TECFIḌ γef tlata yelmeẓyen-agi? D iḥbiben-nni n Danyil i gugin ad ččen ayen ur sen-nlaq ara. At Babil semman-asen Cadrax, Micax akk-d Σabdnaγu. Lameεna muqel-iten tura. Acuγer ur knin ara am medden meṛṛa zdat n lmeṣnuε-agi ameqran? D ayen ara nwali tura.

Tecfiḍ γef leqwanen i gura Yahwa s yiman-is iwumi qqaren Σecṛa n Lumuṛ? Lameṛ amezwaru yenna-d: ‘Ur ilaq ara aţ-ţεebdeḍ iṛebbiten nniḍen siwa nekkini.’ Γas yewεeṛ fell-asen, ilmeẓyen-a tebεen lameṛ-agi.

Nabuxadnuẓur yellan d agellid n Babil, yessawel i waṭas n yemdanen imeqranen a d-asen ad εebden lmeṣnuε i gesbedd. Mi d-nnejmaεen meṛṛa, yenna-yasen: ‘M’ara teslem i ṣṣut n lbuq, n snitra d dduzan n lmusiqa nniḍen, ilaq aţ-ţeknum yerna aţ-ţεebdem lmeṣnuε-agi n ddheb. Win ur nkennu ara zdat-es yerna ur t-neţεebbid ara, ad yeţţuḍegger imiren kan γer ufurnu n uḥeǧǧaǧu n tmes.’

Mi gesla belli Cadrax, Micax akk-d Σabdnaγu ur knin ara zdat n lmeṣnuε-nni, Nabuxadnuẓur yezεef aṭas. Yessawel i yelmeẓyen-nni, dγa yumeṛ-asen tikkelt nniḍen ad knun. Lameεna, ilmeẓyen-nni ţeklen γef Yahwa. Nnan i Nabuxadnuẓur: ‘Ṛebbi-nneγ iγef i nqeddec yezmer a γ-isellek. Lameεna, γas ur γ-isellek ara, ur neţεebbid ara lmeṣnuε-ik n ddheb.’

Cadrax, Micax akk-d Σabdnaγu

Mi gesla i imeslayen-agi, Nabuxadnuẓur yezεef akteṛ. Deg wemḍiq-nni anda llan, yella yiwen ufurnu. Dγa yefka ugellid lameṛ: ‘Sseḥmut afurnu-yinna sebεa iberdan akteṛ γef zik.’ Mbeεd, yenna i yergazen iǧehden n lεeskeṛ-is ad cudden yerna ad ḍeggren Cadrax, Micax akk-d Σabdnaγu γer tmes. Afurnu-nni yerγa nezzeh, armi i tendeh tmes deg yergazen-nni iǧehden. Lameεna, amek i teḍra d yelmeẓyen-nni yeţţuḍeggren γer daxel?

Agellid imuqel zdaxel n ufurnu-nni, dγa teṭṭef-it tugdi tameqrant. Isteqsa iqeddacen-is: ‘Mačči tlata yergazen icudden i nḍegger γer tlemmast n tmes?’

Iqeddacen-is rran-as: ‘Ih, swaswa.’

Agellid yenna-yasen: ‘Lameεna aql-i ţwaliγ ṛebεa yergazen i gleḥḥun di tlemmast n tmes. Ur cudden ara yerna ur ten-yuγ wara. Argaz wis ṛebεa yeţţak ccbiha γer lmelk.’ Imiren, agellid iqerreb γer tewwurt n ufurnu-nni, dγa iεeggeḍ: ‘A Cadrax, a Micax, a Σabdnaγu, ay iqeddacen n Ṛebbi Σlayen, ffγet-ed γer beṛṛa!’

Mi d-ffγen γer beṛṛa, medden meṛṛa walan belli ur ten-yuγ wara. Dγa yenna ugellid: ‘Ad yeţţubarek Ṛebbi n Cadrax, n Micax akk-d Σabdnaγu! Iceggeε-ed lmelk-is i ten-isellken axaṭer ur knin ara yerna ur εbiden ara ṛebbi nniḍen siwa Ṛebbi-nsen.’

Ur γ-d-ǧǧin ara Cadrax, Micax akk-d Σabdnaγu lemtel yelhan deg wayen yeεnan tuṭṭfa di Yahwa?

Tuffγa 20:3; Danyil 3:1-30.



Isteqsiyen

  • Anwa lameṛ i gefka ugellid Nabuxadnuẓur i wegdud?
  • Acimi ur knin ara zdat n lmeṣnuε tlata-nni yemdukkal n Danyil?
  • M’akken i gumeṛ tikkelt nniḍen Nabuxadnuẓur i tlata-nni Iεibṛaniyen ad knun zdat n lmeṣnuε, amek i d-sseknen belli ţeklen γef Yahwa?
  • Acu yenna Nabuxadnuẓur i iqeddacen-is a t-xedmen i Cadrax, Micax akk-d Σabdnaγu?
  • Acu i gwala Nabuxadnuẓur m’akken i gmuqel γer daxel n ufurnu-nni n tmes?
  • Ayγer i geḥmed ugellid Nabuxadnuẓur Ṛebbi n Cadrax, Micax akk-d Σabdnaγu? Anwa lemtel i γ-d-ǧǧan?

Isteqsiyen nniḍen

  • Γer Danyil 3:1-30.

    Tlata-nni Iεibṛaniyen ţţujeṛṛben di nnṣaḥa-nsen. Am nutni, anta tikli i glaq ad sεun iqeddacen meṛṛa n Ṛebbi m’ara ţţujeṛṛben? (Dan. 3:17, 18; Matta 10:28; Ṛuma 14:7, 8)

    Acu yesselmed Yahwa Ṛebbi i Nabuxadnuẓur? (Dan. 3:28, 29; 4:34, 35)