Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 86: Irgazen yeţţuwellhen s yetri

Taqsiṭ tis 86: Irgazen yeţţuwellhen s yetri
Imkucaf

TWALAḌ itri-yinna yeţfeǧǧiǧen uγur iţwehhi wergaz-a? Irgazen-agi i teţwaliḍ d imkucaf yessenṭaqen itran. Ṛuḥen-d si Ccerq axaṭer nwan a ten-yawi yetri-yagi ajdid γer walbeεḍ mechuṛen.

Asmi i wwḍen γer temdint n Yarucalim (iwumi qqaren kra Lquds) steqsan: ‘Anda yella weqcic-nni ara yuγalen d agellid n Wudayen?’ “Udayen” d isem wis sin n wat Isṛayil. Nnan daγen: ‘Axaṭer nwala-d itri-ines si Ccerq, nusa-d a t-neεbed.’

Hiṛudus yellan d agellid n temdint n Yarucalim yerwi lxaṭer-is mi gesla i lexbaṛ-agi. Ur yebγi ara ad yeṭṭef ugellid nniḍen amkan-is. Hiṛudus yesnejmaε-ed ihi imeqranen n lmuqeddmin, isteqsa-ten: ‘Anda ara d-ilal ugellid-nni i d-yewεed Ṛebbi?’ Rran-as: ‘Di temdint n Bit-Liḥim.’

Hiṛudus yessawel i yergazen-nni i d-yusan si Ccerq, yenna-yasen: ‘Ṛuḥet, nadit γef weqcic-nni. M’ara t-tafem, xebbṛet-iyi-d iwakken ad ṛuḥeγ a t-εebdeγ ula d nekk.’ Lameεna, di tin n ṣṣeḥ, Hiṛudus d lmut-is i gebγa.

Ihi irgazen-nni ṭṭfen abrid ṛuḥen. Tebεen itri-nni i ten-yewwin armi d Bit-Liḥim, γer wexxam anda yella weqcic-nni. Mi kecmen γer daxel, ufan dinna Meryem d Σisa. Dγa mudden i Σisa tikciwin i s-d-wwin. Iεedda kra n lweqt, Yahwa yenna-yasen di targit: ‘Ur ţţuγalet ara γer ugellid Hiṛudus.’ Dγa uγalen γer tmurt-nsen seg webrid nniḍen.

Asmi i gesla Hiṛudus belli irgazen-nni i d-yusan si Ccerq ṛuḥen, ikcem-it zzεaf d ameqran. Dγa yumeṛ ad nγen arrac meṛṛa yesεan sin iseggasen d akessar yellan di temdint n Bit-Liḥim. Lameεna Yahwa yessaweḍ lexbaṛ i Yusef di targit. Dγa Yusef yerwel neţţa ţ-ţwacult-is γer tmurt n Maṣer. Mi gεedda kra n lweqt, Yusef ţ-ţwacult-is uγalen γer wexxam-nsen yellan di Naṣaret axaṭer slan belli yemmut Hiṛudus. Dinna i d-ikker Σisa.

Teẓriḍ anwa i gewwin itri-nni ad icceεceε? A nxemmem ciṭuḥ. Tecfiḍ γef yergazen-nni i d-yusan si Ccerq? Γer temdint n Yarucalim i ṛuḥen di tazwara asmi i walan itri-nni. Cciṭan Iblis ibγa lmut n Mmi-s n Ṛebbi yerna yeẓra belli Hiṛudus, agellid n Yarucalim, ad iqelleb ad ineγ Σisa. D Cciṭan ihi i gellan deffir uceεceε n yetri-nni.

Matta 2:1-23; Mixa 5:2.



Isteqsiyen

  • Anwa-ten yergazen-agi i teţwaliḍ di ţţeswiṛa?
  • Acimi yetḥeyyeṛ mliḥ ugellid Hiṛudus? Acu yexdem?
  • Sani yewwi yetri-nni yeţfeǧǧiǧen irgazen-nni? Lameεna acuγer uγalen γer tmurt-nsen seg webrid nniḍen?
  • Anwa lameṛ i gefka Hiṛudus, yerna acuγer?
  • Acu yenna Yahwa i Yusef a t-yexdem?
  • Anwa i gewwin itri-nni ad icceεceε, yerna acimi?

Asteqsi nniḍen

  • Γer Matta 2:1-23.

    Acḥal di leεmeṛ n Σisa asmi i rzan imkucaf-nni fell-as? Anda yezdeγ imiren-nni? (Matta 2:1, 11, 16)