Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 79: Di tesraft n yizmawen

Taqsiṭ tis 79: Di tesraft n yizmawen

ATAN waqila Danyil di yir liḥala! Lameεna akken i teţwaliḍ, izmawen-agi ur s-xdimen acemma! Teẓriḍ acuγer? Anwa i gḍeggren nnbi Danyil γer tesraft-agi? D ayen ara nwali tura.

D Daryabic i gellan tura d agellid n Babil. Agellid-agi iḥemmel aṭas Danyil axaṭer yelha yerna d ukyis. Γef waya i t-yerra d aneḥkam ameqran di tgelda-s. Lameεna aṭas i gusmen di Danyil axaṭer εziz γer Daryabic. Ihi, sani i ten-wwint tismin-nsen?

Daryabic

Mi msefhamen yemcumen-agi wway gar-asen, ṛuḥen γer Daryabic, nnan-as: ‘Ay agellid, yelha ma tessufγeḍ-d yiwen n lqanun ara d-yinin belli deg wazal n 30 wussan, kra n win ara yedεun γer uṛebbit neγ γer wemdan nniḍen, siwa γer γur-ek, ad iţţuḍegger γer tesraft n yizmawen.’ Daryabic ur yeẓri ara acuγer i bγan lqanun-agi. Lameεna yura-t axaṭer iεǧeb-as uxemmem-nsen. Tura ur yezmir ḥedd a t-ibeddel.

Mi gesla Danyil belli yeffeγ-ed lqanun-agi ajdid, iṛuḥ s axxam-is ad iẓẓall Yahwa akken yuγ tannumi. Iεdawen n Danyil ẓran belli ur yeţţaǧǧa ara taẓallit. Tura feṛḥen axaṭer nwan yeγli di tceṛkeţ-nsen.

Agellid Daryabic iγaḍ-it lḥal mi gefhem anwa i gḥuza lqanun-agi. Lameεna ur yezmir ara a t-ibeddel. Yumeṛ ihi ad ḍeggren Danyil γer tesraft n yizmawen. Meεna, agellid yenna i Danyil: ‘Ţmenniγ a k-isellek Ṛebbi i teţεebbideḍ.’

Daryabic yetqelleq aṭas deg yiḍ-nni armi i s-iṛuḥ yiḍeṣ. Azekka-nni ṣṣbeḥ yuzzel γer tesraft-nni n yizmawen. Twalaḍ-t di ţţeswiṛa-ya? Sennig n tesraft-nni iεeggeḍ: ‘A Danyil, ay aqeddac n Ṛebbi yeddren! Isellek-ik seg yizmawen Ṛebbi i teţεebbideḍ?’

Danyil di tesraft n yizmawen

Danyil yerra-yas: ‘Ṛebbi iceggeε-ed lmelk-is akken ad yeγleq imawen n yizmawen, daymi ur iyi-ččin ara.’

Mi gesla ugellid i imeslayen-agi, yefṛeḥ aṭas. Yeḍleb a d-ssufγen Danyil si tesraft-nni, yerna yumeṛ ad ḍeggren γur-es imcumen-nni i gebγan lmut-is. Werεad wwiḍen γer lqaε n tesraft-nni mi ten-ḥewṣen yizmawen yerna rẓan akk iγsan-nsen.

Yuγal Daryabic yura i wid akk yellan ddaw leḥkem-is: ‘Qadret Ṛebbi n Danyil i gxedmen leεǧayeb imeqranen. Isellek-it-id seg yizmawen.’

Danyil 6:1-28.



Isteqsiyen

  • Anwa i d Daryabic? Acu i geţxemmim γef Danyil?
  • Acu wwin ad yexdem ugellid wid yusmen di Danyil?
  • Acu yexdem Danyil asmi yesla yeffeγ-ed lqanun-nni ajdid?
  • Acuγer yetqelleq Daryabic armi i s-iṛuḥ yiḍeṣ? Acu yexdem azekka-nni ṣṣbeḥ?
  • Anwa lǧawab i gerra Danyil i Daryabic?
  • Acu yeḍran d yemcumen-nni i gεerḍen ad nγen Danyil? Acu yura Daryabic i imezdaγ meṛṛa n tgelda-s?

Isteqsiyen nniḍen

  • Γer Danyil 6:1-28.

    Kra n yergazen mcawaṛen akken ad nγen Danyil. Amek i γ-d-yesmektay waya ayen i xedmen di zzman-nneγ yexṣimen akken ad ḥebsen ccγel n Inagan n Yahwa? (Dan. 6:7; Ahel. 94:20; Icεa. 10:1; Ṛuma 8:31)

    Amek i zemren iqeddacen n Ṛebbi ad εanden Danyil deg wayen yeεnan ṭṭaεa i lḥukumat n ddunit? (Dan. 6:5, 10; Ṛuma 13:1; Lec. 5:29)

    Danyil yezga iqeddec γef Yahwa. Amek i nezmer a nεaned lemtel-is? (Dan. 6:16, 20; Filib. 3:16; Aweḥ. 7:15)