Ṛuḥ ɣer wayen yellan deg-s

Ṛuḥ ɣer wegbur

 ASTEQSI WIS 9

Eεni ddunit tennerna-​d weḥd-​es?

Eεni ddunit tennerna-​d weḥd-​es?

IWACU ASTEQSI-​YAGI?

Lukan iṣeḥḥa uselmed i d-​iqqaren belli ddunit tennerna-​d weḥd-​es, tudert ur tseεεu ara lmeεna. Ma yella ddunit teţwaxleq-​ed, nezmer a d-​naf leǧwab yeţqenniεen ɣef yesteqsiyen yeεnan tudert ass-​a d uzekka.

ACU I TZEMREḌ AŢ-​ŢXEDMEḌ?

Xemmem ɣef liḥala-​yagi: Amin yeḥṣel d acu ara imeyyez. Si zik yeţţamen s Ṛebbi yerna yeţţamen belli kulci di ddunit yeţwaxleq-​ed. Meεna ass-​a, ccix n byuluji yefra-​d ameslay: Aselmed n unerni yella s ṣṣeḥ yerna ireṣṣa ɣef leqdic n unadi i xedmen seg wul kra n lεulama. Amin yuɣal yeqqar deg wul-​is: “Ma yella lεulama sεan ţţbut belli kulci yennerna-​d kan weḥd-​es, d acu-​yi nekkini bac a ten-​qamreɣ?” Amin ur yebɣi ara a d-​iban d abehlul zdat n wiyaḍ.

Lukan i telliḍ deg wemkan n Amin, aţ-​ţqebleḍ aselmed i d-​yeqqaren belli kulci yennerna-​d kan akka weḥd-​es imi kra n tektabin sselmadent belli annect-​a yella s ṣṣeḥ?

XEMMEM CWIYYA!

Di xilla n liḥalat, lεibad, ayen bɣun xemmen-​t, qqaren-​d mebla akukru s wacu i ţţamnen ɣas ur ẓrin ara ayɣer i ţţamnen yis.

  • Kra ţţamnen belli kulci yeţwaxleq-​ed imi d aya i sen-​sselmden di tmezdayt (lǧameε n imasiḥiyen).

  • Kra nniḍen ţţamnen belli kulci yennerna-​d kan akka weḥd-​es axaṭer d aya i sen-​sselmden deg uɣerbaz (llakul).

 SEŢŢA YESTEQSIYEN IΓEF ARA MEYYZEΓ

Adlis Iqedsen yenna-​d: “Mkul axxam, illa win i t-​ibnan; lameεna win yebnan kullec, d [Ṛebbi].” (Iεebṛaniyen 3:4) Ayagi d lmeεqul?

Win ara s-​yinin tudert ur d-​teţwaxleq ara am win ara s-​yinin axxam-​inna ulac win i t-​yebnan; annect-​a d lmuḥal

Kra qqaren-​d belli ayen akk yellan deg igenwan d lqaεa, yekka-​d seg yiwen uṭerḍeq d ameqran, iwumi qqaren big bang.

1. Acu i d ssebba n uṭerḍeq-​agi?

2. Anwa i d-​yeţbanen d lmeεqul akteṛ ger sin ixemmimen-​agi: d win i d-​yeqqaren belli kulci yekka-​d seg wulac neɣ d win i d-​yeqqaren belli yella ḥedd i d-​yefkan kullec?

Kra qqaren-​d belli d lḥiwan i gennernan armi uɣalen d lεibad.

3. Ma yella lḥiwan am yiddawen (ibkan) nnernan cwiṭ cwiṭ armi uɣalen d lεibad, iwacu i gella lxilaf d ameqran ger lεibad akk-​d yiddawen deg wayen yeεnan lefhama ţ-​ţmusni?

4. Acuɣer ula d lexliqat timecṭaḥ akk di ddunit weεṛent a tent-​fehmen imusnawen?

Kra qqaren-​d belli aselmed n unerni yella s ṣṣeḥ yerna fkan-​d fell-​as ţţbut.

