Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 66: Izabal, tagelliṭ tamcumt

Taqsiṭ tis 66: Izabal, tagelliṭ tamcumt

MBEΣD lmut n ugellid Yarubεam, igelliden meṛṛa iḥekmen γef εecṛa leεṛac n Isṛayil llan d imcumen. Lameεna, agellid Aḥab yugar-iten meṛṛa. Teẓriḍ acimi? Ssebba tameqrant ţ-ţameṭṭut-is Izabal yellan ţ-ţagelliṭ tamcumt.

Izabal ur telli ara seg wegdud n Isṛayil. D yelli-s n ugellid n temdint n Ṣidun. Teţεebbid aṛebbit n lekdeb Baεal yerna tewwi Aḥab d waṭas si wat Isṛayil ad εebden ula d nutni Baεal. Izabal tekṛeh Yahwa yerna tessazzel idammen n waṭas n lanbeyya-ines. Wid i d-yeqqimen, ilaq-asen ad ffren di lγiran akken ur ten-tneqq ara. M’ara tebγu lḥaǧa, teţţaweḍ dima γer lebγi-s γas ilaq aţ-ţneγ albeεḍ.

Yiwen wass, agellid Aḥab yeḥzen aṭas. Dγa testeqsa-t Izabal: ‘Acuγer akka i tḥezneḍ ass-a?’

Aḥab yerra-yas: ‘Γef ssebba n wayen i yi-d-yenna Nabut. Bγiγ ad aγeγ fell-as tafeṛṛant-is lameεna yeggumma a yi-ţ-izzenz.’

Izabal tenna-yas: ‘Ur ţceggib ara iman-ik, d nekk ara k-ţ-id-iḥeṛṛen.’

Izabal tura tibṛatin, dγa tceggeε-itent i kra n imeqranen n temdint anda yezdeγ Nabut. Tenna-yasen: ‘Ddmet sin imejhal ara iberrḥen belli Nabut yenεel Ṛebbi akk-d ugellid. Mbeεd awit Nabut beṛṛa n temdint, tṛejmem-t alamma yemmut.’

Akken kan i ţ-id-yewweḍ lexbaṛ belli yemmut Nabut, Izabal tenna i Aḥab: ‘Kker aţ-ţeddmeḍ tafeṛṛant n Nabut.’ Ahat ula d kečč teqqareḍ-as deg yiman-ik belli tuklal Izabal lεiqab imi texdem tawaγit yecban tagi, neγ ala?

Tagelliṭ Isabal

Yusa-d lawan ideg iceggeε Yahwa yiwen wergaz iwumi qqaren Yihu akken a ţ-iεaqeb. Mi tesla Izabal iteddu-d Yihu, tekker tkeḥḥel i wallen-is yerna tcebbeḥ iman-is. Mi d-yusa Yihu, yufa-ţ-id γef ṭṭaq. Yenna i yergazen yellan deg wexxam: ‘Ḍeggret-ţ-id d akessar!’ D ayen i xedmen yergazen-nni akken i teţwaliḍ di ţţeswiṛa. Ḍeggren-d Izabal tamcumt, dγa temmut. Akka i tfukk ddunit fell-as.

1 Igelliden 16:29-33; 18:1-4; 21:1-16; 2 Igelliden 9:30-37.



Isteqsiyen

  • Anta i d Izabal?
  • Acimi yeḥzen yiwen wass ugellid Aḥab?
  • Acu i texdem Izabal akken ad yekseb wergaz-is Aḥab tafeṛṛant n Nabut?
  • Anwa i gceggeε Yahwa akken ad iεaqeb Izabal?
  • Akken i teţwaliḍ di ţţeswiṛa, acu yeḍran mi gewweḍ Yihu γer wexxam n Izabal?

Isteqsiyen nniḍen

  • Γer 1 Igelliden 16:29-33 d 18:3, 4.

    Ini-d acḥal i tewεeṛ temεict di Isṛayil m’akken yeḥkem ugellid Aḥab. (1 Igel. 14:9)

  • Γer 1 Igelliden 21:1-16.

    Amek i d-issken Nabut tirrugza d nnṣaḥa γer Yahwa? (1 Igel. 21:1-3; Lewwi 25:23-28)

    Akken ur nettabaε ara lemtel n Aḥab, amek i glaq a nqabel taswiεt ur d-nusi ara akken i ţ-nenwa? (1 Igel. 21:4; Ṛuma 5:3-5)

  • Γer 2 Igelliden 9:30-37.

    Yihu yexdem lebγi n Yahwa s ẓẓwara. Acu i nezmer a neḥfeḍ si lemtel-is? (2 Igel. 9:4-10; 2 Kurin. 9:1, 2; 2 Tim. 4:2)