AGELLID Nabuxadnuẓur yewwi wid akk yeγran aṭas seg wat Isṛayil γer Babil. Mbeεd ixtaṛ ger imenfiyen-agi wid icebḥen d wid itεeqqlen akteṛ. Ṛebεa seg-sen d arrac i teţwaliḍ dagi. Yiwen isem-is Danyil, ma d tlata nniḍen, At Babil semman-asen Cadrax, Micax akk-d Σabdnaγu.

Nabuxadnuẓur iqsed ad yesγer ilmeẓyen-agi meṛṛa akken ad qedcen deg wexxam-is. M’ara fakken tlata iseggasen n leqraya-yagi, ad yextiṛ kan wid yugaren wiyaḍ di leεqel akken a t-εiwnen ad yefru uguren n tgelda-s. Agellid yebγa ad sεun lǧehd d ṣṣeḥḥa di lweqt-nni yakk ara sεeddin di leḥfaḍa. Dγa yefka lameṛ akken ad mudden i warrac-nni lerẓaq meṛṛa iteţţ neţţa ţ-ţwacult-is.

Danyil, Cadrax, Micax akk-d Σabdnaγu ssefhamen s wacu i ţţamnen

Muqel ilemẓi-yagi iheddṛen. Isem-is Danyil. Teẓriḍ acu akka yeqqar i Acfinaz, aqerru n iqeddacen n Nabuxadnuẓur? La s-yeqqar ur yebγi ara ad yečč lerẓaq i d-ikkan si ṭṭabla n ugellid. Acfinaz yetqelleq, dγa yenna i Danyil: ‘D agellid i gḍebbren γef wayen ara teččem d wayen ara teswem. Ma yella iwala-kkun ur tṣeḥḥam ara am yelmeẓyen-inna nniḍen, izmer a yi-ineγ.’

Danyil iṛuḥ ihi γer uεessas i gwekkel Acfinaz fell-as akk-d tlata yeḥbiben-is. Yenna-yas: ‘Di leεnaya-k, jeṛṛeb-aγ εecṛa wussan. Efk-aγ-d kan lxedṛa d waman. Ssyin sεeddi-yaγ zdat-ek nekni d wid iteţţen lqut n ugellid. Imiren wali anwi yesεan udem izeynen.’

Aεessas-nni yeqbel ad ixdem aya. Asmi fukken εecṛa wussan-nni, udem n Danyil d wid n yeḥbiben-is banen-d ṣeḥḥan akteṛ n wid n warrac nniḍen meṛṛa. Dγa yeǧǧa-ten uεessas-nni ad kemmlen učči n lxedṛa wala lerẓaq n ugellid.

Mi εeddan tlata iseggasen, wwin ilmeẓyen-nni meṛṛa zdat n Nabuxadnuẓur. Agellid immeslay yid-sen meṛṛa, iwala belli d Danyil akk-d tlata yeḥbiben-is i gḥeṛcen akteṛ γef wiyaḍ. Yerra-ten ihi d imeqranen akken a t-εiwnen deg wexxam-is. M’ara yesteqsay Danyil, Cadrax, Micax akk-d Σabdnaγu γef kra n temsalt neγ n wugur ameqran, yeţţaf-iten ugaren εecṛa iberdan lmuqeddmin d iseḥḥaren meṛṛa n tgelda-s.

Danyil 1:1-21.



Isteqsiyen

  • Anwa-ten ṛebεa yelmeẓyen-agi i teţwaliḍ di ţţeswiṛa, yerna acu i ten-yewwin γer Babil?
  • Acu i d-ihegga Nabuxadnuẓur i ṛebεa yelmeẓyen-nni? Anwi lumuṛ i gefka i iqeddacen-is?
  • D acu yeḍleb Danyil i yiman-is d tlata yerfiqen-is γef wayen yeεnan lmakla ţ-ţissit?
  • Mbeεd mi ččan lxedṛa azal n εecṛa wussan, amek i d-banen Danyil d tlata yemdukkal-is zdat n yelmeẓyen nniḍen?
  • Amek Danyil d tlata yemdukkal-is i d-ufan iman-nsen deg wexxam ugellid? Deg wacu i ifen lmuqeddmin d iseḥḥaren n Babil?

Isteqsiyen nniḍen

  • Γer Danyil 1:1-21.

    Anwi lmeǧhudat i glaq a d-nesbeggen ma nebγa a nqabel ajeṛṛeb neγ a neγleb lxiṣas-nneγ? (Dan. 1:8; Laṣel 39:7, 10; Gal. 6:9)

    Amek ayen teḥseb ddunit ass-a d ayen yelhan, yezmer ad yili d ajeṛṛeb neγ d lḥerṣ γef yelmeẓyen? (Dan. 1:8; Lem. 20:1; 2 Kurin. 6:17-7:1)

    Acu i γ-tesselmad teḥkayt-agi n ṛebεa Iεibṛaniyen γef wayen yeεnan tamusni i d-yekkan si ddunit? (Dan. 1:20; Icεa. 54:13; 1 Kurin. 3:18-20)