Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 110: Timuti, amεiwen ajdid n Bulus

Taqsiṭ tis 110: Timuti, amεiwen ajdid n Bulus

ILEMẒI i teţwaliḍ dagi d wemceggeε Bulus isem-is Timuti. Yeţεici neţţa ţ-ţwacult-is di temdint n Listra. Yemma-s isem-is Anisa ma d jida-s Lwiza.

Teẓriḍ acu akka yeqqar Bulus i Timuti? La s-yeqqar: ‘Tebγiḍ aţ-ţedduḍ yid-nneγ, nekk akk-d Silas akken a γ-tεiwneḍ a nberreḥ i lγaci di temdinin ibeεden?’

Timuti d Bulus

Timuti yerra-yas: ‘Anεam, bγiγ ad dduγ yid-wen.’ Mi gεedda cwiṭ n lweqt, Timuti yeǧǧa tawacult-is, iṛuḥ d Bulus akk-d Silas. Lameεna uqbel a d-nehdeṛ γef uṣafer-nsen, a nwali d acu yeḍran d Bulus mbeεd mi s-d-iḍher Σisa deg webrid n Dimecq 17 n sna uqbel.

Tecfiḍ? Di lweqt-nni, Bulus yella iteddu γer temdint n Dimecq iwakken ad iqher inelmaden n Σisa. Lameεna, akken i t-nwala yuγal d anelmad-is! Umbeεd, kra n yeεdawen qellben ad nγen Bulus axaṭer ur ḥemmlen ara ayen isγaray γef Σisa. Meεna inelmaden gren-t zdaxel n uqecwal, ṣubben-t si ṣṣur i d-izzin i temdint-nni iwakken ad yerwel.

Kra n lweqt umbeεd, Bulus iṛuḥ ad iberreḥ di temdint n Antyuc. Dinna i ţţusemman inelmaden n Σisa tikkelt tamezwarut “imasiḥiyen”. Ssyin, Bulus d Barnabas ţţuceggεen γer tmura tibeṛṛaniyin iwakken ad berrḥen. Ẓran-d aṭas n temdinin. Yiwet seg-sent d Listra, anda akken yezdeγ Timuti.

Mi gεedda wazal n useggas. Bulus yuγal γer temdint n Listra deg uṣafer-ines wis sin. Aseggas uqbel neţţa d Barnabas i gṛuḥ γer din iwakken ad berrḥen. Ma ţ-ţikkelt-a, neţţa d werfiq-is Silas i gṛuḥ.

Si temdint n Listra, Timuti yedda d Bulus akk-d Silas. Teẓriḍ sani i ṛuḥen? Muqel lkarṭa-yagi.

Di tazwara ṛuḥen γer temdint n Ikunyum i sen-d-iqerben. Umbeεd ṛuḥen γer Antyuc, γer Truwas, γer Filibus, γer Tiṣalunik akk-d Biri. Twalaḍ tamdint n Atinya γef lkarṭa-yagi? Bulus iberreḥ dinna. Umbeεd ṛuḥen γer temdint n Kurintus anda i berrḥen aseggas d nnefṣ. Γer taggara leḥqen γer temdint n Ifasus anda i qqimen cwiṭ n lweqt kan. Syenna rekben di lbabuṛ iteddun γer temdint n Qiṣarya. Mbeεd εeddan γer temdint n Antyuc anda yeqqim Bulus.

Aṭas aṭas n kilumitrat i gṣufer Timuti akken ad iεiwen Bulus deg uberreḥ n “lexbaṛ n lxiṛ”. Sbedden daγen aṭas n tjemmuyaε timasiḥiyin. Tebγiḍ aţ-ţiliḍ d aqeddac unṣiḥ n Ṛebbi am Timuti asm’ara timγureḍ?

Lecγal 9:19-30; 11:19-26; ixef wis 13 alamma d wis 17; 18:1-22.

Lkarṭa

1. Ṛuma; 2. Malṭa; 3. Biri; 4. Tiṣalunik; 5. Kurintus; 6. Filibus; 7. Atinya; 8. Kritus; 9. Truwas; 10. Ifasus; 11. Mili; 12. Kulus; 13. Antyuc; 14. Ikunyum; 15. Listra; 16. Qubṛus; 17. Antyuc; 18. Qiṣarya; 19. Yafu; 20. Dimecq; 21. Yarucalim; 22. Lebḥeṛ Ameqran (Agrakal)



Isteqsiyen

  • Anwa-t ilemẓi-yagi yellan di ţţeswiṛa? Anda yezdeγ? Ini-d ismawen n yemma-s akk-d jida-s.
  • Acu i gerra Timuti i Bulus asmi i s-yeḍleb ad iddu yid-es d Silas akken ad berrḥen di temdinin ibeεden?
  • Anda i ţţusemman inelmaden n Σisa “imasiḥiyen” tikkelt tamezwarut?
  • Anti timdinin nniḍen iγer i ṛuḥen Bulus, Silas d Timuti mi ǧǧan tamdint n Listra?
  • Amek i gεawen Timuti amceggeε Bulus? Γef wacu i glaq ad steqsin iman-nsen yelmeẓyen n wass-a?

Isteqsiyen nniḍen

  • Γer Lecγal 9:19-30.

    Amek i gḥuder iman-is Bulus m’akken i gemmuger leqher deg uberreḥ n lexbaṛ n lxiṛ? (Lec. 9:22-25, 29, 30; Matta 10:16)

  • Γer Lecγal 11:19-26.

    Amek i d-yefka ţţbut wayen yuran di Lecγal 11:19-21, 26 belli ṛṛuḥ n Yahwa yeţwellih yerna inehheṛ ccγel n uberreḥ?

  • Γer Lecγal 13:13-16, 42-52.

    Amek i d-ibeggen wayen yuran di Lecγal 13:51, 52 belli inelmaden ur ǧǧin ara a ten-issefcel leqher? (Matta 10:14; Lec. 18:6; 1 Buṭ. 4:14)

  • Γer Lecγal 14:1-6, 19-28.

    Yura deg wedlis n Lecγal: “ǧǧan-ten seddaw leεnaya n Sidi Ṛebbi”. Amek i γ-ţεawanen imeslayen-agi akken a nekkes tugdi i nesεa m’ara neţεawan ijdiden? (Lec. 14:21-23; 20:32; Yuḥ. 6:44)

  • Γer Lecγal 16:1-5.

    Timuti yeqbel ad ixten (iḍher). Amek i d-ibeggen wannect-a belli yesεa azal a nxeddem kullec “γef ddemma n lexbaṛ n lxiṛ”? (Lec. 16:3; 1 Kurin. 9:23; 1 Tiṣal. 2:8)

  • Γer Lecγal 18:1-11, 18-22.

    Acu i d-ibeggen wayen yuran di Lecγal 18:9, 10 γef wemkan yeṭṭef Σisa deg uwelleh n ccγel n uberreḥ? Anta ṭṭmana i γ-d-yeţţak wannect-a di lweqt-nneγ? (Matta 28:20)