5. Amdan i d-​yeqqaren akka, eεni inuda ad yefhem tamsalt-​agi? Yufa-​d fell-​as ţţbut?

6. Xilla n yemdanen i geţţamnen s uselmed n unerni axaṭer qqaren-​asen-​d belli lεibad ifehmen ţţamnen yis!

“Lukan aţ-​ţiliḍ di teẓgi w’aţ-​ţwaliḍ yiwet n texxamt tebna s tgejda n wesɣar, eεni a s-​tiniḍ: ‘Yelha, ttjuṛ ɣlint-​ed akken kan i glaq bac aţ-​ţebnu texxamt-​agi!’ Ur d-​teqqareḍ ara akka. Ayagi ur yeţţili ara d lmeεqul. Acuɣer ihi i glaq a namen belli ayen akk yellan, ama deg igenwan ama di lqaεa, yusa-​d kan akka weḥd-​es?”​—Julia.

“Lukan a k-​d-​yini walbeεḍ belli teṭṭerḍeq yiwet n tmacint deg yiwen n lluzin n tezmamin. Iwezzeε lmidad ɣef leḥyuḍ akk-​d ssqef, dɣa teffeɣ-​ed yiwet n tektabt kamel kan akka weḥd-​es. Aţ-​ţamneḍ?”​—Gwen.

 ACIMI I GLAQ AŢ-​ŢAMNEḌ S ṚEBBI?

Adlis Iqedsen yeţweṣṣi-​k aţ-​ţessexdmeḍ ‘leεqel-​ik.’ (Iṛumaniyen 12:1) Liman-​ik di Ṛebbi ur ilaq ara ihi ad ireṣṣi kan ɣef:

  • LḤISAS (yeţban-​iyi-​d belli tella yiwet n lqewwa yugaren akk tiyaḍ)

  • LATEṚ I D-​ŢŢAǦǦAN DEG-​K WIYAḌ (deg wemḍiq anda i zedɣeɣ, lεibad ţţamnen s Ṛebbi)

  • LḤERṢ I D-​ITEKKEN SΓUR WIYAḌ (imawlan-​iw sselmden-​iyi ad ţţamneɣ s Ṛebbi; ur yi-​d-​iṣaḥ ara ad xtiṛeɣ)

Ilaq-​ak aţ-​ţesεuḍ ssebbat iṣeḥḥan bac aţ-​ţamneḍ.

“Di llakul, m’ara sleɣ i ccix a ɣ-​d-​issefham amek i tţeddu lǧeţţa-​nneɣ, ɣur-​i ulac ccekk: Ṛebbi yella. Yal aḥric di lǧeţţa yeṣleḥ i kra. Γas d lḥaǧa tamecṭuḥt, tesεa azal-​is. Yerna, qrib dima, kulci iteddu mebla ma nerra-​d s lexbaṛ. Lǧeţţa n lεebd d ayen yessewhamen s ṣṣeḥ!”​—Tanina.

“M’ara ẓreɣ lbaṭima, lbabuṛ neɣ ṭṭumubil, qqareɣ-​as: ‘Anwa i gebnan ayagi?’ Di lemtel, bac aţ-​ţili ṭṭumubil, laqen lεibad ifehmen ara ţ-​id-​ixedmen; axaṭer deg-​s aṭas n leḥwayeǧ timecṭaḥ i glaqen ad rsent yal yiwet deg wemkan-​is akken ad yeddu kullec. Ma yella ṭṭumubil d albeεḍ i ţ-​id-​ixedmen, ihi ula d lεibad yella Win i ten-​id-​ixelqen.”​—Lyes.

“Simmal ţnadiɣ di lεilm, simmal ţfaqeɣ belli aselmed n unerni ur iṣeḥḥa ara. [...] Ufiɣ belli, neḥwaǧ “liman” akteṛ bac a neqbel aselmed n unerni, wala bac a namen s Uxellaq.”​—Anis.

XEMMEM:

Γas sεeddan imusnawen xilla n iseggasen nutni ţnadin, mazal ur ssawḍen ara a d-​afen asefhem iɣef ara mtafaqen meṛṛa. Ma yella lεulama, i gesεan zzeεma lḥirfa, ur ssawḍen ara ad mtafaqen, tesεiḍ lḥeqq aţ-​ţcukkeḍ deg uselmed-​agi n unerni, neɣ ala?