Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 107: Stifan yeţwaṛjem

Taqsiṭ tis 107: Stifan yeţwaṛjem

ARGAZ-AGI yeγlin γef tgecrar d Stifan. D anelmad unṣiḥ n Σisa. Lameεna muqel acu akka iḍerrun yid-es! Irgazen-agi atnan la t-ṛejjmen s yeblaḍen imeqranen. Teẓriḍ acuγer i t-keṛhen armi wwḍen a s-xedmen tawaγit-agi? D ayen ara nwali tura.

Stifan yeţwaṛjem

S tezmert n Ṛebbi, Stifan yella ixeddem lbeṛhanat issewhamen. Annect-a ur yeεǧib ara i yergazen-agi, dγa bdan ţţemjadalen yid-es γef tideţ yesγaray i lγaci. Lameεna Ṛebbi yefka i Stifan lekyasa tameqrant is i d-ibeggen belli irgazen-agi sselmaden leḥwayeǧ n lekdeb. Annect-agi isserfa-ten akteṛ, dγa ṭṭfen-t yerna wwin-d kra n inagan iwakken a d-cehhden fell-as s ẓẓur.

Lmuqeddem ameqran isteqsa Stifan, yenna-yas: ‘Ţ-ţideţ ayen akka i d-nnan?’ Stifan yerra-yas lǧawab s yiwet n lxeṭba ifazen i greṣṣan γef Wedlis Iqedsen. Γer taggara, ihdeṛ-ed γef kra n yergazen n diri i gqehren zik lanbeyya n Yahwa. Mbeεd yenna-yasen: ‘Kunwi tecbam irgazen-agi. Tenγam Σisa, aqeddac n Ṛebbi, yerna ur tuγem ara awal i lumuṛ n Ṛebbi.’

Mi slan i imeslayen-agi, lεulama n ddin qercen tuγmas-nsen si zzεaf! Lameεna Stifan yerfed allen-is s igenni, yenna: ‘Atan ţwaliγ Σisa ibedd γer tama tayeffust n Ṛebbi deg igenni.’ Mi slan i lehduṛ-agi, qeflen imeẓẓuγen-nsen, dγa ddehmen γer Stifan, zzuγren-t beṛṛa n temdint.

Kra n yergazen yellan dinna kksen ibeṛnyas-nsen, ǧǧan-ten γer yiwen wergaz yeţţusemman Caεul iwakken a ten-iεass. Twalaḍ Caεul dihin? Mbeεd bdan ṛejjmen Stifan armi yeγli γef tgecrar. Dγa Stifan yedεa γer Ṛebbi akken i teţwaliḍ di ţţeswiṛa-yagi, yenna: ‘A Yahwa ur ten-ţεaqab ara γef ddnub i xedmen.’ Stifan yeẓra belli d lεulama n ddin i gγedṛen kra seg yergazen-agi. Akken kan i gfukk ameslay, yemmut.

Yella wasmi i k-iḍurr walbeεḍ? Acu i txedmeḍ? Tnudaḍ a d-terreḍ ţţaṛ neγ tessutreḍ i Ṛebbi a t-iεaqeb? Mačči d ayen i xedmen Stifan d Σisa. Xedmen lxiṛ ula i wigad i sen-ixedmen cceṛ. Ilaq ihi a neεreḍ a netbeε lemtel-nsen.

Lecγal 6:8-15; 7:1-60.



Isteqsiyen

  • Anwa i d Stifan? Acu yexdem s tezmert n Ṛebbi?
  • Acu i d-yenna Stifan i gesserfan lεulama n ddin?
  • M’akken i wwin yergazen-nni Stifan beṛṛa n temdint, acu i s-xedmen?
  • Anwa-t wergaz-inna di ţţeswiṛa iţεassan ibeṛnyas?
  • Uqbel ad immet, acu yenna Stifan di tẓallit i Yahwa?
  • Am Stifan, acu i glaq a t-nexdem m’ara γ-iḍurr walbeεḍ?

Isteqsiyen nniḍen

  • Γer Lecγal 6:8-15.

    Anwi leγrur i ssexdmen lεulama n ddin iwakken ad εerḍen ad ḥebsen ccγel n uberreḥ n Inagan n Yahwa? (Lec. 6:9, 11, 13)

  • Γer Lecγal 7:1-60.

    Acu i gεawnen Stifan ad idafeε akken ilaq γef lexbaṛ n lxiṛ zdat n Sanhedrin? Acu i nezmer a nelmed si lemtel-is? (Lec. 7:51-53; Ṛuma 15:4; 2 Tim. 3:14-17; 1 Buṭ. 3:15)

    Amek i glaq a nwali wid iţxaṣamen ccγel-nneγ? (Lec. 7:58-60; Matta 5:44; Luqa 23:33, 34)