Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 100: Σisa di tmazirt n Jitsimani

Taqsiṭ tis 100: Σisa di tmazirt n Jitsimani

MI D-FFΓEN si tγurfeţ-nni, Σisa d yemceggεen-is lḥan armi ţ-ţamazirt n Jitsimani, amkan iγer ṛuḥen acḥal d abrid yakan. Dinna, Σisa yenna i yemceggεen-is ad εiwzen yerna ad ẓẓallen. Imiren issebεed cwiṭ iman-is fell-asen, yeγli γef wudem iwakken ad idεu γer Ṛebbi.

Mbeεd, Σisa yuγal γer yemceggεen-is. Teẓriḍ amek i ten-yufa? Yufa-ten ṭṭṣen! Telt meṛṛat i sen-yumeṛ ad εiwzen, lameεna mkul mi guγal γur-sen iţţaf-iten gnen. M’akken i guγal tikkelt taneggarut, yenna-yasen: ‘Amek i gezmer a kkun-id-yas nadam di tegniţ am tagi? Lweqt ideg ara ţwasellmeγ ger ifassen n yeεdawen-iw iwweḍ-ed.’

Mazal-it iţmeslay mi slan i ṣṣut n waṭas n lγaci. Twalaḍ irgazen-agi i d-yusan s iεekkzan, s lessyuf akk-d isufa? Uqbel ad awḍen γer Σisa d inelmaden-is, yiwen seg-sen yezwar zdat-sen, iṛuḥ issuden Σisa, akken i t-teţwaliḍ di ţţeswiṛa-ya. Argaz-agi d Yudas n Qeryut. Acuγer i gessuden Σisa?

Yudas yenkeṛ Σisa

Issuden-it axaṭer asuden-agi d limaṛa swayes ara teεqel terbaεt-nni i d-yeddan d Yudas anwa i d Σisa. Σisa yenna-yas ihi: ‘A Yudas, s usuden ara yi-txedεeḍ?’ Imiren kan iεdawen n Σisa mmγen fell-as akken a t-ṭṭfen. Lameεna Buṭrus ur ten-iţţaǧǧa ara a t-awin mebla ma yennuγ γef ddemma-s. Ijbed-ed ssif i d-yewwi yid-es, iwet yis yiwen wergaz yellan γer tama-s. Izgel aqerruy-is, meεna yewwi-yas ameẓẓuγ ayeffus. Acu kan Σisa issers afus-is γef umeẓẓuγ n wergaz-nni, dγa yeḥla.

Σisa yenna i Buṭrus: ‘Err ssif-inek γer wemkan-is. Eεni tγileḍ ur zmireγ ara ad ssutreγ i Baba a yi-d-iceggeε luluf n lmalayekkat akken ad ḥarbent fell-i?’ Ih, lukan yebγi yezmer ad ixdem annect-a. Lameεna ur yessuter acemma i Ṛebbi axaṭer yeẓra belli yewweḍ-ed lawan ideg ilaq a t-ṭṭfen yeεdawen-is. Ihi yeǧǧa-ten a t-awin. A nwali tura d acu yeḍran d Σisa.

Matta 26:36-56; Luqa 22:39-53; Yuḥenna 18:1-12.



Isteqsiyen

  • Sani i ṛuḥen Σisa d yemceggεen-is mi d-ffγen si tγurfeţ-nni? Acu i sen-yumeṛ?
  • Amek i d-yufa Σisa imceggεen-is m’akken i guγal γur-sen? Acḥal iberdan i d-yeḍra waya?
  • Anwa i gkecmen γer tmazirt? Akken i teţwaliḍ di ţţeswiṛa, acu yexdem Yudas n Qeryut?
  • Ayγer Yudas yessuden Σisa, yerna acu yexdem Buṭrus?
  • Acu yenna Σisa i Buṭrus? Acimi ur yessuter ara i Ṛebbi a s-d-iceggeε lmalayekkat akken ad ḥarbent fell-as?

Isteqsiyen nniḍen

  • Γer Matta 26:36-56.

    Amek ţţawil yessexdem Σisa akken ad inhu inelmaden-is yella d lemtel ifazen i lecyux di tjemmuyaε di lweqt-nneγ? (Matta 20:25-28; 26:40, 41; Gal. 5:17; Ifas. 4:29, 31, 32)

    Amek i geţwali Σisa arfad n leslaḥ γef bunadem? (Matta 26:52; Luqa 6:27, 28; Yuḥ. 18:36)

  • Γer Luqa 22:39-53.

    Iḍher-ed lmelk i Σisa di tmazirt n Jitsimani akken a t-isseǧhed. Ma ibeggen-ed wannect-a belli ixuṣṣ Σisa di liman? Ssefhem-ed. (Luqa 22:41-43; Icεa. 49:8; Matta 4:10, 11; Iεeb. 5:7)

  • Γer Yuḥenna 18:1-12.

    Amek i gḥureb Σisa γef inelmaden-is zdat n yeεdawen-is? Acu i γ-yesselmed lemtel-agi? (Yuḥ. 10:11, 12; 18:1, 6-9; Iεeb. 13:6; Yeε. 2:25)