Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Ṛuḥ ɣer wegbur

Inagan n Yahwa

Taqbaylit

Tiqsiḍin n Wedlis Iqedsen

Taqsiṭ tis 55: Aqcic iqeddcen γef Ṛebbi

Taqsiṭ tis 55: Aqcic iqeddcen γef Ṛebbi

AQCIC-AGI yeččuṛ d sser neγ ala? Isem-is Camwil. Argaz-agi issersen afus-is γef uqerruy-is d Σili, lmuqeddem ameqran n Isṛayil. D baba-s n Camwil yeţţusemman Ilqana akk-d yemma-s Ḥana i t-id-yewwin γer Σili.

Camwil yemlal neţţa d lmuqeddem amqran Σili

Camwil yesεa kan ṛebεa neγ xemsa iseggasen di leεmeṛ-is. Lameεna, tura ad iεic deg uqiḍun imqeddes n Yahwa neţţa d Σili akk-d lmuqeddmin nniḍen. Acuγer ara fken Ilqana d Ḥana mmi-tsen amecṭuḥ akken ad yeqdec i Yahwa deg uqiḍun imqeddes? D ayen ara nwali tura.

Kra n iseggasen uqbel, Ḥana teḥzen ayendin. Yemmuγben wul-is axaṭer ur tezmir ara a d-tesεu dderya. Yuγ lḥal neţţat tezza tεebbuṭ-is γef dderya. Yiwen wass, tṛuḥ γer uqiḍun imqeddes, dγa teẓẓull: ‘A Yahwa ur iyi-teţţu ara! Ma yella tefkiḍ-iyi-d aqcic, εuhdeγ-k a k-t-fkeγ akken ad iqdec fell-ak ddunit-is meṛṛa.’

Yahwa iqbel taẓallit n Ḥana. Σeddan kra n wagguren, terfed s tadist, tesεa-d Camwil. Ḥana tḥemmel aṭas mmi-s amecṭuḥ, tesγaray-it γef Yahwa seg wasmi yella d aṭuṭaḥ. Tenna i wergaz-is: ‘M’ara yimγur kan cwiṭ, a s-kkseγ tuṭṭḍa, a t-awiγ γer uqiḍun imqeddes ad iqdec dinna γef Yahwa.’

D ayen i xedmen Ilqana akk-d Ḥana akken i teţwaliḍ di ţţeswiṛa-ya. Imi i t-ṛebban imawlan-is akken i glaq, Camwil yefṛeḥ aṭas imi yezmer ad iqdec deg uqiḍun imqeddes n Yahwa. Mkul aseggas Ilqana akk-d Ḥana ţṛuḥun ad εebden deg uqiḍun imqeddes, yerna rezzun γef mmi-tsen amecṭuḥ. Yal aseggas Ḥana teţţawi-yas i Camwil aqendur ajdid i s-teţxiḍi.

Aseggas ittabaε-it-id wayeḍ, Camwil mazal-it iqeddec γef Yahwa deg uqiḍun imqeddes. Ḥemmlen-t meṛṛa, ama d Yahwa ama d imdanen. Lameεna arraw n lmuqeddem ameqran Σili, Ḥufni akk-d Finḥas, nutni diri-ten. Xeddmen aṭas n leḥwayeǧ n diri, yerna ţţawin wiyaḍ ad εaṣin Yahwa ula d nutni. Lukan d lebγi, ur ilaq ara a ten-yeǧǧ Σili ad qqimen d lmuqeddmin, lameεna ur ixdim acemma.

Ilemẓi-nni Camwil ur yeǧǧi ara ayen n diri i gḍerrun deg uqiḍun imqeddes a t-yawi ad yeḥbes leqdic-is i Yahwa. Di zzman-nni drus n yemdanen i gḥemmlen Yahwa s tideţ, γef waya i gεedda waṭas n lweqt ideg ur d-yehdiṛ ara Yahwa i wemdan. Lameεna, asmi i gennerna Camwil di leεmeṛ, atah wayen yeḍran: Camwil yella yeṭṭeṣ deg uqiḍun imqeddes mi t-id-yessaki yiwen ṣṣut. Yerra-yas: ‘Anεam.’ Dγa yekker yuzzel γer Σili, yenna-yas: ‘Aql-iyi axaṭer tessawleḍ-iyi-d.’

Lameεna, Σili yerra-yas: ‘Ur k-in-ssawleγ ara, uγal aţ-ţeṭṭṣeḍ.’ Ihi Camwil yuγal ad yeṭṭeṣ.

