ACU akka i teţwaliḍ dagi? D lεeskeṛ γef iεawdiwen imellalen. Teẓriḍ ansi i d-kkan? Seg igenni! Atnan la d-ţṣubbun s tazzla γef usigna! Γef usigna? Eεni llan iεawdiwen deg igenni? 

Σisa d agellid deg igenni

Xaṭi, ulac. Iεawdiwen-agi i teţwaliḍ mačči d iεawdiwen n ṣṣeḥ axaṭer iεawdiwen ur zmiren ara ad azzlen γef usigna. Xas akken, Adlis Iqedsen iţmeslay-ed γef iεawdiwen deg igenni. Teẓriḍ acimi?

Axaṭer zik-nni lεibad ssexdamen iεawdiwen i lgirra. Imi i d-iheddeṛ ihi Wedlis Iqedsen γef iεawdiwen d yemnayen i d-iţṣubbun seg igenni, annect-a ibeggen-ed belli Ṛebbi ad ixdem lgirra neţţa d yemdanen yellan γef lqaεa. Tessneḍ isem n wemkan anda ara teḍru lgirra-yagi? Isem-is Harmagidun. Lfetna-yagi aţ-ţekkes cceṛ meṛṛa yellan γef lqaεa.

D Σisa ara yezwiren zdat n lεeskeṛ-is deg umenγi-yagi n Harmagidun. Tecfiḍ? D Σisa i gextaṛ Yahwa akken ad yuγal d Agellid n lḥukuma-s. Γef waya i gelsa taεeṣṣabt γef uqerruy-is. Ma d isekkin-agi (ssif-agi) i geṭṭef ibeggen-ed belli ad issenger akk ixṣimen n Ṛebbi. Twehmeḍ imi yeqsed Ṛebbi ad issenger imcumen meṛṛa?

Muqel taqsiṭ tis 10. Acu akka i teţwaliḍ dagi? D aḥemmal-nni ameqran n waman i gessengren akk imcumen. Anwa i d-isseγlin aḥemmal-agi? D Yahwa Ṛebbi. Tura, muqel taqsiṭ tis 15. Tecfiḍ d acu yeḍran dagi? Timdinin n Sudum akk-d Gumur ţwanegrent s tmes i d-iceggeε Yahwa.

Ṛuḥ tura γer teqsiṭ tis 33. Twalaḍ amek i teḍra d iεawdiwen akk-d ikeṛṛusen n lεeskeṛ n Imaṣriyen? Anwa i d-yesseγlin aman-agi fell-asen? D Yahwa. Ixdem annect-a iwakken ad isellek agdud-is. Muqel tura tis 76. Yahwa yeǧǧa At Isṛayil yellan d agdud-is, ad ţwanegren γef ddemma n cceṛ akk i xedmen.

Annect-a ibeggen-ed ihi belli ur ilaq ara a newhem imi yeqsed Yahwa a d-iceggeε lεeskeṛ-is n igenwan akken ad ikkes ccum meṛṛa yellan γef lqaεa. Teẓriḍ d acu yezmer akk a d-yawi wannect-a? D ayen ara nwali di teqsiṭ i d-iteddun.

Aweḥḥi 16:16; 19:11-16.



Isteqsiyen

  • Acuγer i d-iheddeṛ Wedlis Iqedsen γef iεawdiwen deg igenni?
  • Isem-is lgirra-nni ara yexdem Ṛebbi neţţa d yemcumen γef lqaεa? Acu ara d-yawi wannect-a?
  • Akken i t-neţwali di ţţeswiṛa, anwa ara yezwiren di lgirra-yagi, acimi i gelsa taεeṣṣabt, yerna acu i d lmeεna n ssif i geṭṭef?
  • Akken i t-nwala di teqsiḍin tis 10, tis 15 akk-d tis 33, ayγer ur ilaq ara a newhem imi geqsed Ṛebbi ad ikkes imcumen?
  • Amek i d-sseknent teqsiḍin 36 d 76 belli Ṛebbi ad issenger imcumen, xas nutni qqaren ţεebbiden-t?

Isteqsiyen nniḍen

  • Γer Aweḥḥi 19:11-16.

    Amek i d-sskanayent Tira Iqedsen belli amnay-nni irekben aεawdiw amellal d Σisa? (Aweḥ. 1:5; 3:14; 19:11; Icεa. 11:4)

    Amek i d-beggnen idammen-nni iṛuccen llebsa n Σisa belli ad yeγleb ixṣimen-is s lekmal? (Aweḥ. 14:18-20; 19:13; Icεa. 63:1-6)

    Anwi i gţekkan ahat di lεeskeṛ ittabaεen Σisa, i grekben γef uεawdiw amellal? (Aweḥ. 12:7; 19:14; Matta 25:31, 32)