TWALAḌ titbirt-agi i d-yeţṣubbun γef uqerru n wergaz-agi? Argaz-a d Σisa. Tura yesεa 30 n sna di leεmeṛ-is. Wagi yellan γer tama-s d Yeḥya. Nemmeslay-ed ciṭuḥ fell-as uqbel. Tecfiḍ acu yeḍran asmi i tṛuḥ Meryem γer Ilicaba, tameṭṭut-nni i s-iţţilin? Llufan yellan di tεebbuṭ-is yefrawes si lfeṛḥ. Llufan-agi d Yeḥya. Lameεna, acu akka xeddmen dagi di sin yid-sen?

Aγḍas n Σisa

Atan Yeḥya akken kan yebbeγ Σisa deg wasif n Uṛdun. Ayen akka i s-yexdem qqaren-as aγḍas. Lmeεna-s: amdan ad iţwabbeγ deg waman s lekmal-is, umbeεd a d-iţwakkes syenna. D ayen i gxeddem Yeḥya i lγaci, daymi i s-ssawalen Yeḥya aγeṭṭas. Lameεna, acu i t-yewwin ad yesseγḍes Σisa?

D Σisa s yiman-is i s-yessutren a t-yesseγḍes. Yeḥya yesseγḍas wid akk yebγan a d-beggnen zdat n lγaci belli nedmen di yir lefεayel-nsen. Lameεna, yella wasmi yexdem Σisa lḥaǧa n diri iγef yendem? Xaṭi, leεmeṛ yexdim ayen n diri axaṭer yella d Mmi-s awḥid n Ṛebbi i d-yekkan seg igenni. Γef ssebba nniḍen ihi i geḍleb i Yeḥya a t-yesseγḍes. Anta-ţ ssebba-yagi? D ayen ara nwali tura.

Uqbel ad iṛuḥ γer Yeḥya, Σisa yella d aneǧǧaṛ. Aneǧǧaṛ d amdan ixeddmen leḥwayeǧ s wesγar am ṭṭwabel d ikersiyen. Yusef, argaz n Meryem, yella d aneǧǧaṛ. D neţţa i gesseḥfḍen lxedma-yagi i Σisa. Lameεna Yahwa ur d-iceggeε ara Mmi-s γer lqaεa iwakken ad yili d aneǧǧaṛ. Γef ccγel nniḍen isεan azal ameqran i t-id-iceggeε. Tura iwweḍ-ed lweqt ad ibdu Σisa ccγel-agi. Iwakken a d-ibeggen zdat n lγaci belli iṛuḥ-ed ad ixdem lebγi n Baba-s, yessuter i Yeḥya a t-isseγḍes. Ifṛeḥ Ṛebbi s wannect-a?

Ifṛeḥ aṭas axaṭer mi d-yeffeγ Σisa seg waman, tekka-d yiwet n taγect seg igenni, tenna-d: ‘Wagi d Mmi, deg-s i gella lfeṛḥ-iw.’ Imiren kan amzun ldin igenwan, dγa tṣubb-ed yiwet n tetbirt γef Σisa. Lameεna, mačči ţ-ţitbirt n ṣṣeḥ. D ṛṛuḥ iqedsen n Ṛebbi i d-yersen s ṣṣifa n tetbirt.

Tura aṭas n leḥwayeǧ iγef ilaq ad imeyyez Σisa. Γef wayagi i gṛuḥ weḥd-es 40 n wussan γer yiwen n wemkan. Dinna, Cciṭan iqerreb-ed γur-es. Tlata iberdan i geεreḍ ad yawi Σisa ad iεaṣi lumuṛ n Ṛebbi. Lameεna Σisa ur s-issemḥess ara.

Umbeεd, mi d-yebren syenna, Σisa yemmuger-ed kra n yergazen i guγalen d inelmaden-is imezwura. Inelmaden d wid yettabaεen lateṛ n bnadem. Kra seg-sen ţţusemman Andriyus, Buṭrus (iţţusemman daγen Semεun), Filbas akk-d Natanahil (iţţusemman daγen Bartelmay). Σisa d inelmaden-agi ijdiden ṛuḥen γer tmurt n Jlili. Dinna ḥebsen di Kana, tamdint n Natanahil. Σisa iṛuḥ γer yiwet n tmeγra tameqrant anda yexdem lbeṛhan amezwaru. Teẓriḍ d acu-t? Yerra aman d ccṛab.

Matta 3:13-17; 4:1-11; 13:55; Marqus 6:3; Yuḥenna 1:29-51; 2:1-12.



Isteqsiyen

  • Anwa-ten sin yergazen-agi i teţwaliḍ di ţţeswiṛa?
  • Amek i nesseγḍas albeεḍ?
  • Anwi i guγ tannumi yesseγḍas Yeḥya?
  • Acuγer i geḍleb Σisa i Yeḥya a t-yesseγḍes?
  • Amek i d-ibeggen Ṛebbi belli yeεǧeb-as weγḍas n Σisa?
  • Acu yeḍran asmi i gṛuḥ Σisa 40 wussan γer yiwen wemkan yexlan?
  • Ini-d ismawen n kra n inelmaden imezwura n Σisa. Anwa lbeṛhan amezwaru i gexdem Σisa?

Isteqsiyen nniḍen

  • Γer Matta 3:13-17.

    Anwa lemtel i d-yeǧǧa Σisa deg wayen yeεnan aγḍas n inelmaden-is? (Ahel. 40:7, 8; Matta 28:19, 20; Luqa 3:21, 22)

  • Γer Matta 4:1-11.

    Σisa yessexdam akken i glaq Adlis Iqedsen. Amek i γ-iţdemmir waya akken a neqqar daymen Adlis Iqedsen? (Matta 4:5-7; 2 Buṭ. 3:17, 18; 1 Yuḥ. 4:1)

  • Γer Yuḥenna 1:29-51.

    Γer wuγur i gwelleh Yeḥya aγeṭṭas inelmaden-is? Amek i nezmer a t-nεaned? (Yuḥ. 1:29, 35, 36; 3:30; Matta 23:10)

  • Γer Yuḥenna 2:1-12.

    Amek i d-yessken lbeṛhan amezwaru n Σisa belli Yahwa ur itekkes ara ayen yelhan i iqeddacen-is? (Yuḥ. 2:9, 10; Ahel. 84:11; Yeε. 1:17)