​yas: “Ur yi-​d-​qqar ara belli mazal-​ikem ţ-​ţamecṭuḥt i tissit. Acu yellan ma tezhiḍ akka cwiyya!”

Kamila tugi aţ-​ţsew. Meεna ur tebɣi ara ad iɣiḍ lḥal tamdakkelt-​is. Nada ţ-​ţaḥbibt-​is, yerna ţ-​ţaqcict n lεali. Ma yella neţţat ttess, ihi mačči d ayen n diri, neɣ ala? Kamila tenna deg wul-​is: “Yakk d lbirra kan, mačči d lkif.”

Lukan i telliḍ deg wemkan n Kamila, acu ara txedmeḍ?

XEMMEM CWIYYA!

Bac aţ-​ţeṭṭfeḍ leqrar yelhan di liḥala am tagi, teḥwaǧeḍ aţ-​ţissineḍ iman-​ik (ccexṣiyya-​k), yeεni acu n ṣṣenf n lεebd i telliḍ. Aţ-​ţissineḍ iman-​ik lmeεna-​s aţ-​ţeẓreḍ d acu-​ten lumuṛ iɣef i teţdafaεeḍ d wayen swayes i teţţamneḍ. Ayagi a k-​d-​yefk tazmert aţ-​ţḥekmeḍ di tudert-​ik bac ur teţţaǧǧaḍ ara wiyaḍ ad ḥekmen deg-​s deg wemkan-​ik.​—1 Ikurintiyen 9:26, 27.

Amek ara tessiwḍeḍ aţ-​ţeṭṭfeḍ akken ilaq di leqrar am wagi? Bdu qbel s leǧwab ɣef yesteqsiyen-​a.

 1 DEG WACU I ẒEWREΓ?

Ma yeẓra walbeεḍ d acu yakk i gezmer a t-​yexdem, d acu-​tent ṣṣifat i gesεa, ad yeţkel akteṛ ɣef yiman-​is.

LEMTEL SEG WEDLIS IQEDSEN: Amceggeε Bulus yura imeslayen-​a: “Γas xuṣṣeɣ di lhedṛa, ur xuṣṣeɣ ara di tmusni.” (2 Ikurintiyen 11:6) Imi Bulus yefhem mliḥ Adlis Iqedsen, ur yefcil ara asmi t-​sεeddan kra n lεibad deg ujeṛṛeb. Ur ten-​yeǧǧi ara a t-​ssenquqlen s uqejjem-​nsen.​—2 Ikurintiyen 10:10; 11:5.

SSENQED IMAN-​IK: Kteb ukessar-​a yiwet n lḥaǧa i tzemreḍ aţ-​ţxedmeḍ neɣ i tessneḍ aţ-​ţxedmeḍ.

Tura, kteb yiwet si ṣṣifat timeqranin i tesεiḍ. (Di lemtel: ahat teţţarraḍ ddehn-​ik, d asaxi i telliḍ, yella fell-​ak leţkal, neɣ d ayen nniḍen.)

2 DEG WACU I XUṢṢEΓ?

Am ssnesla, ma tella deg-​s yiwet n txelxalt ur neǧhid ara, ssnesla-​nni meṛṛa aţ-​ţxaṣṣ lǧehd. Akken daɣen ula d ccexṣiyya-​inek: ma teǧǧiḍ ayen ideg i txuṣṣeḍ a k-​yeɣleb, ccexṣiyya-​inek meṛṛa aţ-​ţefsed.

LEMTEL SEG WEDLIS IQEDSEN: Bulus yella yeẓra deg wacu i gxuṣṣ. Yura imeslayen-​agi: “Daxel-​iw, stummuneɣ s ccariεa n Yillu, lameεna ţwaliɣ di lemfaṣel-​iw ccariεa nniḍen i geţnaɣen d ccariεa n tedmi-​w [lefhama-​w]; teţţarra-​yi d akli n ccariεa n ddnub.”​—Iṛumaniyen 7:22, 23.