Camwil yesla diγen i win i s-d-issawalen: ‘A Camwil!’ Dγa yekker tikkelt nniḍen, yuzzel γer Σili, yenna-yas: ‘Aql-iyi axaṭer tessawleḍ-iyi-d.’ Lameεna, Σili yerra-yas: ‘Ur k-in-ssawleγ ara a mmi. Uγal aţ-ţeṭṭṣeḍ.’ Ihi Camwil yuγal ad yeṭṭeṣ.

Camwil yesla i ṣṣut-nni abrid wis tlata: ‘A Camwil!’ Dγa yuzzel γer Σili, yenna-yas: ‘Aql-iyi axaṭer tikkelt-a tessawleḍ-iyi-d.’ Σili yefhem tura belli d Yahwa i s-d-issawalen. Γef waya i genna i Camwil: ‘Ṛuḥ aţ-ţeṭṭṣeḍ. Ma yessawel-ak-d tikkelt nniḍen, ini-yas: “Hdeṛ a Yahwa, aqeddac-ik yeţḥessis.”’

D ayen i s-yenna Camwil mi s-d-yessawel Yahwa abrid nniḍen. Imiren, Yahwa yenna i Camwil belli qrib ad iεaqeb Σili d warraw-is. Iεedda kra n lweqt, Ḥufni d Finḥas mmuten di lgirra akk-d Ifilistiyen. Mi gesla Σili s lexbaṛ-agi, yeγli ţ-ţinnegnit, irreẓ si temgerṭ, dγa yemmut ula d neţţa. Ayen i d-yenna Yahwa yeḍra-d swaswa.

Asmi i meqqer Camwil, yuγal d lqaḍi aneggaru n Isṛayil. Mi guγal d amγar, At Isṛayil ssutren-as: ‘Efk-aγ-d agellid ara γ-iḥekmen.’ Camwil ur yebγi ara a sen-iḥess axaṭer d Yahwa i d agellid-nsen. Lameεna Yahwa yenna i Camwil ad yaγ awal i wegdud.

1 Camwil 1:1-28; 2:11-36; 4:16-18; 8:4-9.



Isteqsiyen

  • Isem-is weqcic-agi i teţwaliḍ di ţţeswiṛa? Anwa-ten wigad-agi yellan γer tama-s?
  • Anta taẓallit i texdem Ḥana asmi i tella deg uqiḍun imqeddes? Amek i s-d-yerra Yahwa?
  • Acḥal di leεmeṛ n Camwil mi t-wwin imawlan-is ad iqdec deg uqiḍun n Yahwa? Acu i s-txeddem yemma-s mkul aseggas?
  • Ini-d ismawen n warraw n Σili. Amek i gan yergazen-agi?
  • Amek i gessawel Yahwa i Camwil? Γef wacu i t-ixebbeṛ?
  • Anwa ccγel i geţţunefken i Camwil mi guγal d argaz? Acu yeḍran asmi yuγal d amγar?

Isteqsiyen nniḍen

  • Γer 1 Camwil 1:1-28.

    Anwa lemtel ifazen i d-yeǧǧa Ilqana i iqerra n twaculin deg wayen yeεnan awelleh di leεbada n ṣṣeḥ? (1 Cam. 1:3, 21; Matta 6:33; Filib. 1:10)

    Ḥana tefra yiwen weγbel ameqran. Acu i nezmer a nelmed si lemtel-ines? (1 Cam. 1:10, 11; Ahel. 55:22; Ṛuma 12:12)

  • Γer 1 Camwil 2:11-36.

    Amek i gεuzz Σili arraw-is akteṛ n Yahwa? Amek yezmer a γ-iεiwen wannect-a akken a nḥader iman-nneγ? (1 Cam. 2:22-24, 27, 29; Asmek. 21:18-21; Matta 10:36, 37)

  • Γer 1 Camwil 4:16-18.

    Anwi i d ṛebεa n lexbaṛat yesseḥzanen i d-yewwḍen seg wemḍiq anda i ţnaγen? Acu yeḍran d Σili mi sen-yesla?

  • Γer 1 Camwil 8:4-9.

    Amek i sserfan wat Isṛayil Yahwa? Amek i nezmer ass-a a ndafeε s nnṣaḥa γef Tgelda-s? (1 Cam. 8:5, 7; Yuḥ. 17:16; Yeε. 4:4)