Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 93: Σisa issečč izumal n lγaci

Taqsiṭ tis 93: Σisa issečč izumal n lγaci

TEḌRA yiwet n twaγit ţ-ţameqrant! Atan akken kan i nγan Yeḥya aγeṭṭas. Hiṛudyad yellan ţ-ţameṭṭut n ugellid ur t-tḥemmel ara. Tḥettem ihi argaz-is iwakken ad igzem aqerru n Yeḥya.

Mi gesla s lmut n Yeḥya, Σisa yeḥzen aṭas. Iṛuḥ ihi γer yiwen wemḍiq iwakken ad iḍerref iman-is. Lameεna lγaci tebεen-t armi d amkan-nni. Mi gwala ahdum-agi n lγaci, tegzem tasa-s. Dγa yebda iţmeslay-asen γef Tgelda n Ṛebbi yerna yesseḥlay imuḍan-nsen.

Mi geγli yiṭij, inelmaden-is qerrben γur-es, nnan-as: ‘Amkan-agi yexla yerna iṛuḥ lḥal. Ini i lγaci-yagi ad ṛuḥen γer tudrin iwakken a d-aγen ayen ara ččen.’

Σisa yesseččay izumal n lγaci

Σisa yerra-yasen: ‘Acuγer ara ṛuḥen? Fket-asen kunwi ad ččen.’ Imiren yezzi γer Filbas, yenna-yas: ‘Ansi ara d-naγ aγrum i wannect-agi n lγaci?’

Filbas yerra-yas: ‘Laqen geddac n yedrimen iwakken a d-iṣaḥ ciṭuḥ kan n weγrum mkul yiwen deg-sen.’ Andriyus yenṭeq γer Σisa yenna-yas: ‘Aqcic-inna yeţţawin lqut-nneγ yesεa xemsa n teḥbulin n weγrum akk-d sin iḥutiwen. Lameεna ur d-ţqiddin ara i wannect-agi n lγaci.’

Σisa yumeṛ i inelmaden-is: ‘Init i lγaci ad qqimen γef leḥcic.’ Mbeεd, Σisa yeddem-ed lqut-nni, yeḥmed Ṛebbi icekkeṛ-it, dγa yebḍa-t d iḥricen. Inelmaden-is ferqen ihi tiḥbulin-nni n weγrum d iselman-nni i lγaci. Ger wid yeččan, llan 5000 n yergazen mebla luluf n tlawin d warrac imecṭaḥ. Ččan akk armi ṛwan yerna gran-d 12 iḍellaεen i d-jemεen inelmaden n Σisa.

Mbeεd Σisa iḥreṣ inelmaden-is ad alin γer teflukt iwakken ad zegren i lebḥeṛ n Jlili. Mi d-yeγli yiḍ, tekker-ed yiwet n tbuciḍant annect n leεǧeb. Lemwaji kkatent taflukt-nni si mkul tama. Inelmaden n Σisa tekcem-iten tugdi tameqrant. Mi gneṣṣef yiḍ, walan albeεḍ iteddu-d γur-sen, ileḥḥu γef waman. Dγa bdan ţεeggiḍen si lxuf axaṭer ur εqilen ara anwa-t wagi.

Σisa yenna-yasen: ‘Ur ţţagadet ara, d nekk!’ Lameεna ggumman ad amnen annect-a. Dγa Buṭrus yenna-yas: ‘A Sidi, ma yella d ṣṣeḥ d keččini, efk-iyi-d lameṛ a n-aseγ γur-ek γef waman.’ Σisa yerra-yas: ‘Eyya-d!’ Buṭrus yers-ed ihi si teflukt, yebda ileḥḥu γef waman! Lameεna ikcem-it lxuf, dγa yebda izedder. Imiren kan isellek-it-id Σisa.

Iεedda cwiṭ n lweqt, Σisa yessečč tikkelt nniḍen luluf n yemdanen. S sebεa n teḥbulin n weγrum d kra n iselman imecṭaḥ i gexdem aya. Lγaci meṛṛa ččan diγen armi ṛwan. Bla ccekk nefṛeḥ m’akka i nwala lxiṛ meṛṛa yexdem Σisa i lγaci! Asm’ara yili d agellid, ulac ayen ara γ-ixaṣṣen.

Matta 14:1-32; 15:29-38; Yuḥenna 6:1-21.



Isteqsiyen

  • Acu yeḍran d Yeḥya aγeṭṭas? Acu i gḥuss Σisa?
  • Amek i gessečč Σisa lγaci-nni i t-ittabaεen? Acḥal n lmakla i d-yegran?
  • Acu yessagden inelmaden n Σisa yiwen yiḍ? Acu yuγen Buṭrus?
  • Amek i gessečč Σisa luluf n lγaci abrid wis sin?
  • Ṛebbi yextaṛ Σisa akken ad yili d agellid γef lqaεa. Anti leḥwayeǧ ifazen ara yilin m’ara iḥkem di lweqt-nni?

Isteqsiyen nniḍen

  • Γer Matta 14:1-32.

    Acu i d-ibeggen wayen yuran di Matta 14:23-32 γef lεeqliya n Buṭrus?

    Amek i d-sseknent Tira Iqedsen belli Buṭrus yegma di leεqel-is yerna iγleb ṭṭbiεa-s iḥemqen? (Matta 14:27-30; Yuḥ. 18:10; 21:7; Lec. 2:14, 37-40; 1 Buṭ. 5:6, 10)

  • Γer Matta 15:29-38.

    Amek i d-ibeggen Σisa belli iquder lerẓaq i s-d-yefka Baba-s? (Matta 15:37; Yuḥ. 6:12; Kulus 3:15)

  • Γer Yuḥenna 6:1-21.

    Σisa iquder lḥukumat. Deg wussan-nneγ, amek i ţεanaden imasiḥiyen lemtel-is? (Yuḥ. 6:15; Matta 22:21; Ṛuma 12:2; 13:1-4)