SSENQED IMAN-​IK: Ger leḥwayeǧ ideg i txuṣṣeḍ, anta i glaq aţ-​ţnadiḍ a ţ-​tɣelbeḍ?

 3 ACU-​TEN LMEQSUDAT-​IW?

Eεni a k-​d-​yas di lbal aţ-​ţrekbeḍ deg uṭaksi w’aţ-​ţiniḍ i unehhaṛ ad iţezzi alamma ifukk-​as liṣuns? Annect-​a d lehbala, yerna a d-​yas ɣlay!

Acu ara d-​tlemdeḍ si lemtel-​agi? Ma tesεiḍ leqsed, ayagi a k-​yefk lewhi di tudert-​ik iwakken ur teţdewwiṛeḍ ara deg yiwen wemkan. Meεna, aţ-​ţeẓreḍ s anda i tţedduḍ d wamek ara tawḍeḍ.

LEMTEL SEG WEDLIS IQEDSEN: Bulus yura ayagi: “Mačči d ahummu i ţhummuɣ.” (1 Ikurintiyen 9:26) Bac ur yeţqabal ara timsal n ddunit mebla ma ixemmem-​asent, yella iteṭṭef lmeqsudat yerna iteddu akken ara ten-​yaweḍ.​—Ifilibiyen 3:12-14.

SSENQED IMAN-​IK: Kteb ukessar-​a tlata lmeqsudat i tebɣiḍ aţ-​ţawḍeḍ ssya ɣef useggas.

4 S WACU I ŢŢUQENNΣEΓ?

Ma yella tqesdeḍ seg wul-​ik aţ-​ţeṭṭfeḍ di lumuṛ iɣef i teţdafaεeḍ d wayen is i teţţamneḍ, aţ-​ţecbuḍ ɣer ttejṛa umi lqayit iẓuran, ur nɣelli ara ɣas a d-​εeddint fell-​as tbuciḍanin

Ma ulac leḥwayeǧ i k-​iqennεen, ur tseεεuḍ ara ṛṛay. Aţ-​ţiliḍ am tata, aţ-​ţeţbeddileḍ ṣṣifa bac aţ-​ţcabiḍ ilmeẓyen nniḍen; annect-​a a d-​ibeggen belli ur tesεiḍ ara ccexṣiyya ara yilin s ṣṣeḥ d ayla-​k.

Lameεna, ma yella lefεayel-​ik bnan ɣef leḥwayeǧ i k-​iqennεen, aţ-​ţeṭṭfeḍ di ccexṣiyya-​k ayen bɣun xedmen-​t wiyaḍ.

LEMTEL SEG WEDLIS IQEDSEN: Nnbi Danyil, “iṭṭef leqsed” mi gella d ilemẓi ad yeţḥessis i lumuṛ n Ṛebbi, ɣas yeţwaεzel ɣef imawlan-​is. (Danyil 1:8) Danyil yessaweḍ ad yeṭṭef deg wawal-​is; iεac εlaḥsab n wayen swayes i geţţuqenneε.

SSENQED IMAN-​IK: S wacu i teţţuqennεeḍ? Di lemtel: Tumneḍ s Ṛebbi? Ma tumneḍ, acuɣer? Acu n ţţbut i k-​iqennεen, kečč, belli Ṛebbi yella s ṣṣeḥ?

Tumneḍ s ṣṣeḥ belli lumuṛ n Ṛebbi nefεen-​k? Ma tumneḍ, acuɣer?

Ihi, ɣer wacu i tebɣiḍ aţ-​ţcabiḍ: ɣer yifer i geţţawi ubeḥri neɣ ɣer ttejṛa ara yeqqimen tbedd ɣas ad εeddint fell-​as tbuciḍanin? Sseǧhed ccexṣiyya-​k, aţ-​ţiliḍ am ttejṛa-​ya. Akka, aţ-​ţizmireḍ a d-​tǧawbeḍ ɣef westeqsi: Menhu-​yi?