Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 85: Σisa ilul-ed deg udaynin

Taqsiṭ tis 85: Σisa ilul-ed deg udaynin

TEẒRIḌ anwa-t llufan-agi? D Σisa. Atan tura kan i d-ilul deg udaynin. Akken i teţwaliḍ di ţţeswiṛa-yagi, Meryem tṛuḥ aţ-ţesgen Σisa di lmedwed, amkan anda srusuyen ahicuṛ (asaγur) i lmal. Lameεna, acu akka i txeddem Meryem neţţat d Yusef deg udaynin-agi? Mačči d amkan anda i d-ţlalen llufanat, neγ ala?

Wagi d ayen ibanen! Aţah ihi ssebba i ten-id-yewwin γer dagi: Ugusti Qayṣer yellan d aneḥkam n Ṛuma, yessufeγ-ed yiwen n lqanun i gumṛen i mkul yiwen ad yuγal γer temdint anda ilul akken ad iţţujerred yisem-is deg yiwet n tektabt. Yusef iṛuḥ ihi ad iţţujerred di Bit-Liḥim (Bitelḥem), tamdint anida ilul. Lameεna mi yewweḍ neţţa d Meryem γer dinna, ur ufin ara amkan anda ara nsen. D annect-a i ten-id-yewwin γer udaynin-agi. Ass-nni swaswa ideg i wwḍen i d-ilul Σisa! Meεna akken i t-teţwaliḍ, ur t-yuγ wara.

Yusef, Meryem akk-d Σisa yellan d llufan

Twalaḍ imeksawen-inna i d-iteddun ad ẓren Σisa? Uqbel a d-ṛuḥen, llan di lexla ţεassan lmal-nsen deg yiḍ. Lameεna ciṭ kan akka, tecceεceε-ed yiwet n tafat, tezzi-yasen-d meṛṛa. Teẓriḍ d acu i walan? D yiwen n lmelk! Imeksawen-nni ikcem-iten lxuf d ameqran. Lameεna lmelk-nni yenna-yasen: ‘Ur ţţagadet ara! Aql-i wwiγ-awen-d lexbaṛ n lxiṛ. Ass-a di Bit-Liḥim, ilul-ed Σisa Lmasiḥ, amsellek n yemdanen! Aţ-ţafem llufan-agi yeţţel yerna yeṭṭeṣ di lmedwed.’ Imiren kan usant-ed waṭas n lmalayek, bdant ţḥemmident Ṛebbi. S lemγawla imeksawen-nni qellben γef Σisa armi i t-ufan.

Teẓriḍ ayγer yesεa Σisa azal ameqran? Tεelmeḍ anwa i gella s ṣṣeḥ? Tecfiḍ? Di teqsiṭ tamezwarut n wedlis-agi, nehdeṛ-ed γef lxelq amenzu n Ṛebbi i geḥseb am mmi-s. Mmi-s-agi iεawen Yahwa asm’akken i d-ixleq igenwan, lqaεa d leḥwayeǧ meṛṛa nniḍen. D Σisa i d lxelq-agi amenzu!

Yahwa yeddem tudert n Mmi-s yellan deg igenni, iger-iţ di tεebbuṭ n Meryem. Din din llufan-nni yebda yeţnerni am llufanat akk nniḍen. Lameεna llufan-agi d Mmi-s n Ṛebbi! Γer taggara, Σisa ilul-ed di Bit-Liḥim, deg udaynin-agi ger lmal. Tfehmeḍ tura acimi i feṛḥent lmalayekkat m’akken i d-xebbṛent lγaci s tlalit n Σisa?

Luqa 2:1-20.



Isteqsiyen

  • Anwa-t llufan-agi yellan di ţţeswiṛa? Anda i tṛuḥ a t-tesgen Meryem?
  • Acimi i d-ilul Σisa deg udaynin ger lmal?
  • Akken i teţwaliḍ di ţţeswiṛa, anwa-ten yergazen-inna i d-yusan s adaynin? Acu i sen-yenna yiwen n lmelk?
  • Ayγer yesεa Σisa azal ameqran?
  • Acuγer i nezmer a d-nini belli Σisa d Mmi-s n Ṛebbi?

Isteqsiyen nniḍen

  • Γer Luqa 2:1-20.

    Qayṣer yexdem yiwet lḥaǧa yesseḍran ayen i d-yenna Wedlis Iqedsen γef tlalit n Σisa. Teẓriḍ d acu-ţ? (Luqa 2:1-4; Mixa 5:2)

    Amek i gezmer bnadem ad yeţwaḥseb ger “yemdanen eεzizen” γef Ṛebbi? (Luqa 2:14; Matta 16:24; Yuḥ. 17:3; Lec. 3:19; Iεeb. 11:6)

    Imeksawen n Yahuda yesεan annuz feṛḥen s tlalit n wemsellek. Acuγer i zemren ad feṛḥen akteṛ-nsen iqeddacen n Ṛebbi n wass-a? (Luqa 2:10, 11; Ifas. 3:8, 9; Aweḥ. 11:15; 14:6)