Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Leǧwab ɣef 10 yesteqsiyen yeεnan ilmeẓyen

 ASTEQSI WIS 2

Ayɣer i ţḥebbiṛeɣ annect-​a ɣef lǧeţţa-​w?

Ayɣer i ţḥebbiṛeɣ annect-​a ɣef lǧeţţa-​w?

IWACU ASTEQSI-​YAGI?

Kra n leḥwayeǧ sεant lqima akteṛ n wayen i neţwali di lemri.

ACU I TZEMREḌ AŢ-​ŢXEDMEḌ?

Meyyez ɣef liḥala-​yagi: M’ara tmuqel Linda iman-​is di lemri, teţwali ala tassemt. Di teswiεt ideg iqriben-​is ţwalin-​ţ “ţ-​ţarqaqt mliḥ”, neţţat teqqar-​as: “Ilaq ad ḍeεfeɣ cwiyya.” *

Deg wussan iεeddan, Linda txemmem ɣer yiwen n lḥel iweεṛen: aţ-​ţexdem lmuḥal bac aţ-​ţessenqes “zuǧ kilu kan.” Teqsed aţ-​ţeqqim kra n wussan mebla lmakla...

Ma yella tqesdeḍ aţ-​ţεandeḍ Linda, acu ara txedmeḍ?

XEMMEM CWIYYA!

Tamuɣli i tesεiḍ ɣef yiman-​im tezmer aţ-​ţcabi ɣer ṣṣura ara twaliḍ di lemri iεewjen

Mačči d lexsaṛa ma yetqelleq walbeεḍ ɣef lǧeţţa-​s (ṣṣura-​s). Adlis Iqedsen s yiman-​is ihdeṛ-​ed ɣef ccbaḥa n waṭas n yergazen ţ-​ţlawin, am Ṣara, Ṛaḥil, Abigayil, Yusef d Dawed. Yenna-​d ula ɣef yiwet n tlemẓit yeţţusemman Abicag belli “tecbeḥ aṭas.”​—1 Igelliden 1:4.

Si tama nniḍen, xilla n yelmeẓyen i tessleb lǧeţţa-​nsen. Ayagi yezmer a sen-​d-​yawi lemḍerra. Atentah kra n liḥalat iɣef i tzemreḍ aţ-​ţxemmeḍ:

  • Ger tullas (teqcicin) i steqsan deg yiwen n lbeḥt, 58 % qqarent-​as belli ţ-​ţibelbulin i llant. Di tin n ṣṣeḥ, ḥaca 17 % i gellan akken.

  • Deg yiwen n lbeḥt nniḍen, 45 % si tlawin i gɣilen iman-​nsent zurit, nutenti ţ-​ţirqaqin mliḥ.

  • Seg wakken ţnadin ad ḍeεfen, kra ţţafen-​d iman-​nsen deg yiwen n lehlak iweεṛen i ten-​yeţdemmiren ad ssenqsen lmakla alamma qqimen i laẓ.

 Ma llant deg-​m kra n limaṛat i d-​iţbegginen belli tesεiḍ lehlak-​agi, neɣ lehlak nniḍen icudden ɣer lmakla, ḍleb lemεawna. Hdeṛ di tazwara i walbeεḍ seg imawlan-​im neɣ i yiwen wemdan nniḍen ameqran iɣef i tţekleḍ. Adlis Iqedsen yeqqar-​ed: “Aḥbib iḥemmel di mkul lweqt; atmaten llan i lweqt n ccedda.”​—Lemtul 17:17.

CCBAḤA IFAZEN I TZEMREḌ AŢ-​ŢESΣUḌ

Di tin n ṣṣeḥ, d ayen yellan deg wul i d-​isbegginen ma yecbeḥ walbeεḍ neɣ ala. Xemmem ɣef lemtel n Abcalum, mmi-​s n Dawed. Adlis Iqedsen yeqqar-​ed:

“Ulac argaz icebḥen am Abcalum [...], ulac deg-​s lεib.”​—2 Camwil 14:25.

Γas akken, ilemẓi-​yagi yella yeččuṛ d zzux, d ṭṭmeε akk-​d lexdeε! Daymi ur d-​yenni ara fell-​as Wedlis Iqedsen ayen yelhan; yeţweṣṣif-​it-​id d axeddaε ameqran yeččuṛen d ddɣel.

Yelha ihi imi i ɣ-​d-​yefka Wedlis Iqedsen lewṣayat-​agi:

“Lset ccexṣiyya tajdiṭ.”​—Ikulusiyen 3:10, Ṭrejma n ddunit tajdiṭ, s tṛumit.

“Ccbaḥa-​nkwent ur teţţili ara sufella [...], lameεna ţ-​ţin yeffren deg wul.”​—1 Buṭrus 3:3, 4.

Ihi, ɣas ma yella mačči d ayen n diri ma tebɣiḍ aţ-​ţcebḥeḍ, d ccexṣiyya-​inem i gesεan lqima akteṛ n ṣṣifa-​m. Γer taggara, d ṣṣifat-​inem n ṛṛuḥ ara kem-​yerren tcebḥeḍ akteṛ, mačči d lqedd-​im neɣ d ccbaḥa n lǧeţţa-​m! Yiwet n teqcict tenna-​d imeslayen-​a: “Ccbaḥa tjebbed-​ed bihfih tamuɣli. Meεna d ṣṣifat-​inem d wayen yellan deg wul-​im iɣef ara cfun medden.”

AMEK I TEŢWALIḌ LǦEŢŢA-​M

Tezgiḍ teţsetḥiḍ s lǧeţţa-​m?

Teţxemmimeḍ tikwal aţ-​ţxedmeḍ abaṛasyun n ucebbeḥ neɣ aţ-​ţeǧǧeḍ iman-​im i laẓ bac aţ-​ţwennεeḍ lǧeţţa-​inem?

Lukan i tzemreḍ, d acu ara tbeddleḍ di lǧeţţa-​inem? (Xtiṛ leǧwabat i m-​yehwan.)

  • TEΓZI

  • LMIZAN

  • ACEBBUB

  • TERQEQ NEΓ TUZERT

  • UDEM

  • TEBREK NEΓ TEMLEL

Ma tenniḍ-​d ih ɣef sin yesteqsiyen imezwura terniḍ textaṛeḍ tlata n leǧwabat neɣ kteṛ ɣef westeqsi wis tlata, xemmem ɣer wayagi: Yezmer lḥal wid i m-​d-​yezzin ur kem-​ţwalin ara tcemteḍ akken i teţwaliḍ iman-​im kemm. Yeshel mliḥ i wemdan ad yiwεiṛ d yiman-​is w’ad yeţḥebbiṛ ɣef lǧeţţa-​ines akteṛ n wayen ilezmen.​—1 Camwil 16:7.

^ § 6 Γas ma nheddeṛ-​ed i tullas deg yixef-​agi, imenzayen d lewṣayat i d-​nebder εnan ula d arrac.