Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 87: Σisa di lemqam

Taqsiṭ tis 87: Σisa di lemqam

MUQEL aqcic-agi amecṭuḥ yeţmeslayen d yemγaren. Imγaren-agi d lecyux n lemqam n Ṛebbi yellan di temdint n Yarucalim, ma d aqcic-a d Σisa. Tura atan yesεa 12 n sna di leεmeṛ-is.

Lecyux-agi wehmen axaṭer aṭas n leḥwayeǧ i gessen Σisa γef Ṛebbi d wayen yuran deg Wedlis Iqedsen. Lameεna acuγer ur llin ara yid-es imawlan-is? Anida-ten? D ayen ara nwali tura.

Asmi yella Σisa d amecṭuḥ yeţmeslay neţţa d lecyux

Mkul aseggas, Yusef ţ-ţwacult-is ţṛuḥun γer temdint n Yarucalim iwakken ad ḥedṛen i yiwen lεid ur necbi wayeḍ yeţţusemman Lεid n Usuref (iwumi qqaren kra Tafaska). Abrid si Naṣaret γer temdint n Yarucalim iḍul aṭas axaṭer ulac tikeṛṛusin neγ timacinin di zzman-nni. Azgen ameqran n yemdanen teddun γef uḍar. Ilaq-asen telt eyyam iwakken ad awḍen γer temdint n Yarucalim.

Yiwen wass, Yusef d Meryem kkren ad uγalen γer Naṣaret mi gfukk Lεid n Usuref. Lameεna aseggas-agi aṭas yid-sen i llan. Σisa yesεa aṭas n watmaten ţ-ţyessetmatin mecṭuḥen. Yusef d Meryem ilaq-asen ihi ad lhun yid-sen meṛṛa. M’akken i llan deg webrid, γilen yedda Σisa ţ-ţerbaεt nniḍen axaṭer ur t-walan ara γer tama-nsen. Lameεna, mi ḥebsen tikli tameddit, ur ufin ara Σisa. Qellben fell-as ger wid akk i sen-yeţţilin d leḥbab-nsen, lameεna ulac lexbaṛ-is. Ihi, uγalen γer temdint n Yarucalim iwakken ad nadin fell-as.

Γer taggara ufan Σisa di lemqam, yeqqim ger lecyux, ismeḥsis-asen yerna isteqsay-iten. Lγaci meṛṛa wehmen di lefhama-s. Lameεna Meryem tenna-yas: ‘A mmi, acuγer i γ-txedmeḍ akka? Nekk d baba-k neṛwa aḥebbeṛ, acḥal i nqelleb fell-ak.’

Σisa yerra-yasen: ‘Acuγer i teţqellibem fell-i? Eεni ur teẓrim ara belli ilaq-iyi ad iliγ deg wexxam n Baba?’

Σisa iḥemmel imeḍqan anda yezmer ad iḥfeḍ aṭas n leḥwayeǧ γef Ṛebbi. Mačči d imeḍqan-agi i γ-ilaq a nḥemmel ula d nekni? Mi d-yuγal γer Naṣaret, Σisa iḥeddeṛ mkul dduṛt (smana) i inejmuεen yeεnan leεbada. Dinna yeţţak dima tameẓẓuγt, daymi i geḥfeḍ aṭas n leḥwayeǧ γef Wawal n Ṛebbi. Yelha mliḥ ma netbeε lemtel n Σisa.

Luqa 2:41-52; Matta 13:53-56.



Isteqsiyen

  • Σlaḥsab n ţţeswiṛa, acḥal di leεmeṛ n Σisa? Anida yella?
  • Acu i gxeddem Yusef neţţa ţ-ţwacult-is mkul aseggas?
  • Yusef d Meryem lḥan ass kamel akken ad uγalen s axxam-nsen. Lameεna, acuγer i d-uγalen γer Yarucalim?
  • Anda i ufan Σisa Yusef d Meryem? Acuγer i wehmen lγaci?
  • Acu yenna Σisa i yemma-s Meryem?
  • Amek i nezmer a neḥfeḍ leḥwayeǧ γef Ṛebbi am Σisa?

Isteqsiyen nniḍen

  • Γer Luqa 2:41-52.

    Di Lqanun, d lfeṛḍ γef yergazen kan ad ḥedṛen i leεwayed n yal aseggas. Anwa lemtel ifazen i d-ǧǧan Yusef d Meryem i imawlan n zzman-nneγ? (Luqa 2:41; Asmek. 16:16; 31:12; Lem. 22:6)

    Amek i d-yeǧǧa Σisa lemtel ifazen i yelmeẓyen n wass-a deg wayen yeεnan tiγin n wawal i imawlan? (Luqa 2:51; Asmek. 5:16; Lem. 23:22; Kulus 3:20)

  • Γer Matta 13:53-56.

    Anwa-ten ṛebεa watmaten n Σisa iγef i d-immeslay Wedlis Iqedsen? Sin i gqedcen di tejmaεt tamasiḥit. Teẓriḍ anwa-ten? (Matta 13:55; Lec. 12:17; 15:6, 13; 21:18; Gal. 1:19; Yeε. 1:1; Yuda 1)