Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 65: Tagelda tebḍa γef sin

Taqsiṭ tis 65: Tagelda tebḍa γef sin

TEẒRIḌ acimi i gcerreg wergaz-agi ajellab-is? D Yahwa i s-t-id-yumṛen. Argaz-agi d nnbi Aḥyah. Teẓriḍ d acu i d nnbi? D win yeţxebbiṛ Ṛebbi γef wayen ara yeḍrun γer zdat.

Aḥyah Akk-d Yarubεam

Aḥyah yeţmeslay dagi neţţa d Yarubεam. Yarubεam d argaz i gwekkel Sliman γef kra n ccγel di lebni. Mi d-yemmuger Yarubεam deg webrid, Aḥyah yexdem lḥaǧa yessewhamen. Yeddem-ed ajellab ajdid yellan γef yiri-s, icerreg-it γef 12 yeḥricen. Aḥyah yenna i Yarubεam: ‘Ddem i yiman-ik εecṛa yeḥricen.’ Teẓriḍ ayγer yefka Aḥyah εecṛa yeḥricen i Yarubεam?

Nnbi Aḥyah yessefhem i Yarubεam belli qrib ad yekkes Yahwa tagelda i Sliman. Yenna-yas daγen: ‘Yahwa a k-yefk εecṛa leεṛac; a d-grin kan sin leεṛac i Raḥabεam, mmi-s n Sliman, ara iḥekmen deg wemkan n baba-s.’

Mi gesla swayen yenna Aḥyah i Yarubεam, Sliman izεef ayendin, dγa yeεreḍ ad ineγ Yarubεam. Lameεna Yarubεam irwel γer Maṣer. Mi gεedda kra n lweqt, yemmut Sliman. Yeḥkem 40 iseggasen, lameεna tura d mmi-s Raḥabεam i guγalen d agellid. Asmi i gesla s lmut n Sliman, Yarubεam yuγal-ed γer tmurt n Isṛayil.

Raḥabεam d agellid n diri. Qessiḥ γef wegdud akteṛ n baba-s Sliman. Yarubεam d kra n imeqranen n Isṛayil ṛuḥen ihi ad ssutren i ugellid Raḥabεam ad yiḥnin γef wegdud. Lameεna ur sen-iḥess ara. Yuγal qessiḥ akteṛ n zik. Dγa agdud yerra Yarubεam d agellid γef εecṛa leεṛac, ma d sin leεṛac-nni nniḍen, win n Binyamin akk-d win n Yahuda, qqimen ddaw n leḥkem ugellid-nsen Raḥabεam.

Yarubεam ur yebγi ara ad iṛuḥ wegdud-is γer Yarucalim akken ad iεbed di lemqam n Yahwa. Dγa yexdem sin iεejmiyen n ddheb yerna yewwi tagelda n εecṛa leεṛac a ten-εebden. Tamurt ur tεeṭṭel ara teččuṛ d leqher ţ-ţmenγiwt.

Lameεna yella ccwal ula di tgelda-nni n sin leεṛac. Werεad wwḍen xemsa iseggasen segmi yebda Raḥabεam leḥkem, mi d-yuli ugellid n Maṣer ad innaγ neţţa ţ-ţemdint n Yarucalim. Yeddem aṭas n igerrujen si lemqam n Yahwa. Twalaḍ? Ur iqqim ara lemqam aṭas n lweqt akken yella di tazwara.

1 Igelliden 11:26-43; 12:1-33; 14:21-31.



Isteqsiyen

  • Efk-ed ismawen n sin yergazen-agi yellan di ţţeswiṛa. Anwa-ten?
  • Acu yexdem Aḥyah s ujellab-agi-ines? D acu i d lmeεna-s?
  • Acu yeεreḍ ad yexdem Sliman i Yarubεam?
  • Acimi yesbedd wegdud Yarubεam d agellid γef εecṛa n leεṛac?
  • Ayγer i gexdem Yarubεam sin iεejmiyen n ddheb? Acu yeḍran s lemγawla di tmurt?
  • Acu yeḍran ţ-ţgelda n sin leεṛac d lemqam n Yahwa di Yarucalim?

Isteqsiyen nniḍen

  • Γer 1 Igelliden 11:26-43.

    Amek i iga Yarubεam? Acu i s-iwεed Yahwa ma yella yeṭṭef di lumuṛ-is? (1 Igel. 11:28, 38)

  • Γer 1 Igelliden 12:1-33.

    Raḥabεam yeḥkem s lḥerṣ γef wegdud-is. Acu i zemren ad lemden imawlan d lecyux si yir lemtel-agi-ines? (1 Igel. 12:13; Amus. 7:7; 1 Buṭ. 5:2, 3)

    Ass ideg ilaq ad ṭṭfen ṛṛay ameqran di tudert-nsen, γer wuγur i glaq ad zzin yelmeẓyen n wass-a akken ad afen lewṣayat? (1 Igel. 12:6, 7; Lem. 1:8, 9; 2 Tim. 3:16, 17; Iεeb. 13:7)

    D acu yewwin Yarubεam ad yesbedd sin imeḍqan i leεbada n uεejmi? Amek i d-isbeggen waya belli Yarubεam ixuṣṣ mliḥ liman di Yahwa? (1 Igel. 11:37; 12:26-28)

    Anwa i gewwin agdud n tgelda n εecṛa leεṛac ad iεaṣi leεbada n ṣṣeḥ? (1 Igel. 12:32, 33)