Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 97: Σisa yusa-d am ugellid

Taqsiṭ tis 97: Σisa yusa-d am ugellid

MI GΣEDDA cwiṭ n lweqt segmi i gesseḥla sin iderγalen-nni, Σisa ikemmel abrid-is γer yiwet n taddart tamecṭuḥt iqerben tamdint n Yarucalim. Mi qrib ad yaweḍ, yenna i sin ger inelmaden-is: ‘Ṛuḥet γer taddart-ihin. Aţ-ţafem dinna aγyul amecṭuḥ, brut-as-d tawim-iyi-t-id.’

Mi s-d-wwin aγyul-nni, Σisa irkeb fell-as, iṛuḥ γer Yarucalim. Mi qrib ad yaweḍ γer din, mmugren-t-id waṭas n lγaci. Azgen ameqran deg-sen kksen llebsa-nsen, ssan-ţ deg webrid. Ma d wiyaḍ gezmen tiseḍwa n tezdayin, ssan-tent ula d nutni deg webrid. Ţεeggiḍen: ‘Iţţubarek ugellid i d-yusan s yisem n Yahwa!’

Lγaci steṛḥben s Σisa

Zik-nni di tmurt n Isṛayil, igelliden ijdiden keččmen tamdint n Yarucalim γef weγyul amecṭuḥ iwakken ad beggnen iman-nsen i wegdud. D ayen i gxeddem dagi Σisa. Lγaci-yagi atnan sskanayen-d belli bγan ad yuγal d agellid-nsen. Meεna mačči d medden meṛṛa i gebγan annect-a. Iban-ed waya deg wayen akken yeḍran mi gṛuḥ Σisa γer lemqam.

Di lemqam, Σisa yesseḥla iderγalen d iquḍaren. Mi walan annect-a, arrac imecṭaḥ bdan ţḥemmiden-t s taγect εlayen. Lameεna ayagi yesserfa lmuqeddmin, dγa nnan i Σisa: ‘Tesliḍ d acu akka i qqaren warrac-agi?’

Σisa yerra-yasen: ‘Sliγ, ih. Leεmeṛ teγrim ayagi deg Wedlis Iqedsen: “Ṛebbi a d-yessufeγ leḥmadi seg yimawen n warrac imecṭaḥ?”’ Dγa arrac-nni kemmlen ţḥemmiden agellid yesbedd Ṛebbi.

Mebla ccekk nebγa a nεaned arrac-agi imecṭaḥ. Izmer lḥal kra ad εerḍen a γ-qeḍεen ameslay γef Tgelda n Ṛebbi. Meεna a nkemmel a nheddeṛ i wiyaḍ γef leḥwayeǧ ifazen ara yexdem Σisa.

Mačči asm’akken yella di lqaεa i glaq ad yebdu Σisa leḥkem-is. Melmi ara yeḍru ihi waya? Inelmaden-is nudan ad afen lǧawab i westeqsi-yagi. D ayen ara nγer umbeεd.

Matta 21:1-17; Yuḥenna 12:12-16.



Isteqsiyen

  • M’akken qrib ad yaweḍ Σisa γer yiwet n taddart iqerben Yarucalim, acu yenna i inelmaden-is ad xedmen?
  • Σlaḥsab n ţţeswiṛa, acu yeḍran m’akken qrib ad yaweḍ Σisa γer temdint n Yarucalim?
  • D acu i xedmen warrac imecṭaḥ mi walan isseḥla Σisa iderγalen d iquḍaren?
  • Acu iǧuweb Σisa i lmuqeddmin-nni izeεfen?
  • Amek i nezmer a nεaned arrac-nni imecṭaḥ i gḥemden Σisa?
  • D acu i nudan ad fehmen inelmaden n Σisa?

Isteqsiyen nniḍen

  • Γer Matta 21:1-17.

    Amek anekcum n Σisa am ugellid γer Yarucalim yemxalaf d win n lqebṭanat n Ṛuma mi d-ţţuγalen seg imenγi? (Matta 21:4, 5; Zaxar. 9:9; Filib. 2:5-8; Kulus 2:15)

    Acu i zemren ad lemden yelmeẓyen n wass-a deg warrac n wat Isṛayil i d-ibedren Ahellil 118 asm’akken yekcem Σisa γer lemqam? (Matta 21:9, 15; Ahel. 118:25, 26; 2 Tim. 3:15; 2 Buṭ. 3:18)

  • Γer Yuḥenna 12:12-16.

    D acu i d lmeεna n tseḍwa n tezdayt i ssexdmen wid i cekkṛen Σisa? (Yuḥ. 12:13; Filib. 2:10; Aweḥ. 7:9, 10)