Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 91: Σisa γef wedrar

Taqsiṭ tis 91: Σisa γef wedrar

TWALAḌ argaz-agi yeqqimen dagi? D Σisa. Atan la yesγaray lγaci γef wedrar n tmurt n Jlili. Wigad-agi yeqqimen γer tama-s d inelmaden-is. Σisa yextaṛ 12 gar-asen iwakken ad uγalen d imceggεen. Imceggεen d inelmaden iwumi yefka Σisa ccγel isεan azal ameqran. Tessneḍ ismawen-nsen?

Σisa yesγaray lγaci

Yella Semεun, iwumi qqaren daγen Buṭrus, akk-d gma-s Andriyus. Llan diγen sin watmaten nniḍen iţţusemman Yeεqub d Yuḥenna. Sin yemceggεen nniḍen ţţusemman ula d nutni Semεun akk-d Yeεqub. Sin nniḍen sεan isem n Yudas. Yiwen d Yudas n Qeryut, ma d wayeḍ d Yudas iwumi qqaren daγen Taddi. Atnah tura yismawen n ṛebεa yemceggεen ineggura: Filbas, Natanahil (iţţusemman daγen Bartelmay), Matta akk-d Ṭuma.

Mi d-yuγal si tmurt n Cumrun, Σisa yebda yeţberriḥ tikkelt tamezwarut lexbaṛ-agi: ‘Tagelda n igenwan teqreb-ed.’ Teẓriḍ d acu i ţ-ţagelda-yagi? D lḥukuma n ṣṣeḥ n Ṛebbi. Σisa yella d agellid n lḥukuma-yagi. A d-yeḥkem seg igenni yerna a d-yawi lehna γef lqaεa. Ddaw n Tgelda n Ṛebbi, lqaεa meṛṛa aţ-ţuγal d lǧennet.

Di ţţeswiṛa-yagi, Σisa yesγaray lγaci γef waṭas n leḥwayeǧ yeεnan Tagelda n Ṛebbi. Issefhem-asen: ‘Atah wamek i glaq aţ-ţeţẓallam: A Baba-tneγ yellan deg igenni, isem-ik ad iţwaqeddes, tagelda-k a d-tas, lebγi-k ad iḍru di lqaεa akken yeḍra deg igenni.’ Aṭas n yemdanen i gsemman i tẓallit-agi “Taẓallit n Baba-tneγ”. Yella wass ideg i tesliḍ i tẓallit-agi?

Σisa imla daγen i lγaci amek i glaq aţ-ţili tikli-nsen γer wiyaḍ. Inna-yasen: ‘Xedmet i wiyaḍ ayen i tebγam a wen-t-xedmen.’ Yeεǧeb-ak lḥal m’ara k-xeddmen lxiṛ wiyaḍ? Σisa yenna-d belli ula d nekni ilaq-aγ ihi a nxeddem lxiṛ i wiyaḍ. Acḥal ara telhu temεict γef lqaεa di lǧennet asm’ara tebεen lγaci ayen akka i d-yenna Σisa!

Matta ixef wis 5 alamma d wis 7; 10:1-4.



Isteqsiyen

  • Akken i teţwaliḍ di ţţeswiṛa, anda i gesγaray Σisa? Anwa-ten wigad-agi yeqqimen γer tama-s?
  • Ini-d ismawen n 12 n yemceggεen n Σisa.
  • Anta-ţ tgelda-yagi iγef yeţberriḥ Σisa?
  • Γef wacu yesselmed Σisa ad ẓẓallen lγaci?
  • Acu i d-yenna Σisa γef tikli i glaq a nesεu γer wiyaḍ?

Isteqsiyen nniḍen

  • Γer Matta 5:1-12.

    Amek i nezmer a d-nessken belli nesteεṛef d igellilen i nella di leḥwayeǧ n ṛṛuḥ? (Luqa 11:28; Ṛuma 10:13-15; 1 Tim. 4:13, 15, 16)

  • Γer Matta 5:21-26.

    Amek i d-issken Matta 5:23, 24 belli lεalaqat i nesεa d watmaten-nneγ zemrent ad ḥazent lεalaqat i nesεa d Yahwa? (Matta 6:14, 15; Ahel. 133:1; Kulus 3:13; 1 Yuḥ. 4:20)

  • Γer Matta 6:1-8.

    Lḥeqq n tkerkas yesεa aṭas n wudmawen iγef i glaq ad beεden imasiḥiyen. Teẓriḍ anwa-ten? (Luqa 18:11, 12; 1 Kurin. 4:6, 7; 2 Kurin. 9:7)

  • Γer Matta 6:25-34.

    Amek i gesselmed Σisa belli ilaq a neţkel γef Yahwa akken ad iqenneε lmeḥwiǧat-nneγ deg wayen yeεnan cci? (Tuf. 16:4; Ahel. 37:25; Filib. 4:6)

  • Γer Matta 7:1-11.

    Acu i γ-isselmad lemtel yessewhamen i d-yefka Σisa di Matta 7:5? (Lem. 26:12; Ṛuma 2:1; 14:10; Yeε. 4:11, 12)