Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 80: Tekfa lγerba fell-asen

Taqsiṭ tis 80: Tekfa lγerba fell-asen

QRIB ad awḍen tura εamayen seg wasmi i teγli temdint n Babil ger ifassen n wat Maday d wat Faras. Wali tura d acu akka iḍerrun! Atan At Isṛayil ǧǧan Babil! Amek i d-ţţuserrḥen? Anwa i ten-yeǧǧan ad ṛuḥen?

D Sirus, agellid n Faras. Aṭas n lweqt uqbel talalit n Sirus, Yahwa yenna-d s yimi n nnbi Icεaya belli ger ifassen n ugellid-agi ara teγli temdint n Babil axaṭer tiwwura-ines ad qqiment ldint. Ayen i d-yenna meṛṛa Yahwa yeḍra. D Sirus i gezwaren zdat n wat Maday d wat Faras akken ad steεmṛen Babil. Kecmen deg yiḍ γer Babil si tewwura-ines yeqqimen ldint.

Lameεna Icεaya, nnbi n Yahwa, yenna-d daγen belli Sirus ad yefk lameṛ akken ad εiwden lebni n Yarucalim d lemqam-is. Sirus yefka lameṛ-agi? Ih. Atah wayen i gumeṛ i wat Isṛayil: ‘Ṛuḥet γer Yarucalim yerna bnut lemqam n Yahwa Ṛebbi-nwen.’ D ayen i ṛuḥen ad xedmen wat Isṛayil akken i teţwaliḍ di ţţeswiṛa-yagi.

At Isṛayil ǧǧan Babil

At Isṛayil yellan di Babil ur zmiren ara ad uγalen irkulli γer Yarucalim imi iḍul webrid (800 kilumitrat). Aṭas deg-sen i teǧǧa ṣṣeḥḥa, ma d wiyaḍ uγalen d imγaren. Lameεna, kra, d ssebbat nniḍen i ten-yeṭṭfen. I wid yeqqimen, agellid Sirus yefka lameṛ-agi: ‘Fket lfeṭṭa, ddheb ţ-ţikciwin nniḍen i wid ara yuγalen ad εiwden lebni n Yarucalim d lemqam-is.’

Fkan ihi tikciwin i wid yekkren ad ṛuḥen γer Yarucalim. Sirus yerra-yasen ifenǧalen ţ-ţeqbucin i d-yewwi ugellid Nabuxadnuẓur si lemqam n Yahwa, di zzman-nni ideg i ghudd Yarucalim. Akka, At Isṛayil ur ţţuγalen ara ifassen d ilmawen.

Mi εeddan wazal n ṛebεa wagguren, At Isṛayil leḥqen γer Yarucalim di lawan iγef i d-ihdeṛ Ṛebbi. Ih, tamdint n Yarucalim εeddan fell-as swaswa 70 iseggasen segmi i teγli. Di leεwam-agi meṛṛa tamurt teqqim texla, ur teţwazdeγ ara. Tura m’akka i d-uγalen wat Isṛayil, ţ-ţiswiεin iweεṛen i ten-iţṛaǧun. D ayen ara nwali.

Icεaya 44:28; 45:1-4; Σazra 1:1-11



Isteqsiyen

  • Akken i twalaḍ di ţţeswiṛa, acu akka i xeddmen wat Isṛayil?
  • Amek i gessaweḍ Sirus ayen i d-yenna Yahwa seg yimi n Icεaya?
  • Acu yumeṛ Sirus i wat Isṛayil ur nezmir ara ad uγalen γer Yarucalim?
  • Acu yefka Sirus i wegdud akken a t-yawi γer Yarucalim?
  • Acḥal n lweqt i qqimen wat Isṛayil deg webrid uqbel ad awḍen γer Yarucalim?
  • Acḥal n lweqt i teqqim texla tmurt?

Isteqsiyen nniḍen

  • Γer Icεaya 44:28 d 45:1-4.

    Amek i d-yefka Yahwa ṭṭmana belli ayen i d-yenna γef Sirus ad yeḍru mebla ccekk? (Icεa. 55:10, 11; Ṛuma 4:17)

    Amek i d-ibeggen wayen i d-yenna Icεaya γef Sirus belli d Yahwa i gzemren a d-imel ayen ara yeḍrun γer zdat? (Icεa. 42:9; 45:21; 46:10, 11; 2 Buṭ. 1:20)

  • Γer Σazra 1:1-11.

    Am wid-nni ur nuγal ara γer Yarucalim, amek i nezmer ass-a a nεiwen wid i zemren ad ilin di leqdic n Yahwa lweqt kamel? (Σazra 1:4, 6; Ṛuma 12:13; Kulus 4:12)