Ṛuḥ ɣer wayen yellan deg-s

Ṛuḥ ɣer wegbur

Taqsiṭ tis 67: Yahucafat yeṭṭef di Yahwa

Taqsiṭ tis 67: Yahucafat yeṭṭef di Yahwa

TEẒRIḌ anwa-ten yergazen-agi? Acu akka i xeddmen? Atnan leḥḥun γer lgirra. Lameεna ahat teqqareḍ-as: ‘Acuγer iγennayen-agi yezwaren zdat n lεeskeṛ ur sεin ara lessyuf d imeẓragen swayes ara mceččawen?’ D ayen ara nwali tura.

At Isṛayil teddun γer umenγi

Yahucafat yeḥkem γef tgelda n sin leεṛac n Isṛayil. Iεac di zzman ugellid Aḥab akk-d Izabal i gḥekmen di sin γef tgelda n umalu yesεan εecṛa leεṛac. Lameεna, Yahucafat neţţa yella d agellid yelhan am baba-s iwumi qqaren Asa. Γef waya i gεac aṭas n iseggasen di sseεd wegdud n tgelda n usammer yesεan sin leεṛac.

Lameεna yiwen wass, teḍra yiwet n lḥaǧa issagden agdud. Wwḍen-d yemceggεen, nnan i Yahucafat: ‘D izumal n iεsekṛiwen i d-iteddun si tmura n Muwab, Σamun akk-d wedrar n Siεir akken ad ẓedmen fell-ak.’ Ihi, At Isṛayil nnejmaεen deg waṭas yid-sen di Yarucalim iwakken ad εennin γer Yahwa. Ṛuḥen γer lemqam, dγa Yahucafat yeẓẓull dinna: ‘A Yahwa Ṛebbi, ur neẓri ara d acu ara nexdem. Aql-aγ netḥeyyeṛ zdat n izumal-agi n iεsekṛiwen. Allen-nneγ deg-k i reṣṣant.’

Yahwa iḥess-ed, dγa idemmer yiwen seg iqeddacen-is ad yini i wegdud: ‘Amenγi-yagi mačči d ayla-nwen, d ayla n Ṛebbi. Mačči d kunwi ara yennaγen di lfetna-yagi. Muqlet kan, twalim leslak ara wen-d-yawi Yahwa.’

Azekka-nni, Yahucafat yenna i wegdud: ‘Ṭṭfet di Yahwa!’ Dγa yezwar iγennayen ileḥḥun ţḥemmiden Yahwa zdat n lεeskeṛ. Teẓriḍ acu i geḍran mi qrib ad awḍen γer wemkan umenγi? Yahwa yesnaγ ixṣimen-nsen wway gar-asen. Mi leḥqen wat Isṛayil, ufan iεdawen-nni meṛṛa mmuten!

Mačči d aεeqli i gella Yahucafat m’akka yeţkel γef Yahwa? D iεeqliyen ara nili ula d nukni ma neţkel fell-as.

1 Igelliden 22:41-53; 2 Amezruy 20:1-30.


Isteqsiyen

  • Anwa i d Yahucafat? Melmi i gεac?
  • Acimi i ugaden wat Isṛayil? Acu i xedmen waṭas seg-sen?
  • Acu i d-yerra Yahwa i tẓallit n Yahucafat?
  • Acu yexdem Yahwa uqbel ad yebdu imenγi?
  • Acu i nezmer a nelmed γef Yahucafat?

Isteqsiyen nniḍen

  • Γer 2 Amezruy 20:1-30.

    Amek i d-yessken Yahucafat ayen i glaq ad xedmen iqeddacen unṣiḥen n Ṛebbi m’ara mmagren tiswiεin iweεṛen? (2 Amez. 20:12; Ahel. 25:15; 62:1)

    Si zik Yahwa yessexdam ţţawil akken ad yehdeṛ d wegdud-is. Anwa ţţawil i gessexdam ass-a? (2 Amez. 20:14, 15; Matta 24:45-47; Yuḥ. 15:15)

    Asm’ara d-yesseγli Yahwa “imenγi n wass ameqqran n Sidi Ṛebbi Bab n tezmert”, amek ara tcabi liḥala-nneγ tin n Yahucafat? (2 Amez. 20:15, 17; 32:8; Aweḥ. 16:14, 16)

    Am lemtel n wat Lewwi, anta lemεawna i ţţaken ass-a inaramen d yemceggεen i ccγel n uberreḥ di ddunit meṛṛa? (2 Amez. 20:19; Ṛuma 10:13-15; 2 Tim. 4:2)