Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 103: Σisa iḍher-ed i inelmaden-is

Taqsiṭ tis 103: Σisa iḍher-ed i inelmaden-is

M’AKKEN i ṛuḥen Buṭrus d Yuḥenna seg uẓekka-nni anda ssersen lǧeţţa n Σisa, Meryem ur teddi ara yid-sen. Teqqim dinna weḥd-es, tebda teţru. Mbeεd tmuqel γer daxel n uẓekka, twala snat n lmalayek, akken i t-neγra di teqsiṭ-nni iεeddan. Nnant-as: ‘Acuγer i teţruḍ?’

Meryem terra-yasent: ‘Wwin Ssid-iw, yerna ur ẓriγ ara saniγer i t-rran.’ Mbeεd tmuqel ssya wesya, dγa twala yiwen wergaz. Yenna-yas: ‘Anwa akka i teţqellibeḍ?’

Meryem tγil d abeḥḥar. Tenwa daγen d neţţa balak i geddmen lǧeţţa n Σisa. Tenna-yas ihi: ‘Ma yella d kečč i t-iddmen, ini-yi-d γer wanda i t-tewwiḍ.’ Di tin n ṣṣeḥ, argaz-agi d Σisa. Meryem ur t-teεqil ara axaṭer yesbeggen-ed iman-is s lǧeţţa nniḍen. Lameεna, akken kan i ţ-iluεa s yisem-is, teεqel belli d Σisa. Dγa tuzzel aţ-ţessiweḍ lexbaṛ i inelmaden. Tenna-yasen: ‘Ẓriγ Ssid-nneγ!’

Ass-nni, mi gεedda kra n lweqt, sin inelmaden llan leḥḥun γer yiwet n taddart iţţusemman Amawes, mi d-iqerreb γur-sen yiwen wergaz. Inelmaden-agi ḥeznen mliḥ imi yemmut Σisa. Lameεna deg webrid, argaz-nni yessefhem-asen aṭas n leḥwayeǧ γef Wedlis Iqedsen, dγa ḥulfan i wulawen-nsen nnefsusin. Yuγal, inelmaden-nni ḥebsen iwakken ad ččen. Imiren i εeqlen belli argaz-nni yeddan yid-sen d Σisa. Meεna din din iγab γef wallen-nsen! Sin inelmaden-nni uγalen ihi s lemγawla γer Yarucalim akken ad xebbṛen imceggεen.

M’akken llan leḥḥun γer din, Σisa yesban-ed daγen iman-is i Buṭrus. Mi slan inelmaden nniḍen s lexbaṛ-agi, ččuṛen wulawen-nsen d lfeṛḥ. Mbeεd sin inelmaden-nni wwḍen γer Yarucalim, dγa bdan ḥekkun i yemceggεen amek i sen-d-iḍher Σisa deg webrid. Mazal-iten ţmeslayen, mi d-teḍra yiwet lḥaǧa yessewhamen. Teẓriḍ d acu-ţ?

Muqel ţţeswiṛa-yagi. Atan ibedd-ed Σisa deg yiwet n texxamt γas akken teγleq tewwurt. Acḥal i feṛḥen inelmaden-is! Bla ccekk d ass aseεdi. Tḥesbeḍ acḥal n tikkal i d-yeḍher Σisa i inelmaden-is? Xemsa i d-tufiḍ?

Σisa iḍheṛ-ed i inelmaden-is

Amceggeε Ṭuma ur yelli ara yid-sen m’akken i sen-d-yeḍher Σisa. Inelmaden nnan-as ihi: ‘Neẓra Ssid-nneγ!’ Ṭuma yerra-yasen: ‘D lmuḥal ad amneγ annect-a siwa ma ẓrant-eţ wallen-iw.’ Mi εeddan tmanya wussan, inelmaden nnejmaεen daγen deg yiwet n texxamt iwumi γelqent tewwura. Tikkelt-a Ṭuma yella yid-sen. Taswiεt kan, ibedd-asen-d Σisa di tlemmast n texxamt-nni. Tura, Ṭuma yumen.

Yuḥenna 20:11-29; Luqa 24:13-43.



Isteqsiyen

  • Acu i tenna Meryem i wergaz-nni i tγil d abeḥḥar? Lameεna, amek i d-tewwi s lexbaṛ belli d Σisa?
  • Acu yeḍran d sin inelmaden n Σisa i gleḥḥun γer taddart n Amawes?
  • Acu yeḍran m’akken i llan ḥekkun sin inelmaden-nni i yemceggεen amek i sen-d-yeḍher Σisa?
  • Acḥal iberdan i d-yeḍher Σisa i inelmaden-is?
  • Acu yenna Ṭuma mi gesla belli Σisa isbeggen-ed iman-is i inelmaden? Acu yeḍran mi εeddan tmanya wussan?

Isteqsiyen nniḍen

  • Γer Yuḥenna 20:11-29.

    Eεni di Yuḥenna 20:23, Σisa yebγa a d-yini belli imdanen zemren ad sefḍen ddnubat n wiyaḍ? Ssefhem-ed. (Ahel. 49:2, 7; Icεa. 55:7; 1 Tim. 2:5, 6; 1 Yuḥ. 2:1, 2)

  • Γer Luqa 24:13-43.

    Amek i nezmer a nessewǧed ul-nneγ bac akken ad yerr ddehn-is γer tideţ yellan deg Wedlis Iqedsen? (Luqa 24:32, 33; Σazra 7:10; Matta 5:3; Lec. 16:14; Iεeb. 5:11-14)