Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 104: Σisa yuγal s igenni

Taqsiṭ tis 104: Σisa yuγal s igenni

AṬAS n tikkal daγen i d-ibeggen Σisa iman-is i inelmaden-is. Deg yiwet n teswiεt, akteṛ n 500 n inelmaden i t-iwalan. Teẓriḍ γef wacu i sen-d-iţmeslay Σisa? Γef Tgelda n Ṛebbi. Yahwa iceggeε-ed Σisa γef lqaεa iwakken ad isγer lγaci γef leḥwayeǧ yeεnan Tagelda-yagi. D ayen i gexdem ula d asmi i d-yeḥya si ger lmeggtin.

Σisa yeţţali s igenni

Tecfiḍ d acu i ţ-ţagelda n Ṛebbi? D lḥukuma n Ṛebbi yellan s ṣṣeḥ deg igenni. Ṛebbi yextaṛ Σisa iwakken ad yuγal d Agellid n lḥukuma-yagi. Akken i t-nwala yakan, Σisa yessečč wid yelluẓen, yesseḥla wid yuḍnen yerna yeḥya-d ula d wid yemmuten. S lecγal-agi ibeggen-ed belli ad yili d agellid yifen akk wiyaḍ!

Amek ara tuγal lqaεa asm’ara yeḥkem Σisa deg igenni alef iseggasen? Lqaεa meṛṛa aţ-ţuγal d lǧennet. Ur teţţili lgirra, ur yeţţili imenγi, ur yeţţili lehlak, ula d lmut aţ-ţeţwakkes. Netḥeqqeq s wannect-a axaṭer Ṛebbi ixleq-ed lqaεa akken aţ-ţuγal d lǧennet i sseεd n yemdanen. Γef wayagi i d-yexleq di tazwara leǧnan n Σidin. Σisa ad ixdem kullec iwakken ad yeḍru lebγi n Ṛebbi γef lqaεa.

Ṛebεin n wussan Σisa iţbeggin-ed iman-is i inelmaden-is. Annect-a iḍmen-iten belli yeḥya-d si ger lmeggtin. Tura yewweḍ-ed lawan ad yuγal s igenni. Lameεna uqbel ad yemfaraq yid-sen, yenna-yasen: ‘Qqimet di temdint n Yarucalim alamma yers-ed fell-awen ṛṛuḥ iqedsen.’ Ṛṛuḥ iqedsen ţ-ţazmert issexdam Ṛebbi akken ad issiweḍ lebγi-s. Ţ-ţazmert-agi, icuban aḍu iţsuḍen, ara iεiwnen inelmaden ad xedmen lebγi n Ṛebbi. Γer taggara, Σisa yumeṛ-asen: ‘Ṛuḥet tberrḥem fell-i di ddunit meṛṛa.’

Mi gfukk ameslay, teḍra-d yiwet n lḥaǧa yessewhamen. Σisa yuli s igenni, akken i t-teţwaliḍ di ţţeswiṛa-ya. Yiwet n tagut tγumm-it, dγa iγab γef wallen n inelmaden-is. Dayen ur ţţuγalen ara a t-walin. Σisa iṛuḥ s igenni, yebda iḥekkem-ed syenna γef inelmaden-is yellan di lqaεa.

Inelmaden ţmuqulen s igenni

1 At Kurintus 15:3-8; Aweḥḥi 21:3, 4; Lecγal 1:1-11.



Isteqsiyen

  • Yiwen wass, acḥal n inelmaden i gwalan Σisa? Γef wacu i sen-d-iţmeslay?
  • Acu i ţ-ţagelda n Ṛebbi? Amek ara tili temεict γef lqaεa m’ara yeḥkem Σisa alef iseggasen?
  • Acḥal n wussan i d-yeḍher Σisa i inelmaden-is? Lameεna acu i s-ilaq ad yexdem tura?
  • Acu yenna Σisa i inelmaden-is uqbel a ten-yeǧǧ?
  • Acu i teţwaliḍ di ţţeswiṛa? Amek i gγab Σisa γef wallen n inelmaden-is?

Isteqsiyen nniḍen

  • Γer 1 At Kurintus 15:3-8.

    Acimi i geţţuqenneε Bulus m’akken i d-iheddeṛ γef ḥeggu n Σisa? Γef wacu i zemren a d-hedṛen s leqniεa imasiḥiyen n wass-a? (1 Kurin. 15:4, 7, 8; Icεa. 2:2, 3; Matta 24:14; 2 Tim. 3:1-5)

  • Γer Lecγal 1:1-11.

    Akken yura di Lecγal 1:8, amek i gennerna ccγel n uberreḥ? (Lec. 6:7; 9:31; 11:19-21; Kulus 1:23)