Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 90: Σisa ţ-ţmeṭṭut n wat Cumrun

Taqsiṭ tis 90: Σisa ţ-ţmeṭṭut n wat Cumrun

DI TMURT n Cumrun, Σisa yeqqim γer tama n lbir akken ad yesteεfu. Inelmaden-is ṛuḥen γer temdint a d-aγen ayen ara ččen. Aţţan tusa-d yiwet n tmeṭṭut aţ-ţagem, akken i teţwaliḍ di ţţeswiṛa. Σisa yenna-yas: ‘Efk-iyi-d ad sweγ.’

Σisa yeţmeslay neţţa ţ-ţmeṭṭut n wat Cumrun

Tameṭṭut-nni tewhem aṭas. Teẓriḍ ayγer? Axaṭer Σisa yella d Uday, ma d neţţat n wat Cumrun. Yuγ lḥal azgen ameqran n Wudayen keṛhen At Cumrun yerna γunzan-ten ula d aγunzu. Lameεna Σisa iḥemmel imdanen n mkul ccetla. Yenna-yas ihi: ‘Lemmer teẓriḍ anwa i m-d-yessutren aman, tili d kemm ara s-yessutren a m-d-yefk aţ-ţesweḍ; neţţa, d aman yessidiren ara m-d-yefk.’

Tameṭṭut-nni tenna-yas: ‘A sidi, lbir-agi lqay yerna ur tesεiḍ ula d abidun s wacu ara d-tagmeḍ. Ansi ara k-d-kken ihi waman-agi yessidiren?’

Σisa yessefhem-as: ‘Lemmer aţ-ţesweḍ seg waman n lbir-agi, aţ-ţuγaleḍ aţ-ţfadeḍ. Lameεna aman ara fkeγ nekkini zemren ad fken tudert n dayem.’

Tameṭṭut-nni terra-yas: ‘A sidi, efk-iyi-d seg waman-agi iwakken ur ţţuγaleγ ara ad fadeγ, iwakken ur d-ţţuγaleγ ara yakk γer dagi ad agmeγ.’

Tameṭṭut-nni tγil belli Σisa iheddeṛ-ed γef waman n ṣṣeḥ. Lameεna Σisa, neţţa, iţmeslay-ed γef tideţ yeεnan Ṛebbi ţ-ţgelda-s. Tideţ-agi tecba aman yeţţaken tudert. Tezmer aţ-ţessider imdanen i dima.

Mbeεd, Σisa yenna-yas: ‘Ṛuḥ ssiwel i wergaz-im umbeεd tuγaleḍ-d γer dagi.’

Tameṭṭut-nni terra-yas: ‘Ur sεiγ ara argaz.’

Σisa yenna-yas: ‘Ţ-ţideţ i d-tenniḍ, meεna xemsa iberdan i tzewǧeḍ ma d win yellan yid-em ass-a mačči d argaz-im.’

Tameṭṭut-nni tewhem xilla axaṭer ayen akk i d-yenna Σisa d ṣṣeḥ. Amek i geẓra Σisa leḥwayeǧ-agi meṛṛa? Tecfiḍ, d Ṛebbi i d-iceggεen Σisa γer lqaεa. D neţţa ihi i s-d-yemlan lumuṛ-agi meṛṛa. Di teswiεt-nni kan wwḍen-d inelmaden n Σisa. Mi t-id-ufan yeţmeslay neţţa ţ-ţmeṭṭut n wat Cumrun, wehmen aṭas.

Acu i nezmer a neḥfeḍ si teqsiṭ-agi? Σisa ixeddem lxiṛ i yemdanen n mkul ccetla. Ula d nekni ilaq a nxeddem am neţţa. Ur ilaq ara a s-nini belli kra n lεibad diri-ten axaṭer llan si ccetla nniḍen. Σisa yebγa imdanen meṛṛa ad issinen tideţ yeţţawin γer tudert n dayem. Ula d nekni, nebγa a nεiwen imdanen ad issinen tideţ.

Yuḥenna 4:5-43; 17:3.



Isteqsiyen

  • Acimi yeḥbes Σisa γer tama n yiwen n lbir yellan di tmurt n Cumrun? Acu yenna i tmeṭṭut-nni i d-iṛuḥen aţ-ţagem aman?
  • Ayγer i tedhec tmeṭṭut-nni? Acu i s-yenna Σisa, yerna acimi?
  • Σisa ihdeṛ i tmeṭṭut-nni γef waman. Anwa aman wuγur i txemmem? Lameεna di tin n ṣṣeḥ, anwa aman iγef i d-immeslay?
  • Ayγer i tewhem tmeṭṭut-nni mi twala ayen akk yessen fell-as Σisa? Amek i geẓra annect-a meṛṛa?
  • Acu i nezmer a nelmed si teḥkayt-agi n tmeṭṭut n wat Cumrun?

Isteqsiyen nniḍen

  • Γer Yuḥenna 4:5-43.

    Am Σisa, amek i glaq aţ-ţili tikli-nneγ zdat n wid i γ-ixulfen ama di ccetla ama di ssεaya? (Yuḥ. 4:9; 1 Kurin. 9:22; 1 Tim. 2:3, 4; Tit 2:11)

    Anti lfaydat di leḥwayeǧ n ṛṛuḥ i geţṛaǧun win ara yuγalen d anelmad n Σisa? (Yuḥ. 4:14; Icεa. 58:11; 2 Kurin. 4:16)

    Amek i nezmer a d-nbeggen asteεṛef am tmeṭṭut-nni n Cumrun i ghedṛen s lfeṛḥ γef wayen i tesla? (Yuḥ. 4:7, 28; Matta 6:33; Luqa 10:40-42)